भांगरभूंय | प्रतिनिधी
चिंतन – 22
नाहीं चालों येत सोंगसंपादणी ।
निवडे अवसानीं शुद्धाशुद्ध ॥
तुकाराम महाराजांचीं हीं उतरां म्हणल्यार जिविताचो अस्सल हारसो. जिणेंत, मागीर तें मळ परमार्थाचें आसूं वा वेव्हार, कोणाचें सवंग चड काळ तिगना. निमणो कस लागता आनी खरी वळख भायर येताच. आमी बरेच फावटी पळयतात, की एखादो मनीस समाजांत खूब धर्मीक दिसता- कपलार गंध, हातांत माळ, ओठाचेर ‘रामनाम’, पूण वागप मात विखा सारकें. दुसऱ्यांक दुय्यम लेखप, अपमान करप, सुवार्था खातीर धर्माचो देखावो करप- हें कितें तिगपाचें ना. फकत परमार्थांतूच न्हय तर जिणेच्या सगळ्या मळांचेर खरे आनी फटीचो न्याय जाता.
‘द मॅट्रिक्स’ आनी ‘जॉन विक’ सारकिल्ले सुपरहिट सिनेमा दिवपी कीनू रीव्स संवसारभर फामाद आसा. पूण ताचे वैयक्तीक जिवीताचें पान ही एक सामकी वेगळी काणी. ताचे इश्टिणीक अपघातांत मरण आयलें. जल्माक येवपाचें आशिल्लें भुरगें संवसाराक अंतरलें. ताचे भयणीक ल्युकेमिया जालो. आनी तरी लेगीत ताच्या तोंडांतल्यान एकूय खबर, उतर भायर सरलें ना.
एक दीस एका वेटराक अपघात जालो – कीनून गुप्तपणान हॉस्पिटलाचो खर्च भरलो. मेट्रोंत बसपाक सुवात नाशिल्ल्यान तो उबो रावता, हेरांक बसपाक दिता. एक फावट ताणें सेटाचेर काम करपी तंत्रज्ञांक स्वताच्या पगारांतल्यान सायकल भेट दिली. ताची नामना आसून लेगीत तो एक सादो, शांत मनीस – कसलेंच म्होवाळें घालनासतना, फकत आपलें खरें जिवीत जगपी.
सचिन तेंडुलकर. क्रिकेटीच्या संवसारांत जायते संवसारीक विक्रम करप सोंपें न्हय, आनी नम्र रावप तर आनीकय कठीण. ताचेरुय “सुवार्थीपणान खेळटा”, “ब्रँडा खातीर खेळटा” अशे आरोप जाले पूण ताणें केन्नाच जाप दिली ना. 24 वर्सां ताचें बॅट उलयली आनी निवृत्ती उपरांत पुराय स्टेडियम दुकांन भरिलो. खरी निवड तीच आशिल्ली – “शुद्धाशुद्ध” हांचे मदली.
सवंग करपी व्हड दिसतात, पूण उंच उरनात. आनी जे खरे आसतात, तांची उंचाय संवसार वेळार वळखता.
म्हणल्यार निमाणें काळ निवड करता – कोण शुद्ध? कोण अशुद्ध?
नाटकाचो पडदो पिंजताच. मास्क पडटात. आनी खरी वळख उसरां कांय जायना उक्ती जाताच!
तर, आयज स्वताक विचारूंया… खरेंच आमी जियेतात? काय खंयच्या तरी सवंगाच्या फाटल्यान स्वताक लिपयतात?
– ह.भ. प. देवदत्त परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
