भांगरभूंय | प्रतिनिधी
चोर भायले काय थळावे तें सोदून काडपाची गरज आसा. बेकार आशिल्ल्यान ते चोरयो करपाचो मार्ग निवडटात काय? हाची जाप ’हय’ आसली जाल्यार सरकारान बेकारीचो प्रस्न सोडोवपाची गरज आसा.
राज्यांत कायदो आनी सुवेवस्था पाड पडल्या म्हूण विरोधक सदांच बोवाळ घालतात. कसलेय गजालीचेर विरोधांत प्रतिक्रिया दिवपाचें हें विरोधकांचें काम. तांकां राजकारणा खातीर तशें करचें पडटा. पूण राजकारणा कडेन संबंद नाशिल्ल्या लोकांनी सगळ्यो बाजू पळोवप गरजेच्यो. सरकार बरें काम करता, जाल्यार सरकाराक शाबासकी दिवंकच जाय. तातूंतल्यान ते बरें काम करतात हाचो तांकां अभिमान जातलो आनी तांच्या हातांतल्यान आनीक बरें काम घडटलें. पूण चुकले जाल्यार लोकांच्या प्रतिक्रियांचो आदर तांणी करपाक जाय. आवाज काडटल्यां आड तांचे समर्थक समाज माध्यमांचेर जर ‘घांस’ मारपाक लायले जाल्यार चुको सुदारच्यो नात.
समाजमाध्यमांचेर पयर एक व्हीडीओ पळयलो. पर्रा वांठारांत एक महिला चलत वता आनी मुखारल्यान मोटारसायकलीचेर येवपी दोग जाण तिच्या गळ्यांतली सरपळी झोमून व्हरतात. हे लटाफटींत ती बाबडी रस्त्यार पडटा. पूण ह्या चोरांक कसलोच चुरको येना. ते जें लक्ष्य घेवन रस्त्यार भोंवताले तें पुराय जालां. तांच्या पॅत्रॉलाचे पयशे सरपळी फारावन भरले. ते महिलेक मात लुकसाण जालां. आयज भांगर घेवंक एका पवनाक सुमार 80 हजार रुपया मोडचे पडटात. म्हणल्यार म्हयन्याक 9 ते 10 हजार जोडपी महिलेक एक पवन करपाक एक वर्स लागतलें आनी चोरांक एका खिणाक बॉल्सांत लाखांनी रुपया घालपाची संद आयती मेळटा.
हे विशीं सरकाराक प्रस्न केल्यार तें म्हणटलें की आमी चोरांक धरून चोरिल्लें भांगर जप्त करतात. पूण अश्यो कितल्योश्योच केशी आसतल्यो ज्यो नोंदूच करून घेवंक नात. ‘तें भांगर गेलें’ अशें सांगून कागाळ करपाक आयिल्ले महिलेक परत धाडपाच्यो घडणुको घडल्यात. एक तर आमच्या महिलांक सुरक्षा दिवंक हे नापास जाल्यात आनी तातूंत अन्याय जातकच न्याय दिवपाक लेगीत.
दर वर्साक गळ्यांतल्यो सरपळ्यो चोरून व्हरपाच्यो घडणुको घडटात. पूण आमचीं पुलीस यंत्रणां कश्शीच सुदारना. चोर तांच्या परस चड हुशार जाल्यात आनी पुलिसांच्यो गाडयो चोरां फाटल्यान धांवपाक कमी पडल्यात. दुकानाचेर काम करपी बायलो, वाटेर भाजयो-फळां विकपी महिला, रस्त्या वयल्यान चलून वचपी महिला, अशा कितल्याशाच बायलांचेर हो अन्याय जाला. पूण आजून मेरेन हे प्रकार बंद जायनात.
गोंय पुलिसांचें पॅट्रोलिंग सारकें जायना हें राज्यांत वाडिल्ल्या चोरयो आनी हेर गुन्यांवां वयल्यान सिद्ध जाता. रातच्या वेळार नाकाबंदी आसनात, पुलिसांच्यो गाडयो भोंवनात, हे खातीर चोरांक चोरयो करपाक धाडस मेळटा. नाजाल्यार एक तर फाटीं जसो एक पुलीस चोरां वांगडा काम करतना सांपडला, तशे आनीकय आसूंक शकतात. अमूक वाठारांत खंयचो दुबावीत चोरयो करपाक शकता हाचो अदमास पुलिसांक आसना जाल्यार कसली यंत्रणा तर ती? दुबावितांचेर नदर दवरपा इतलीय ताकद पुलिसां मदीं ना काय? काय सगळें खबर आसून लेगीत ते ओग्गी रावतात?
गोंयांत चोरयो कित्याक वाडटात हाचें कारण सोदून काडपाची गरज आसा. चोर भायले काय थळावे तें सोदून काडपाची गरज आसा. बेकार आशिल्ल्यान ते चोरयो करपाचो मार्ग निवडटात काय? हाची जाप ’हय’ आसली जाल्यार सरकारान बेकारीचो प्रस्न सोडोवपाची गरज आसा. आमचे कितलेशेच तरणाटे आयज घुंवळी वखदांच्या भकीक पडटात. घुंवळी वखदां विकतात. घुंवळे वखदां घेतात. बेकार आशिल्ले तरणाटे घुंवळे वखदांच्या भकीक पडले जाल्यार ते हे नशेंत पयशे मेळोवपा खातीर कसलेंय पावल मारपाक शकतात. ताचें भान सरकाराक आसपाक जाय. घरांचीं घरां उध्वस्त जावपा पासून वाटोवपा खातीर पयलींच यत्न जावंक जाय. नाजाल्यार महिलांच्या गळ्यांतल्यो भांगराच्यो सरपळ्यो चोरपाचे प्रकार अशेच वाडत रावतले. ह्या महिलांचे स्राप चोरां बरोबर सरकाराकूय लागतले. ’गृह आदार’ दिता म्हूण ते विरगळून वचचे नात…
संजय बोरकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
