भांगरभूंय | प्रतिनिधी
कोर्टान म्हणलें – मुखेल सचिवांक धडो शिकोवपाक जाय
व्हीसीच्या माध्यमान सुनावणेक हाजीर रावपाचे आदेश
पणजी : मुंबय उच्च न्यायालयाच्या कर्मचाऱ्यांची भरती आनी सेवा नेमांत केल्ल्या बदलांचे समर्थन केल्ले खातीर सर्वोच्च न्यायालयान गोंयच्या मुखेल सचिवांक उजरावन काडले. मुखेल सचिवांक धडो शिकोवपाक जाय अशें वक्तव्य करताना येता त्या 22 नोव्हेंबराक जावपी सुनावणेक व्हीसीच्या माध्यमान हाजेरी लावपाचे आदेश सर्वोच्च न्यायालयान दिल्यात.
न्यायमुर्ती अभय ओका आनी न्यायमुर्ती आगुस्तीन मसीह हांच्या पिठान हो आदेश दिला. मुंबय उच्च न्यायालय अधिकारी आनी कर्मचारी भरती नेम 2023 हे कायद्याक धरून नात. हे विशीं मुखेल सचिवांक प्रतिज्ञापत्र सादर करपाक सांगिल्लें. नेम दुरुस्त करपाची भुमिका मांडपा बदला मुखेल सचिवांनी नेमाचें समर्थन केलां. मुंबय उच्च न्यायालयाचे अधिकारी आनी कर्मचारी भरतीचे नेम मुंबय उच्च न्यायालयाच्या मुख्य न्यायाधिशांनी तयार केल्यात अशी भुमिका मुखेल सचिवांनी घेतल्या. मात नेम तयार करताना मुखेल न्यायाधिशांक विस्वासांत घेवंक ना. प्रतिज्ञापत्राक सर्वोच्च न्यायालयान हरकत घेतली.
हो गैरप्रकार आसा. प्रतिज्ञापत्रांत नेमात बदल करपाचे सुतोवाच करिनासताना मुखेल सचीव समर्थन करता. हे नेम फाटीं घेवपाची गरज आसा, अशें न्यायमुर्तींनी म्हणलां.
नेम फाटीं घेवपाची हमी प्रतिज्ञापत्रांत दिवपाचे सोडून मुखेल सचीव नेमांचें समर्थन करता. ही गजाल धपको दिवपी आसा. फुडले सुनावणे वेळार मुखेल सचिवांनी व्हीसीच्या माध्यमांतल्यान उपस्थिती लावून स्पश्टीकरण दिवचें, असो आदेश सर्वोच्च न्यायालयान दिला. शुक्रारा 22 नोव्हेंबराक फुडली सुनावणी जातली.
निवृत्त जावन सात वर्सां जावन लेगीत पेन्शन मेळना, ह्या निवेदानाचेर सर्वोच्च न्यायालयान स्वेच्छा याचिका दखल घेतली.
उच्च न्यायालयान तयार केल्ले सेवा नेम गोंय सरकारान बदल्ले. मुखेल न्यायाधिशांचो सल्लो घेनासताना मुखेल न्यायाधिशाच्या नांवान जारी केले, अशी बाजू कर्मचाऱ्यांच्या आदवोगादान मांडली. राज्य सरकाराच्या आदवोगादान वेळ मागलो. सुनावणी वेळार सॉलिसिटर जनरल तुषार मेहता हांणी वांटो घेतलो. कृतीचें हांव समर्थन करिना. थोडो वेळ दिवपाची गरज आसा. सगल्यो गजाली सारख्याे जातल्यो, अशें तांणी सांगलें.
सगल्यो गजाली सारक्यो जावपाक जाय. मुखेल सचिवांक धडो शिकोवपाची गरज आसा, अशें न्यायमुर्ती ओका हांणी म्हणलें. सेवा नेम मुंबय उच्च न्यायालयाच्या मुखेल न्यायाधिशांनी तयार केल्या, अशें रितीन ते कशे प्रसिद्द जाले, असो प्रस्न सर्वोच्च न्यायालयान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
