सर्व मंगल मांगल्ये शिवे सर्वार्थ साधिके

भांगरभूंय | प्रतिनिधी

फातोर्डा, नावेले, पणजे, फोंड्यां, म्हापश्यां, पेडण्यां आनी हेर राष्ट्रीय खेळां सर्तीच्या सुवातींनी थळाव्यांक चडांत चड आसपावन घेतल्यार, येरादारींचें वेवस्थापन सारकें जाल्यार कोयंडेंतल्यान वाट दिसतली.

दीस नवरात्रांचे. परिक्षेच्या दिसांनी देवी शारदेची आराधना सुरू जाल्या. नवरात्रांच्या दिसांनी विंगड विंगड रंगां रुपांनी देवळांनी देवदेवताच न्हय जाल्यार स्त्रीशक्तीय दिश्टी पडटली. केन्ना ती एकटी, केन्ना वांगडा तो, भुरगीं आनी समेस्तय आसतले.
वाग- शिंवाच्यो काणयो सांगून तिका आडावपाचे दीस आतां उरूंक नात, तिच्या हातांत पिस्तूलय आयलां. काणयेंतले वाग शिंव जेन्ना तिच्या मुखार जिते जावन येतात तेन्ना हातांत कुदळ, भालो, त्रिशुळ, गदा, कोयतो अशीं हाता लागीं मेळत तीं अस्त्रां शस्त्रां घेवन ताकाय वाटायता. ताकाय वेळा प्रसंगार तिका सत्तासनार बसोवपाची मानसीकता लोकां भितर केळोवची पडटली.
नवरात्रांच्या दिसांनी तिकाच न्हय, ताकाय गोंयां सारक्या राज्यांनी मखरांत बसयतात. तिका सजयता, नटयतना ताकाय सजयतात, नटयतात. नवरात्रां हो फकत स्त्रीशक्तीचो न्हय जाल्यार सगल्यांनी एकठांय येवन मनोवपाचो उत्सव. तो, ती आनी तीं, तें सगलीं उत्सवांत गुल्ल जाल्यार तांकां जागोवपी राखणदार आसता. राखणेक ताचे बराबरीन ती धांवता तेन्ना तिका कुशीक काडपाचे येत्न करचे परस तिका उमेद दिवची. फाटल्यांनी दिल्ल्या तेंक्याचेर ती सगल्या मळांनी पावल्या. राष्ट्रीय खेळां सर्तींतय गोंयची माध्यमशक्ती दनुश्का द गामा वेवस्थापनांत दिसतली. बुद्धिबळाची राणी भक्ती कुलकर्णी राज्याचो बावटो घेवन आसतली. पेंवपी फुलपाकुलीं उडटलीं, जिखतलीं. तांकां जैत मेळूं अशें देवा लागीं मागुया, तांकां सांबाळपाक खासा राखणे वेवस्था जाय. तांचे खातीर खासा बशीची सुविधा आसतली. नितळ उदक, ताज्या जेवणा-खाणाच्या वेवस्थापनाची जापसालदारकी तिचे कडेन दिवची. खासा सुचोवण्यो दिवपी तक्ते चारूय दिकांनी हिन्दी, इंग्लीश, राजभास कोंकणींतल्यान आसचे.
फातोर्डा, नावेले, पणजे, फोंड्यां, म्हापश्यां, पेडण्यां आनी हेर राष्ट्रीय खेळां सर्तीच्या सुवातींनी थळाव्यांक चडांत चड आसपावन घेतल्यार, येरादारींचें वेवस्थापन सारकें जाल्यार कोयंडेंतल्यान वाट दिसतली. पणजे अडेचें मिनी खेळां शार बांदलां, थंय मांडवी न्हंय लागीं आसा, नवो कांपाल पॉयण्ट आसा हें मतींत दवरचें. कांपाल पॉयण्टाक नांव ना, राखणय अजून मेळूंक ना. त्या पॉयण्टार वतना न्हंयचेर घाल्ल्या फातरांचेर भुरगीं वच्चीं ना अशी शिटकावणी दिवपी तकटे जायच त्या भायर राखणदारय जाय. भुरग्यांचेर, खेळगड्यांचेर नदर दवरपाक सी सी टी व्ही कॅमेरा आसतलेच, ए आय चो उपेग केल्यार संकश्टांविणें सर्ती जातल्यो. मान्सून सोंपलो तरी हुंवार, वादळ, जोगलावणी जाता, हवामान खात्याच्या अलर्टाक म्हत्व आसा, 90 टक्के सत सांगपी वेधशाळा केन्नाय एकादरे वेळार चुकता पूण सादूर कित्याक रावचें न्हय?
शिटूकसाणीन चलल्यार, उलयल्यार, बसल्यार आनी वावुरल्यार, फुडाराचें चिंतल्यार संकश्टांतय तुमकां आमकां मार्ग दिसतलो.
सर्व मंगल मांगल्ये शिवे सर्वार्थ साधिके, शरण्ये त्र्यम्बके गौरी नारायणी नमोस्तुते, हो मंत्र धादोसकायेचो. सगल्यांच्या मनांतल्यो इत्सा खेळां सर्तींनी पुराय जातल्योच अशें ना पूण उमेदीचीं नवीं ल्हारां केळोवपी. देवी शांतादुर्गा, म्हालसे, सांतेरी, वेताळ, महालक्ष्मी, मदर मेरीक पयसुल्ल्यानय देवा तूं पाव ही प्रार्थना सकाळीं, सांजवेळा जाता.
म्हापशें, पणजे, मडगांव, मुरगांव, पेडण्या, फोंड्यां, दिवचले ह्या शारांनी वातावरणांतल्या बदलांचो अभ्यास जावपाक जाय. नवरात्रांनी पावस आदीं सावन पडटा, पूण अचकीत काळीं कुपां कित्याक दाटून येतात?
नदर दवरपी मनीसबळ आसा?
पश्चिम घाटांतलो सैम नवें रूप घेता? कुपांय नकलीं आसतात? वातावरण बदलांची माहिती सर्तीक येतल्यांक मेळपाची तजवीज केल्या आसतलीच पूण दिसपट्टे वातावरणांत जावपी बदलांतल्यान खेळां सर्ती बंद पडच्यो नात हाचेर नदर दवरपी मनीसबळ आसा? आरोग्य यंत्रणा, अॅम्बुलन्सी, दोतोरांच्या पंगडाची माहिती आप-वावुरप्यांकय आसची.
सगलें मंगल जातलें अशें चिंतुनूय वायट घडल्यार, आकांतवादी घुसल्यार खासा राखणेदळ झुजतलेंच. इफ्फींत आयनॉक्स चौकांत झाडा खाला घडोवन हाडिल्ले भासाभाशे वेळार एका विदेशी दिग्दर्शकाक अकस्मात मरण आयलें, तें एक फुटवॉल खेळगडे आशिल्लें. तें पडले तें आप वावुरप्यांकय खबर नाशिल्लें. माध्यम प्रतिनिधींनी अॅम्बुलन्स मागयली. माध्यम प्रतिनिधींकय टॅन्शनां आसतात, तांकांय जोर, घुंवळ येता, थंडी जाता तेन्ना तांकांय मजत मेळची. संकश्टांत ल्हानसो उक्तावण सुवाळो जावचो मंगलगितांनी.

सुहासिनी प्रभुगांवकार
9881099260