भांगरभूंय | प्रतिनिधी
सरपंचा सयत पंचांनी तांणी केल्ल्या कामाचें प्रगतीपुस्तक तयार करचें असो तांकां आदेश दिवचो. तें दरेके ग्रामसभे मुखार पंचायतींनी दवरचें.
गांवांनी आशिल्ल्या पंचायतींक स्वराज्य संस्था अशें म्हणटात. गांवांतल्या उदरगतीक तांचें व्हडलें योगदान आसपाक जाय, अशें कायदो सांगता. पंचायतींत निवडून आयिल्या पंचानी, सरपंचा सयत, गावांत उदरगत करपाकुच जाय. तें जावन आसा तांचें व्हडलें काम. पूण, जेन्ना गांवांत आमी पावल दवरतात, तेन्ना थंयचें चित्र आमकां निर्शेणी हाडटा. ते गांव कितल्याशाच समस्यांचे ‘माहेरघर’ जावन आसा, अशें दिसता. हाचें कारण कितें तें सरकारान सोदून काडपाक नाका?
हें मात सामकें खरे, ते म्हणल्यार, गोंयांतल्यो थोड्यो पंचायती गरीब आसात. तांची येणावळ कमी आसा. म्हूण, सरकारान सगळ्यांकूच अनुदान दिवपाचें थारायलें. आनी तें दिवपाकुय लागलें. ही बरी गजाल. ताचे बरोबर, सरपंचा सयत पंचाकुय मानधन दिवपाक सरकारान कोमेस केलें, हीय जावन आशिल्ली बरी गजाल. पंचायतींतल्या सगळ्यांकूच खुश दवरपाचें सरकारालें काम एकदम तोखणाय करपा सारकेंच आसा अशें म्हाका तरीं दिसता. पूण, इतलें करूनूय गांवांत विकास जाल्लो दिश्टी पडना. तो सोदपाक गेल्यार दिसना. तो जायच ना. मागीर दिसतलो कसो? ताका लागून गांवांतल्या लोकांक असो प्रश्न पडटा की, सरपंचा सयत पंचांक मानधन आनी पंचायतीक अनुदान दिवन फायदो कोणाक? हाची जाप अशी आसा. ती म्हणल्यार, पंचायतींत वावुरप्यांक, म्हणल्यार, सरपंचा सयत पंचांक अशें लोकूय उलयतात. तांची ती उतरां सामकींच भायर उडोवपाची नासता.
हांगा ग्रामसभा जाता. तातूंत लोकांचे प्रश्न सुटावे जायनात. गांवांचोय विकास जायना. ग्रामसभांनी झगडीं चड जातात आनी ग्रामसभा सोंपता. पूण, पंचायतींत वावुरपी म्हणटात आमी विकास केला. हाका लागून सरकारान एक काम करचें, तें म्हणल्यार, सरपंचा सयत पंचांनी तांणी केल्ल्या कामाचें प्रगतीपुस्तक तयार करचें असो तांकां आदेश दिवचो. तें दरेके ग्रामसभे मुखार पंचायतींनी दवरचें. अशेंय सरकारान तांकां सांगचें. ताका लागून ‘दूध का दुध और पानी का पानी’ जातलें. सरकार दरेके पंचायतीक अनुदान दिता आनी सरपंचा सयत पंचांक मानधन. ताका लागून, सरकाराक तशें सांगपाचो अधिकार फावो जाता. मागीर तुमी पळयातूच, गावांचो विकास कसो जातलो तो. सामको नेटान. न्हय?
– गुरूदास नाडकर्णी
शिरफोड कुडचडें
9657573975
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
