भांगरभूंय | प्रतिनिधी
० आयतारा 10 सप्टेंबराक सकाळीं 9.30 ते दनपारां 1 मेरेन श्री वीरविठ्ठल मंदिराच्या मार्डीकट्टा हांगा लायन्स क्लब ऑफ रावणफोंड, मडगांव आनी श्री वीरविठ्ठल नवयुवक संघ, कुंकळ्ळी हांच्या सहकार्यान आनी आयुरस्पर्श क्लिनिक मडगांवच्या सौजन्यान मुफत गोडेंमूत शिबिर आयोजीत केला.
० निज श्रावणी मंगळारा निमतान 12 सप्टेंबराक साळांतल्या श्री महादेव भूमिका देवस्थानाच्या श्री भूमिका मंदिरांत वेगवेगळ्या कार्यावळी सयत भौशीक सत्यनारायण महापुजेचें आयोजन केला.
० बिल्वदल कुटुंबा वतीन आयतारा 10 सप्टेंबराक सांजवेळार 3.30 वरांचेर विठ्ठलापूर सांखळेंच्या घनःश्याम शास्त्री जावडेकर स्मृती शास्त्री सभाघरांत ‘काव्यनुभूती’ कवी संमेलन घडोवन हाडलां. हातूंत गोंयचे कवी वांटो घेतले. इत्सूक कवींनी संजय पाटील 9922952561 हांचे कडेन संपर्क करचो.
० 9 सप्टेंबराक श्रावणी शेनवारा निमतान हनुमान देवस्थान मुरमुणे हांगा गायन कार्यावळ घडोवन हाडल्या.
० भगवद् गीता, भागवतम आनी हरे कृष्ण महामंत्र जप करपाक समर्पित आशिल्ली आंतरराष्ट्रीय कृष्णभावनामृत संघ (इस्कॉन) प्रेरीत भक्तिकुटिर तुळशीमाळा पर्ये सांखळें वतीन श्री कृष्ण जन्मोत्सव उत्सव शेनवारा 16 सप्टेंबराक आयोजीत केला.
० जैवविविधताय समिती कुळें शिंगाव आनी ग्रामपंचायत कुळें शिगांव हांच्या जोड पालवान 11 सप्टेंबराक रानभाजयो महोत्सवाचें आयोजन केलां. हो महोत्सव सरकारी हायस्कूल शिगांव हांगा सकाळीं 10 ते दनपरां 1 वरां मेरेन आयोजीत केला.
० श्रावणी शेनवार 9 सप्टेंबराक श्री बाल मारुती देवस्थान मड्डी होडार कुडचडे हांगा जायांची पुजा आयोजीत केला. त्या निमतान अभिषेक, आरती, तीर्थ प्रसाद आनी भजनाची कार्यावळ जातली.
० प्रियोळ – म्हाड्डोळच्या बेताळ देवळांत ९ सप्टेंबराक वर्सुकी पुजा. सांजवेळा 7 वरांचेर गायिका प्रचला आमोणकार हिची अभंग आनी भक्तिगीतांची कार्यावळ.
० गणपत पार्सेकार कॉलेजीच्या पालक- शिक्षक संघाची बसका शेनवार 9 सप्टेंबराक सकाळीं 11.30 वरांचेर महाविद्यालयाच्या ज्ञानदा हॉलांत जातली. ह्या वेळार पालक- शिक्षक समिती वतीन दोन विद्यार्थ्यांचो भोवमान करतले.
० कुशळटाय विकास आनी उद्देजकताय संचालनालयान 11 सप्टेंबर दिसा पेडणेंच्या सरकारी आयटीआय केंद्रांत प्रधानमंत्री राष्ट्रीय अप्रेंटीसशीप मेळावो आयोजीत केला. ह्या मेळाव्यांत भौशीक आनी खाजगी आस्थापनां वांटेकार जातलीं. अप्रेंटीसशीप कायदो 1961 खाला अप्रेंटीस म्हूण उमेदवारांची भरती करतले. इत्सूक आयटीआय प्रशिक्षणार्थी आनी हेर थळाव्या युवकांनी नांवनोंदणी करपा खातीर सकाळीं 10 वरांचेर मेळाव्याच्या थळार हाजीर रावचें. चड म्हायती खातीर पेडणेंच्या सरकारी आयटीआय केंद्रांत- 0832-2954341 / 9923144341 ह्या फोन क्रमांकाचेर संपर्क करचो.
० भूमि प्रकाशन सावर्शे आनी गोंय कोंकणी अकादेमीच्या सहकारान शेनवारा 9 सप्टेंबराक सांजेच्या 4 वरांचेर लेखक, अभिनेते, शिक्षक अनिल नायक हांचें ‘रामायण – म्हजें कल्पनेंतल्यान’ हें पुस्तक हरवळें- सांखळेच्या शिवस्मृती खेडेकर हॉलांत उजवाडाक येतलें.
० नाट्य कला महाविद्यालय संघटने खाला कोंकणी नाटक संगीत अकादमी आनी कला अकादमी 9 सप्टेंबराक फोंडेंत नाटक वाचन आनी रंगचर्चा रुपांत ‘नाट्यरंगमंथन’ कार्यावळ घडोवन हाडल्या.
० म्हायती आनी प्रसिद्धी खात्याची वर्सुकीं श्रीसत्यनारायण म्हापूजा शेनवारा 9 सप्टेंबराक जातली. दरवर्सा श्रावणांत मनरिजवण क्लबा वतीन ती जाता. सकाळीं 9 वरांचेर धर्मीक विधीक सुरूवात जातली. उपरांत आरती, भजन आनी तिर्थप्रसाद जातलो.
० सेवा मंच गोवा बहुउद्देशीय पतसंस्थेची वर्सुकी बसका आयतारा १० सप्टेंबराक सकाळीं १० वरांचेर फोंडेंच्या थ्रिफ्ट संस्थेच्या सभाघरांत जातली. ह्या वेळार विवीध विशयांचेर चर्चा जातली. हे बसकेक वांगड्यांनी हाजीर रावपाचो उलो संस्थेचे अध्यक्ष रोहिदास सतरकार हांणी दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
