भांगरभूंय | प्रतिनिधी
फलोत्पादन म्हामंडळाची जातली बसका
पणजी : नाल्लाचो दर वाडिल्ल्यान 45 रूपया मेरेन नाल्ल विकपाच्या उपक्रमाचो फलोत्पादन म्हामंडळ हे सप्तकात नियाळ घेतलें. मागणी आनी म्हामंडळाक येवपी खर्चाचो विचार करून उपक्रम फुडें चालू दवरचो काय ना, ताचो विचार जातलो, अशी म्हायती फलोत्पादन म्हामंडळाचे वेवस्थापकी संचालक चंद्रहास देसाय हांणी दिली.
गोंयांत नाल्लांचें पीक सामकेंच उणें आयिल्ल्यान नाल्ल बरोच म्हारग जाला. बाजारांत 60 ते 100 रुपया अशें नाल्लाचें मोल आसा. हे फाटभुंयेर चवथे खातीर भायल्या राज्यांतल्यान नाल्ल हाडून तो लोकांक सवाय भितर दिवपाचो उपक्रम म्हामंडळान चालू केला.
आतां मेरेन तीन खेपे मेळून वट्ट 75 हजार नाल्ल हाडलें. कर्नाटकांतल्यान हाडिल्ले सगले नाल्ल खपले. चवथेच्या दोन दीस पयलीं 25 हजार नाल्लांची रास आयली. 43 वा 45 रुपया एक अशा दरान म्हामंडळाच्या दुकानांचेर नाल्लाची विक्री जाल्या. नाल्ल 38 रुपया पडलो जाल्यार 43 रुपयान विक्री जाली आनी 40 रुपया पडलो जाल्यार 45 रुपयान नाल्ल विकलो. गाळेधारक 5 रुपया फायदो थेट गिरायका कडल्यान घेतात. म्हामंडळाचो मुखेल वेवसाय भाजयेचो आसा. हाका लागून सवाय दरात नाल्ल विकपाच्या उपक्रमाचो चवथ सोंपिल्ल्यान आतां नियाळ जातलो, अशें चंद्रहास देसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
