भांगरभूंय | प्रतिनिधी
कसलीय गजाल एकदां हातांत घेतली काय ती सोंपयले बगर उठपाक जायना, अशें म्हणटात. विशयाचो सोक्षमोक्ष लावपाक जाय. ‘आरंभशूर’ खूब जाण आसतात. नेटान सुरवात करतात, मागीर खंयचे कडेन कांय ना. सर्वोच्च न्यायालयान मात बेवारशी सुण्यांचो प्रस्न जुलयांत हातांत घेतिल्लो तो अजून सोडूंक ना. ताका विशयाची फाटपुरवण अशेंय म्हणूं येता. तांणी 2- 3 फावटीं सुचोवण्यो, आदेश दिल्ले. मात ते पाळपाक सरकारां अपेशी थारल्यांत, अशें तांकां दिशिल्ल्यान काल परतून एकदां सर्वोच्च न्यायालयान तांचे कान पिळ्ळ्यात. हे खेपे इल्ले तिडकिनूच. सांगलां तितलें आठ सप्तकां भितर पुराय करचें, अशे निर्देश खंडपिठान दिल्यात. फुडली सुनावणी 13 जानेवारीक जातली. विशेश म्हणल्यार हें प्रकरण न्यायालयान स्वता (सु मोटो) घेवन सुनावणी केल्या. कारण देशांत सुणीं चाबपाच्यो घडणुको वाडल्यात, अशें न्यायालयाचें निरिक्षण.
न्यायालयान हे खेपे कडक निर्देश जाहीर केल्यात. शिक्षणीक संस्था, हाॅस्पिटलां, बस स्टॅण्ड, रेल्वे स्टेशनां, मैदानां आनी सरकारी कार्यालयां… हांच्या वाठारांतल्या बेवारशी सुण्यांक आसरो घरांत व्हरपाचो न्यायालयान आदेश दिला. आतां राज्यांच्या प्रशासनाचेर व्हडली जापसालदारकी येतली. आदल्या आदेशांक पाळो दिवंक नाशिल्ल्यान हालींच सगल्या मुख्य सचिवांक सुण्यांचो बंदोबस्त करपाचो परतून आदेश दिल्लो. मात तरीय ह्या कामाक कळाव जालो. सुणें धरतकच तांकां परतून त्याच जाग्यार सोडचे न्हय, सुण्याची नसबंदी करची अशें न्यायालयान सांगलां. राज्यांनी दोन म्हयन्यां भितर अहवाल सादर करूंक ना जाल्यार ताचे कडेन गंभीरपणान पळयतले, अशी शिटकावणीय तीन वांगड्यांच्या खंडपिठान
दिल्या.
सुण्यां विशींच्या आदेशा वांगडाच न्यायालयान म्हामार्गार हेडपी गोरवांक (आनी हेर जनावरांक) धरपाकूय सांगलां. ते खातीर सरकारान खाशेले म्हामार्ग पंगड स्थापन करपाचो आदेश दिला. मागीर हीं गोरवां गोशाळेंत व्हरपाचीय सुचोवणी केल्या. गोरवां, सुण्यां विशीं कागाळ करपाक हेल्पलायन क्रमांक सुरू करचे पडटले. हे सगले आदेश चालीक लावपाच्या कामाचेर मुख्य सचिवांक लक्ष दवरपाक सांगलां. नाजाल्यार कामाक जापसालदार आशिल्ल्या अधिकाऱ्यांचेर कारवाय जातली, अशेंय न्यायालयान स्पश्ट केलां.
आमच्या गोंयांतूय गोरवां आनी सुण्यांचो उपद्रव जाता. तांकां लागून लोकांक त्रास, मनस्तापूय जाला. सुण्यांक भौशीक जाग्यार खावपाक घालपा बदला फिडींग स्पाॅट करपाक सांगिल्लें. चडश्या राज्यांनी ते करूंक नात. गोंयांतल्या स्वराज्य संस्थांनी जागे पळोवन दवरल्यात आसतले. कारण तश्यो घोशणा जाल्यात. मात सुण्यांक खावंक घालतना शक्यतो हरवें मांस घालपाक जायना. कारण तीं मागीर आक्रमक जातात आनी भूक लागली काय लोकांचेर हल्लो करपाची भिरांत आसता. देशभरांत बेवारशी सुण्यांच्यो समस्या वाडत आसात, ताका लागून न्यायालयाचो हो निर्णय ह्या प्रस्ना कडेन गंभीरपणान पळोवपाचो संकेत दिता.
सुरक्षा, भौशीक भलायकी, प्राणी कल्याण हाची संतुळा सादपाचेर न्यायालयान भर दिला. सुण्यांकूय भावना आसतात, हें मतींत दवरुनच हो विशय आतां एकदाचो सोंपोवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
