भांगरभूंय | प्रतिनिधी
सद्याक गोंयचें मणिपूर करतलेच म्हणपाचो कोणेतरी सोपूत घेतला आसूंक जाय. देखून कांय जाण गोंयचें गोंयकारपण ना
करूंक मुखार सरल्यात. आतां हें सगळें 2024 च्या वेंचणुकां खातीर चल्लां काय आनीक वेगळो उद्देश आसा तें कळपाक इल्लो वेळ वतलो. पूण, तो मेरेन गोंय आनी गोंयकारांचें जें लुकसाण जातलें तें सहजपणान भरून येवचें काय दिसता. देखून आतां गोंयकारांनी सांबाळून पावल घालप गरजेचें.
सद्याक लोक खूब भावूक जाल्यात आनी इल्ल्या इल्ल्या कारणाक लागून रस्त्यार येवंक लागल्यात. कोणाचोच सरकारचेर वा वेवस्थेचेर विश्वास उरूंक ना, अशें दिसूंक लागलां. सुरवात जाली ती कळंगुटे उबारिल्ल्या शिवरायांच्या पुतळ्या वेल्यान. पुतळो उबारीसर कोण कांयच उलयलो ना. आनी कांय दीस वतकूच पंचायतीन बेकायदा म्हणून तो पुतळो काडपाची नोटीस दिली. खरें म्हणल्यार पुतळो उबारप्यांनी कायद्यान झगडूं येतालें, पूण ना. लोक रस्त्यार आयले, पंचायतीचेर झुडून गेले. सरपंचाक माफी मागची पडली. सरपंचान माफी मागली खरी पूण जें कितें बेकायदेशीर म्हणिल्लें तें कायदेशीर जालें? ना. मागीर उपयोग कितें जालो?
हो धुल्ल जमनीर बसता म्हणल्यार वास्कोचे एके इगर्जेंत फादर बोलमेक्सान शिवाजी महाराजांचेर कितेंतरी वक्तव्य केलें आनी लोक कळंगूट विसरले. फादराचेर कितल्या तरी पुलीस स्टेशनांचेर कागाळी दिले उपरांत फादराक अटक करची म्हणून परत एकदां लोक रस्त्यार आयले. पुलीस आपणालें काम सारकें करतात काय ना तें पळे नासतना वा तांकां कारवाय करपाचो वेळ दिनासतना लोक उचंबळ जाल्लेवरी वागले. तशें पळोवंक गेल्यार फादरान जें कितें म्हणलें ताचेर दुर्लक्ष करूंक जातालें. शिवाजी महाराज देव काय राष्ट्रपुरूष इतलोच दुबाव आसलो न्ही ताका? ताका बरे तरेन जाप दिवंक जाताली. गोंयचे पयले मुख्यमंत्री भाऊसाहेब बांदोडकार हांकां देव मानपी आनी घरच्या देवाकुडींत तांचो फोटो लावपी लोक आमी पळेल्यात. मागीर शिवाजी महाराजांक देव मानलो तर अजाप कसलें? दर एकाची श्रद्धा आसता आनी तो ते तरेन वागता. फादराक इतलेंच सांगल्यार पुरो आसलें. तें सांगचें सोडून आमच्या लोकांनी फादराक इतली प्रसिद्धी दिली कीं बोलमेक्स नांवांचो फादर गोंयचे खंयचे तरी इगर्जेंत आसा म्हणपाचें खबर नाशिल्ल्यांक कळ्ळें. सामकी जगभर प्रसिद्धी मेळ्ळी ताका.
हांगां एक प्रश्न पडले बगर रावना, तो म्हणल्यार फादरान इगर्जेंत जो शेर्मांव सांगलो तो थंय जमिल्ल्या लोकांक. ताचो व्हिडियो कोणे काडलो आनी तो समाज माध्यमांचेर कोणे घालो आनी कित्याक? थंय काय कोण हिंदू नासलो. म्हणटकूच कोणाक तरी लोकांक चाळोवन घालचे आसलें काय फादराक बुद्द शिकोवची आसली? कोण आसलो हाचे फाटल्यान? हाची सारकी बरी चवकशी जावंक जाय. म्हणटकूच फादराचे तकलेंत हो विशय कोणें आनी कित्याक घालो तें कळटलें. आनी कोणाक गोंयांत अस्थिरताय निर्मुचली आसा तेंय समजतलें.
आतां एक गजाल मानची पडटली ती म्हणल्यार फादर बोलमेक्साक गोंयचो सायब पावलो. आतां ताका गोंयचो सायब मानचो काय ना हेंय दर एकल्यान थारावचें, पूण तो फादराक पावलो हें सत. फादर कोर्टांत जामिना खातीर भोंवतालो तेन्नाच भाणस्तारी भिरांकूळ अपघात घडलो आनी लोकांचे लक्ष थंय गेलें. फादराक अटक करात म्हणून पुलीस स्टेशनाचेर मोर्चा काडटाले त्या जाग्यार अपघात करतल्याक अटक करात म्हणून मोर्चा येवंक लागले. ड्रायव्हर तो काय ती, हाचेरूय वाद जालो आनी बोलमेक्साक लोक विसरले. म्हणटकूच ताका गोंयचो सायब पावलो म्हणचें पडलें ना?
आतां अपघाताचोय विशय फाटीं पडला काय दिसता. तशी आमची याद सामकी उणी. आज कितें घडलां तें आमी फाल्यां विसरतात. आयचो विशय फाल्यां पोरणो जाता. कांय दीस पियेवन गाडयो चलोवप्यां आड कारवाय केली. पूण अपघात उणे जाले? ना. भाणस्तारी वरीच वास्को आनी दिवचले अपघात जाले. कांय गाडयांचें लुकसाण जालें आनी एक बायल मेली. खंय गेले हे मोर्चा काडपी समाज सेवक? कोणेंच एक उतर काडिल्लें आयकूंक ना. फकत व्हडली गाडी आनी पयशेंकार पात्रांव आसता थंयच हे समाज सेवक वतात काय? काय गोंयकारांक एक न्याय आनी भायल्यांक दुसरो? भाणस्तारी लायला तोच न्याय हेर कडल्या अपघातांक लावंक जाय न्हय? पूण भाणस्तारी सोडल्यार हेरकडेन सामकी सामसूम.
आतां तर सगळे विशय पोरणे जाल्यात आनी नवो विशय आमचे मुखार उबो रावला. शिवरायांच्या पुतळो कोणेतरी फोडलो. आतां तरी तें बेब्द्याचें काम म्हणून कळटा. तरी हाचे फाटल्यान आनीक कोण ना मूं म्हणपाचो दुबाव येता. शेजराच जाचें दुकान आसा तो अशें करतलो? आपूण जें कितें करतां ताचे परिणाम कितें जातले हाची जाण ताका आसचिना? कोण आसा ह्या सगळ्यां फाटल्यान? हाची सारकी बरी चवकशी जावंक जाय. ओगीच कोणाक तरी बोकडो करून धरचो न्हय. महाराष्ट्रांत आजवेर हें चलतालें. कोणतरी आंबेडकरांच्या पुतळ्याची मोडतोड करतालो आनी थंय दंगल जाताली. आतां गोंयांत शिवाजी महाराज्याच्या पुतळ्या वेल्यान दुही माजना न्ही? ओगीच महाराज बदनाम जावचे न्ही हाची जतनाय घेवप गरजेचें.
आमकां वाद घालूंक निमित्त पुरो. 15 आगस्टाक दवर्ले लायिल्ल्या एका पोस्टराक लागून वाद निर्माण केलो. पोस्टराचेर आशिल्ल्या खान अब्दुल गफार खानाच्या फोटवाक पाकिस्तानी फुडारी म्हणून कोणेतरी विरोध केलो. ह्या शेंकड्यांतलो विनोद म्हणपाचो हाका? सरहद्द गांधी जर पाकिस्तानी फुडारी जाल्यार हिंदुस्तानी फुडारी कोण? तुमच्या राजकारणाक लागून इतिहास बदलूं नाकात रे शाण्यांनो.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
