भांगरभूंय | प्रतिनिधी
भावंडांनो,
संवसारांत आमचे भोंवतणी संशोधनाची कितलींशींच बियां शिंवरलेलीं आसातात. ती संशोधनाचीं बियां रुजोवपाक आमकां जाय ती एक विशिश्ठ नदर आनी ती आमच्यांत येता ती खर अभ्यासान, वाचनान. ते विशिश्ठ नदरेंतल्यान आमीं भोंवतणच्या समाजाचें हीत पळयतां पळयतां वियांचे रुजवणेंतल्यान संशोधनाच्या मालवजार जावंक पावतात संशोधक, एक विज्ञानीक. भावंडांनो, विज्ञान हे आमच्या उदरगती खातीरच आसता. पुणून कांय लोक ताचो इबाडा खातीरच वापर करतात तें समा न्हय.
भावंडांनो, म्हत्वाचें सांगपाचें म्हणल्यार विज्ञानाचो आमचे जिणेंत खूब मोलाचो वांटो आसा. ताचे बगर आमी जगुंकच शकनात. देखूनच ताचें म्हत्व जाणून घेवपाक, तगून दवरपाक आमी विज्ञान दीस पाळटात. ते वरवीं भोंवतणी जागृताय घडोवन हाडटात. पुणून एक सांगतां, हो विज्ञान दीस आमी खास करून जाचे नांवान वा यादीन पाळटात ते म्हणल्यार म्हान पदार्थशास्त्रज्ञ, गणीत तज्ञ सर सी.वी. रामन. तांच्या ‘रामन इफेक्ट’ संशोधना वेल्यानूच तांचे जयंती निमतान आमी तो दीस देसभर तरेकवार विज्ञानीक कार्यावळी वरवीं मनयतात. तांची जयंती 28 फेब्रेराक आनी मनयतले. देखून तांचे विशीं थोडीशी म्हायती तुमकां दितां.
सर सी.वी.रामन म्हणल्यार सर चंद्रशेखर वेंकट रामन. तांचो जल्म 7 नोव्हेंबर1888 दिसा तिरुचीरापल्लींत जालो. तांचे शिक्षण विशाखापट्टणमांत सेंट एलॉयसीस एंग्लो इंडियन हायस्कुलांत जालें. ताणीं तांचें माध्यमीक शिक्षण शिश्यवृत्ती मेळोवनूच पुराय केलें. 1904 वर्सा रामन मद्रास विद्यापिठांत पदवीधर जाले, जाल्यार 1907 वर्सा विज्ञान फांट्यांतल्यान ते पदव्युत्तर जाले. तांणी विशेश प्राविण्य मेळोवन मद्रास विद्यापिठांत पयले येवपाचो भोवमान मेळयलो. तांकां भांगरा पदक फावो जालें.
भावंडांनो, तुमी जाणात.. सर रामनाचेर एनी बिसेंटाच्या उलोवण्याचो खूबच परिणाम जाल्लो, तशेंच रामायण-म्हाभारत ह्या ग्रंथाचोय तांचेर बरोच प्रभाव पडिल्लो. देखून तांच्या बापायन तांकां विदेशांत धाडपाचें येवजिलें. पुणून रामनाच्या कुटुंबाच्या दोतोरान तांकां विदेशांत धाडप समा न्हय अशें सांगलें. ताका लागून रामनान मद्रास विद्यापिठांतल्या प्रेसिडेंसी कॉलेजांत प्रवेश घेतलो.
सर रामणानीं खूब संशोधनां केलीं, जायत्या संस्थांनी मोलादीक वावर केलो. इंडियन फायनान्स संचालनालय कलकत्ता विद्यापीठ, बनारस हिंदू विद्यापीठ, इंडियन असोसिएशन फॉर द कल्टिवेशन ऑफ सायन्स, रामन रिसर्च इंस्टिट्यूट आदी संस्थानीं ते मुखेलपणान वावुरले.
तांचो ‘रामन इफेक्ट’ संवसारभर गाजलो. लायट स्केटरींग चो सोद दोळे दिपकावपी थारलो. ताणी लायिल्ल्या संशोधनानीं तांकां 1930 वर्सा फिजिक्सा खातीरचो नोबेल पुरस्कार फावो जालो. त्याच वर्सा परतून ह्युजीस पुरस्कारय तांकां भेटयलो. 1929 वर्सा नायट बॅचलर्स जाल्यार 1954 वर्सा भारत रत्न पुरस्कार दिवन भारत सरकारान तांचो भोवमान केलो. उपरांत तांकां फ्रॅंकलीन पुरस्कार, 1957 वर्सा लेनीन शांतताय पुरस्कार, मेट्टीयुसी पुरस्कार, रॉयल सोसायटीची फॅलोशीप तांकां फावो जाली.
भावंडांनो, सर रामन हांच्या संशोधनातल्यान, कार्यांतल्यान उर्बा मेळोवन तांचे शिश्य नामनेचे विज्ञानीक विक्रम साराभाय, जी.एन. रामचंद्रन, शिवरामकृष्णन पंचरत्न हांणी विज्ञानीक मळार खूब नामना मेळयलीं. तांचे दोगूय पूत विज्ञानाच्या मळार पर्जळ्ळे. सुब्रह्मण्यम चंद्रशेखर हांकां 1983 वर्सा नोबेल पुरस्कार फावो जालो जाल्यार राधाकृश्णन हे रेडियो एस्ट्रोनोमर म्हूण नामनेक पावल्यात.
अशा ह्या म्हान विज्ञानिकाक, संशोधकाक 21 नोव्हेंबर 1970 दिसा मरण आयलें. भावंडांनो 28 फेब्रेराक तांचे जयंती निमतान आमी तांकां नमळायेन आर्गां ओंपुया आं.. जय विज्ञान उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
