भांगरभूंय | प्रतिनिधी
मडगांव: रुमडामळ दवर्ले सरपंच पदा खातीर सोमारा वेंचणूक जावपाची आशिल्ली. पूण एक वेंचणूक अधिकारी हॉस्पिटलांत आशिल्ल्यान आनी दुसऱ्याक जीवाक बरें दिसनाशिल्ल्यान येवंक ना. हाका लागून वेंचणूक फुडें धुकलल्या अशी म्हायती बीडीओ आदर्श देसाय हांणी पंचांक दिली.
बेकायदेशीर बांदकाम प्रकरणांत रुमडामळ- दवर्ले पंचायतीच्या चार पंच वांगड्यांक साश्टी गट उदरगत अधिकाऱ्यान अपात्र थारायल्ले. ह्या आदेशाचेर दक्षीण गोंय जिल्लो सत्र न्यायालयान स्थगिती दिली. फुडली सुनावणी 16 ऑगस्टाक जातली. ताचे आदीं सरपंच पदाची वेंचणूक जावपाची आशिल्ल्यान पंच वांगड्यांक तातूंत मतदानाचो हक्क वापरपाक मेळटा आशिल्लो. देखून सोमारा सकाळीं एक पंच सोडून हेर पंच हाजीर आशिल्ले. सरपंच पदाचेर अर्ज करपाचो वेळ सकाळीं 10:30 ते 11 मेरेन आशिल्लो.
पूण ह्या वेळार वेंचणूक निर्णय अधिकारी पंचायतींत हाजीर रावूंक ना. सकाळीं 11:30 वरांचेर गट उदरगत अधिकारी आदर्श देसाय पंचायतींत पावले. वेंचणूक निर्णय अधिकारी धाकलू घाडी दुयेंसाक लागून हॉस्पिटलांत आसा आनी तांचे सुवातेर नेमिल्लो वेंचणूक निर्णय अधिकारीय दुयेंत आशिल्ल्याची म्हायती तांणी दिली. आतां वेंचणुकेच्या वेळापत्रका प्रमाण गरजेचो काळ सोंपला म्हणून वेंचणूक फुडें धुकलल्या अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
