भांगरभूंय | प्रतिनिधी
नवी दिल्ली, खबरां संस्था ः सर्वोच्च न्यायालयाच्या वकिलांक खटल्यांची वळेरी तशेंच दाखल केल्ल्या प्रकरणांचो तपशील, त्या प्रकरणां विशीं म्हायती आतां व्हॉट्सॲपाचेर दितले अशें सरन्यायाधीश धनंजय चंद्रचूड हांणी जाहीर केलां.
स्वातंत्र्याच्या 75 व्या वर्सा सर्वोच्च न्यायालयाच्या आयटी सेवां वांगडाच व्हॉट्सअॅप संदेश सेवा सुरू करून न्याय घटमूट करपाचो नवो उपक्रम न्यायालयान सुरू केला, अशें न्या. चंद्रचूड हांणी सांगलें. आतां वकिलांक खटले दाखल करपा विशीं संदेश मेळटले. तशेंच ह्या उपक्रमांतल्यान ‘अॅडव्होकेट्स ऑन रेकॉर्ड’ आनी सर्वोच्च न्यायालयांत वैयक्तीक रितीन हाजीर आशिल्ल्या याचिकादारांक ऑनलायन दावे, याचिकांची वळेरी, आदेश आनी निर्णय हांचे संबंदी स्वयंचलीत संदेश मेळटले अशें न्या. चंद्रचूड हांणी सांगलें.
वेबसायटीचेर उपलब्ध आशिल्ले आदेश आनी निर्णय व्हॉट्सॲपा वरवीं धाडटले अशेंय तांणी सांगलें. ते खातीर सरन्यायाधीशान सर्वोच्च न्यायालयाचो अधिकृत व्हॉट्सॲप नंबरय शेअर केलो. केंद्रान ई- कोर्ट प्रकल्पा खातीर 7000 कोटी रुपयांची मंजुरी दिल्या अशीय म्हायती तांणी दिली.
ॲडव्होकेट जनरल तुषार मेहता हांणी ह्या निर्णयाक येवकार दिलो. देशाचे न्यायवेवस्थेंतले हें एक क्रांतीकारी पावल जावन आसा अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
