भांगरभूंय | प्रतिनिधी
पणजी : जीडीपी फावंडेशनाचे किशोर शहा हांच्या ‘सर्फिंग ग्रे वेव्ह’ ह्या पुस्तकाचें हालींच प्रकाशन जालें. हातूंत गोंयच्या २ हजार ज्येश्ठ नागरिकांचें सर्वेक्षण केलां. पुस्तकांतले म्हायतीचो वापर निती आयोगा वतीन केंद्रीय धोरण थारावपाक करतले. ही आमचे खातीर अभिमानाची गजाल आशिल्ल्याचें मुख्यमंत्री डॉ. प्रमोद सावंत हांणी सांगलें. मंगळारा मंत्रालयांत जाल्ले पुस्तक प्रकाशन कार्यावळींत ते उलयताले. ह्या वेळार शिक्षण सचीव प्रसाद लोलयेंकार, प्रमोद खेरा आनी हेर अधिकारी हजर आशिल्ले.
वाडत वचपी पिरायेचो विचार करतना जायते फावट वैजकी समस्यांचो विचार करतात. ज्येश्ठ नागरीक सदांच दुसर्यांचेर निंबून आसात असोय विचार जाता. मात ह्या पुस्तकांत वेगळो विचार मांडपाचो यत्न केला. पुस्तकांत ज्येश्ठ नागरिकांच्या कल्पनांचो वापर करून तांची उदरगत कशी करूं येता हाचेर भर दितले.तशेंच ज्येश्ठ नागरिकांक मनीसबळ म्हणून कशें वापरपाक शकता, हे विशींच्यो कल्पना मांडल्या, अशें मुख्यमंत्र्यान सांगलें.
हें पुस्तक देशांतल्या तशेंच संवसारभरच्या ज्येश्ठ नागरिकां खातीर उपेगी थारतलें. उच्चन शिक्षण संचालनालयान जीडीपी फावंडेशना वांगडा सामंजस्य करार केला. ह्या पुस्तका खातीर गोंयच्या चार महाविद्यालयांच्या शंभर विद्यार्थ्यांनी नमुनो सर्वेक्षण केल्लें. हातूंत खांडोळा, बोर्डाचीं सरकारी महाविद्यालय तशेंच विद्या प्रबोधिनी आनी एमईएस महाविद्यालयांचो आसपाव आसा. विद्यार्थ्यांनी खरपणान सर्वेक्षण केल्ल्यान हातुंतल्यान मेळिल्ले म्हायती वरवीं शहा हांका पुस्तक बरोवप शक्य जालां.
लेखक किशोर शहा हांणी सांगलें, वार्धक्याचेर अप्लायड रिसर्च पद्धतीन बरयिल्लें हें देशांतलें पयलें पुस्तक. भारतांतली कांय प्रमाणांतली लोकसंख्या वार्धक्याकडेन झुकता. मात हे विशीं जाय तसो अभ्यास जावंक ना.
हे खातीरूच आमकां हें पुस्तक करचें कशें दिसलें. राज्यांतल्या शंभर विद्यार्थ्यांनी दोन वर्सां सर्वेक्षण करून ही म्हायती एकठांय केल्या. हें पुस्तक एक आदर्श थारतलें अशें तांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
