भांगरभूंय | प्रतिनिधी
नवी दिल्ली, खबरां संस्था : सर्वोच्च न्यायालयांत पयलेच खेप मुकबधीर वकील सारा सनी हिणें एके केशींत युक्तीवाद केलो. सरन्यायाधीश चंद्रचुड हांच्या खंडपीठान व्हर्च्युअल माध्यमा वरवीं सुनावणी केली. साराचे हावभाव समजून घेवन तिचे दुभाशी सौरभ राॅय चौधरी हांणी कोर्टा मुखार युक्तीवाद केलो.
ताचे पयलीं, न्यायालयाच्या नियंत्रण कक्षान सारा हिचो दुभाशी सौरभ हांकां पुराय सुनावणे वेळार तांचो व्हिडियो आॅन दवरपाक परवानगी दिवंक नाशिल्ली. पूण ते जे गतीन साराचे हावभाव समजून घेताले आनी ते न्यायालया मेरेन पावयताले, ताचे वयल्यान सारा कुरवांचे भाशेंत उलयता अशें दिसनाशिल्लें.
हे परिस्थितींत सॉलिसिटर जनरल तुषार मेहता हांचे सयत सुनावणे खातीर व्हर्चुअली वांटेकार जाल्ल्या सगल्यांक सौरभाक पळोवपाची उमळशीक आशिल्ली. उपरांत न्यायालयान सौरभ हांकां व्हिडियो आॅन करपाक परवानगी दिली. सुनावणी सोंपतकच सगल्यांनी सौरभ हांच्या कामाची तोखणाय केली.
सुनावणे उपरांत मिडिया कडेन उलयतना अॅड. सारा हांणी सौरभ आनी सरन्यायाधीश चंद्रचुड हांची तुस्त केली. तांणी सांगलें, सरन्यायाधीश मेकळ्या मनाचे मनीस. तांकांच लागून दिव्यांगांक नव्यो संदी निर्माण जाल्यात. ह्या केशीचे सुनावणे खातीर हांव थंय हजार नाशिल्लें. ताका लागून म्हजी वरिश्ठ संचिता हांणी केशीची व्हर्च्युअली सुनावणी करपाचीय वेवस्था केली. दिव्यांग पसून फाटल्यान नात, हें तांकां सिद्ध करपाचें आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
