भांगरभूंय | प्रतिनिधी
अस्तुरी कार्यावळींचें उक्तावण
पणजी : येस मेळोवपाक शॉर्टकट वा गुरुकिल्ली ना. आयच्या ह्या सर्तींच्या काळांत खंयच्याच मळार कश्ट केले बगर पर्याय ना अशें मत अभिनेती वर्षा उसगांवकार हांणी उक्तायलें. गोवा चेंबर ऑफ कॉमर्स अँड इंडस्ट्री (जीसीसीआय) वतीन शेनवारा आयोजीत केल्ल्या अस्तुरी कार्यावळीच्या उक्तावण सुवाळ्यांत ती उलयताली. ह्या वेळार संघटनेची अध्यक्ष प्रतिमा धोंड, एमएसएमई संचालक एम के मीना, सँड्रा फर्नांडीस, संजय आमोणकार आनी हेर पदाधिकारी हाजीर आशिल्ले.
वर्षा उसगांवकार हांणी सांगलें, वेवसाय वा हेर खंयच्याय मळार करिअर करपी बायलांक कश्ट करचे पडटात. घरांतल्यान चेंपण आसून लेगीत बायलो मुखार येवन आपले करिअर फुडें व्हरतात ही बरी गजाल. आयच्या बायलांक वेवसायाचे जायते पर्याय उपलब्ध आसात. हाचो फायदो तांणी घेवचो. जीसीसीआय सारकिल्ल्यो संस्था तांकां मार्गदर्शन करपाक तयार आसात. जायते फावट योग्य मार्गदर्शन गरजेचें आसता. संघटनात्मक भावना घेवन काम केल्यार निश्चीत येस मेळटलें.
जीसीसीआयन ही कार्यावळ घडोवन हाडून गोंयच्या दरेक कोनशांतल्या बायलां उद्देजकांक माची दिला. जीसीसीआय फकत व्हड उद्देगांक न्हय तर सामान्य बायलांकय मजत करता. बायलां उद्देजकांनी पयशां वांगडा लोकांकूय जोडपाक जाय. उद्देजक जाली तरी सगल्यांनी समाजा कडेन आनी पर्यावरणा कडेन आपली जापसालदारकी पाळप गरजेचें आसा अशेंय वर्षा उसगांवकार हांणी सांगलें.
3 वर्सांत 85 लाख मजत
एमएसएमए खात्याचें संचालक एम के मीना हांणी सांगलें, खात्या वतीन बायलां स्वयंसहाय्यता गटांक मजत करता. फाटल्या तीन वर्सांत हांगा स्टॉल उबारपी 275 गटांक 85 लाख रुपया निधी दिला. अंदूं 26 स्वयंसहाय्यता गटांक 10 लाख रुपया दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
