भांगरभूंय | प्रतिनिधी
फोंडकुलांत उमथल्ले ॲम्बुलन्सीचेर काँग्रेसीची तिडक
पणजी: भौशीक बांदकाम मंत्री दिगंबर कामत हांणी फाटल्या सप्तकांत पर्वरी मतदारसंघाक भेट दिली. रोखडेंच तीन जेटपॅचर मशीन वापरून हो मतदारसंघ फोंडकुलांतल्यान मुक्त करतलों अशें जबरदस्त आस्वासन दिल्लें. भाजप सरकार सुरक्षीत रस्ते दिवन अपघात टाळपाक बांदिल आशिल्ल्याचो तांणी दावोय केल्लो. मात व्हडलीं- व्हडलीं आस्वासनां दिवनय आयज पर्वरेचे रस्ते धोको निर्माण करपी फोंडकुलांनी भरल्यात. सगल्यांचो जीव वाटावपी ॲम्बुलन्सूय ह्या रस्त्यांचेर सुरक्षीत नात. हीं सरकाराचीं निश्काळजीपणां, अशें म्हणीत गोंय प्रदेश काँग्रेस समितीचे मिडिया अध्यक्ष अमरनाथ पणजीकार हांणी आयज तिडक उक्तायली.
गोवा प्रदेश काँग्रेस समितीन हे असंवेदनशील भुमिकेचो खर निशेध केला. लोकांचो जीव वाटावपाचें सोडून भाजप सरकार फकत प्रसिद्धी खातीर लोकांचो पयसो उडयतात. थळावे आमदार मंत्री रोहन खंवटे हेय पर्वरेचे जनतेक न्याय दिवपाक पुरायेन अपेशी थारल्यात. गोंयकारांचो जीव धोक्यांत घाल्ले खातीर आमी भाजपा सारकाराक जापसालदार धरतात. गोंयचे जनतेक सुरक्षीत रस्ते मेळपाक जाय. पोकीं आस्वासनां नाकात, अशें पणजीकार हांणी पत्रकांत म्हणलां.
खुनशी रस्त्यांचे हें सत फकत पर्वरे पुरतें मर्यादीत ना. पुराय राज्यभर आसा. उपरोधीक गजाल म्हणल्यार, जेन्ना दिगंबर कामत काँग्रेसीचे विरोधी पक्ष फुडारी आशिल्ले तेन्ना तांणी रस्त्यांची वायट अवस्था दाखोवपाक फोंडकुलां सयत सॅल्फी घेवन आंदोलन केल्लें. आयज ते सरकारांत बांदकाम मंत्री म्हणून आसात, तरीय तांणी आजूनय कांयच करूंक ना. हातुंतल्यान भाजपाची दोट्टी भुमिका स्पश्टपणान दिसता, अशेंय पणजीकार हांणी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
