भांगरभूंय | प्रतिनिधी
नवी दिल्ली, खबरां संस्था: सरन्यायाधीश बी आर गवई हांचेर बूट काडून मारपी वकील राकेश किशोर हांणी म्हणलें, भगवान विष्णूं विशीं सरन्यायाधीशांच्या विधानान म्हाका खूब वायट दिसलां. तांचे कृतीचेर म्हजी ही प्रतिक्रिया आशिल्ली. हांव नशेंत नाशिल्लों. जें घडलें ते खातीर म्हाका मात पसून पश्चाताप ना आनी हांव कोणाकूच भियेना.
तांणी म्हणलें, हांव हिंसे आड आसा, मात म्हजे सारक्या एका अहिंसक, प्रामाणीक मनशाक, जाचेर कसलेच तरेचे खटले नात आनी खंयच्याच गटा कडेन ताचो संबंध ना, ताका अशें कित्याक करचें पडलें हें विचार करपा सारकें आसा. हांव कमी शिकिल्लों मनीस न्हय. हांवें एम.एस्सी., पीएच.डी. आनी एलएलबी पुराय केलां आनी हांव भांगरा पदक जैतिवंत जावन आसा.
मजगतीं, एससी बार असोसिएशनाचे अध्यक्ष विक्रम सिंह हांणी सांगलें, भगवान विष्णू मुर्ती प्रकरणांत सरन्यायाधीशांच्यो टिप्पण्यो चुकीच्यो पद्धतीन सादर केल्यो. जाका लागून अशें दिसलें, तांणी देवतेचो अपमान केला. प्रसिद्धी मेळोवपा खातीर वकिलान हें केलें.
खरें म्हणल्यार, 8 सप्टेंबराक दनपरां, सरन्यायाधीशांच्या खंडपीठा मुखार एका खटल्याची सुनावणी सुरू आशिल्ली. आरोपीन सरन्यायाधीशांचेर बूट काडून मारलो. तो तांचे मेरेन पावूंक ना. सुरक्षा कर्मचार्यांनी बेगोबेग वकिलाक अटक केली.
सोमारा पुलिसांनी बूट मारपी वकिलाक ताब्यांत घेतलो आनी तीन वरां चवकशी केली. पुलिसांनी सांगलें, सर्वोच्च न्यायालयाच्या अधिकार्यांनी ह्या प्रकरणांत कसलीच कागाळ करूंक ना. तांचे कडेन उलयले उपरांत वकिलाक सोडून दिलो.
मजगतीं, सर्वोच्च न्यायालय बार असोसिएशनान (SCBA) आरोपी वकील राकेश किशोर कुमार हांचो परवानो रद्द केला. तांची नोंदणी 2011 सावन आसा. बार कौन्सिल ऑफ इंडियानूय तांकां निलंबीत केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
