भांगरभूंय | प्रतिनिधी
खबरां संस्था
तिरुअनंतपुरमः भारतीय क्रिकेट पंगड आतां सराव मॅची खेळनास्तना वन-डे वर्ल्ड कपांत खेळटलो. तिरुअनंतपुरांत मंगळारा ताची दुसरी सराव मॅच पावसाक लागून रद्द करची पडली. ताचे पयलीं 30 सप्टेंबराक गुवाहाटींत इंग्लंडा आडची सराव मॅच पावसाक लागून रद्द करची पडल्ली. भारत 8 ऑक्टोबराक ऑस्ट्रेलिये आड वर्ल्ड कपांतली पयली मॅच चेन्नयच्या एम ए चिदंबरम स्टेडियमाचेर खेळटलो.
गुवाहाटी आनी तिरुअनंतपुरांतले क्रिकेट मोगींक वर्ल्ड कपा पयलीं भारतीय पंगडाक खेळटना पळोवपाची उमळशीक आशिल्ली. पूण पावसान तें जावपाक दिलें ना. गुवाहाटींत टॉस जाल्लो पूण तिरुअनंतपुरांत तेय जालें ना. भारतीय पंगड 14 ऑक्टोबराक अमहदाबादांत पाकिस्ताना आड खेळटलो. भारत तिसरे फावट वन-डे चॅम्पियन जावपाचो यत्न करतलो. हाचे पयलीं 1983 आनी 2011 वर्सा भारतान वर्ल्ड कप जिखल्लो.
अंदूच्या भारतांत जावपी वर्ल्ड कपाच्यो मॅची 10 शारांनी जातल्यो. हैदराबाद, अहमदाबाद, धरमशाला, दिल्ली, चेन्नय, लखनौ, पुणे, बंगळुरू, मुंबय आनी कोलकाता हांगा मॅची जातल्यो. वर्ल्ड कपांत वट्ट 10 पंगड वांटेकार जाल्यात. ही सर्त रावंड रॉबीन पद्दतीन जातली. 10तले चार पंगड सेमीफायनलींत पावतले. पोरूं इंग्लंडांत ह्या फॉरमेटांत ही सर्त जाल्ली. न्यूझिलंडाक हारोवन इंग्लंड पंगड चॅम्पिय़न जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
