भांगरभूंय | प्रतिनिधी
सरफराज खान आनी ऋषभ पंत हांणी काल शेनवारा हांगाच्या एम चिन्नास्वामी स्टेडियमाचेर जें केंलें, ताणें 2001 कोलकाता टॅस्टींत राहुल द्रविड आनी व्ही व्ही एस लक्ष्मणान केल्ले भागिदारीची याद करून दिली. पूण, दोगांयचें हें अद्भूत धाडस भारताक पयले टॅस्टींत मेळोवपाक शकतलें काय ना हें पांचव्या दिसा कळटलें. सरफराजाच्या 150 आनी पंताच्या 99 धांवड्यां नेटार भारतान न्युझिलॅण्डान घेतिल्ली 356 धांवड्यांची आघाडी पुसून उडोवपाक येस मेळयलें. पूण, तरी आसतना न्युझिलॅण्डाक जैता खातीर फकत 107 धांवड्यांची गरज आसा.
आमी कशेच हार मानचे नात असो सोपून घेवनूच सरफराज आनी पंत हांणी काल सकाळीं मैदानांत पांय दवरिल्लो. दोगूय आपलेआपले शैलींत बॅटींग करीत गेले. तांची ही बॅटींग पळोवन न्युझिलॅण्डाच्या बॉलरांक घाम आयलो. सरफराज रोखडोच आपले पयले टॅस्टीच्या लागसार पावलो. दुसरे वटेन पंतान आपले जबरदस्त डिफॅन्साची झलक दाखयली. पयलीं दोगां मदीं शेंकड्याची भागिदारी जाली. उपरांत ही भागिदारी रोखडीच 150ची जाली. दोगांयनी भारताक आघाडी लेगीत मेळोवन दिली. पूण, न्युझिलॅण्डा कडेन ट्रम्प कार्ड आशिल्लें, ते म्हणल्यार दुसरो नवो बॉल.
80 ओव्हरी सोंपल्या उपरांत न्युझिलॅण्डाचो मुखेली टॉम लॅथमान रोखडोच नवो बॉल घेतलो. टिम सावथीन नव्या बॉलान जबरदस्त आवट स्विंग करपाक सुरवात केली. हांगाच्या सरफराज धडपडपाक लागलो. पूण, कसोबसो तो 150 मेरेन पावलो. सरफराज फास्ट बॉलरांक फ्रण्ट फुटाचेर येवन खेळना हें सावथीन समजून घेतिल्लें. ताणें आपली रणनिती तयार केली. चवथ्या स्टम्पाचेर एक फुलर बॉल घालो. हो बॉल खूब फुडें आशिल्लो की सरफराजाक तो कव्हरा वयल्यान मारपाक जमलो ना. बॉल थेट कव्हरांत उबो आशिल्ल्या फिल्डराच्या हातांत गेलो. दुसरे वटेन पंत बरे तरेन बॉलरांक तोंड दितालो. ताणें सावथीचे एके ओव्हरींत सको लेगीत मारिल्लो. तो आतां 90त पाविल्लो.
दुसरो फास्ट बॉलर विलियम ओरुर्कान आपले उंचायेचो बरो फायदो करून घेतलो. ताणें पंताक बोल्ड केलो. ते उपरांत ताणें फुडले ओव्हरींत लोकेश राहुलाक लेगीत बाद केलो. कांय वेळान रवींद्र जडेजाक लेगीत तंबूंत धाडलो. दुसरे वटेच्यान आर आश्विन फकत उबो आशिल्लो. ताणें कशीबशी आघाडी शंबराच्या वयर व्हेली. भारताचो दुसरो डाव 462 धांवड्यांचेर सोंपलो.
न्युझिलॅण्डान बॅटिंगेक आयलो त्या वेळार जसप्रीत बुमरान तिसऱ्या बॉलाचेर एलबीडब्ल्यूची संद तयार केली. पूण, अंपायरान नाबाद दिलो. भारतान रिव्ह्यू लेगीत घेतलो. पूण, ताचो लेगीत कांय फायदो जालो ना. ते उपरांत उण्या उजवाडाक लागून खेळ थांबयलो आनी पावसान लेगीत हाजेरी लायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
