भांगरभूंय | प्रतिनिधी
मणिपूरांतले लजेक घालपी घडणुके उपरांत सरकार पक्ष आनी विरोधकांनी ताचेर संसदेंत चर्चा घडोवन हाडपा बगर आतां मेरेन फक्त राजकारण करपाचेरूच समाधान मानप, हाचे सारकें दुर्भाग्य कांयच आसूंक शकना. मणिपूरांत फाटले दोन अडेज म्हयने सुरू आशिल्ल्या वंशीक हिंसाचाराची धग कायम आसतनाच दोगां बायलांक नागडीं करून तांची धींड काडपाची घडणूक सामकार आयली. देश भरयां ताचे आड तिडकीचें ल्हार पातळ्ळें. हें सगलें एकदाचें थांबचें वा ताचेर साधकबादक चर्चेंतल्यान सगल्यांक मान्य असो उपाय काडपाची गरज आशिल्ली. पूण उरफाटें ताचो राजकी फायदो घेवपा खातीर विरोधकांनी यत्न करप हें जाल्यार साबार लोकांच्या आकलना भायलें आसा. बायलां वयले अत्याचार देशाक नवे नासले तरी मणिपूरांत जें कितें घडलें ताचें वर्णन एक शोकांतीक अशेंच करचें पडटलें.
मणिपूर पेटिल्लें आसाच, पूण राजस्थान, अस्तंत बंगाल, बिहार ह्या राज्यांनी फाटल्या कांय दिसांत अशाच घडणुकां वयल्यान वातावरण तापिल्लें आसतना सरकार पक्ष आनी विरोधकांनी एकमेकां कडेन बोटां दाखयत आनी आरोप प्रत्यारोप करून मूळ मुद्दोच कुशीक उडोवप हें खंयचेय परिस्थितींत स्विकार करपा सारकें ना, आनी ताचें समर्थन लेगीत करपाक मेळचें ना. केंद्रांतलें सरकार ते सभघरांत चर्चे खातीर तयार आसा अशें सांगता. जाल्यार विरोधक थातूरमातूर कारणां दिवन कसल्याय प्रस्तावाक विरोध करतना दिसतात. संसदेच्या पावसाळी अधिवेशनांतले पयले तीन दीस ताचे वयल्यान विरोधक फक्त बोवाळ घालतना पुराय देश पळयत आसा. चर्चा सोडून बाकी सगलें कितें तें करपाचेंच मुखेल विरोधी पक्ष आशिल्ल्या काँग्रेस आनी हेर पक्षांनी थारायलां अशेंच म्हणचें पडटा.
मणिपूर आनी हेर राज्यांतल्या अशा घडणुकांचेर विस्तारान चर्चा करपाचे सुवातेर सभाघरांत फक्त गोंदोळ घालपाकूच विरोधक फुडाकार घेतात अशें चित्र सामकार येता, आनी ताचे वयल्यान पुराय देश उद्विग्न जालो ना जाल्यार तें अजाप थारतलें आशिल्लें. लोकसभेची वेंचणूक लागीं येवपाक लागल्या. ते खातीर सत्तारूढ भाजपा सयत सगलेच राजकी पक्ष आपापली रणनिती थारावपाक व्यस्त आसात. तरी अशा घडणुकां वयल्यान राजकारण करून कोणी ताचो राजकी फायदो घेवपाच्या यत्नांत आसल्यार मात जनता ताची दखल घेतले बगर रावची ना, इतलें हें प्रकरण गंभीर आसा हाचोय विचार तांणी करपाची आयज गरज आसा. संसदेच्या सभाघरांत तीन दीस ह्या घडणुकांचेर जाय तशी चर्चा जायना हातूंतल्यान देशांतल्या लोकांक तुमी कसलो संदेश दिवपाक सोदतात हें कळना.
सर्वोच्च न्यायालयान जाल्यार हे गंभीर घडणुकेची दखल घेवन हातूंत घुस्पल्ल्या लोकां आड खर कारवाय करपाचे निर्देश दिल्ले आसतना संसदेंत ताचेर अजून चर्चा जायना हाका कितें म्हणप? मानवी हक्क आनी बायलांच्या अधिकारांची ही घडणूक म्हणल्यार सर्रास उल्लंघन आसा. हें खरें म्हणल्यार आमच्या सरकाराक वा विरोधकांक सर्वोच्च न्यायालयान सांगपाचो वेळ येवपाक नाका आशिल्लो. मात ते उपरांतूय हे आघाडेर दिसून येवपी उदासीनता वेगळेंच कितें सांगून वता. देशाची मान सकयल घालपाक लावपी हे घडणुकेन कोणाचेंय रगत पेटून वच्चें ना जाल्यार ह्या लोकांक संसदेंत आमचे प्रतिनिधी म्हणून बसपाचो कसलो अधिकार आसा, हें विचारपाचो वेळ आयला.
सभाघरांतले चर्चे खातीर विरोधक आयज नेमांचेर बोट दवरून विशिश्ट नेमा खालाच ती करची असो आग्रो धरतात. तेन्ना तांच्या मनांत एक आनी ओंठार दुसरेंच कितें तरी आशिल्ल्याचें स्पश्ट दिसून येता. विशिश्ट नेमा खाला चर्चा जावची आनी प्रधानमंत्री नरेंद्र मोदी हांचीय सभाघरांत हाजेरी आसपाक जाय ही मागणी पळयल्यार विरोधकांकूच ही चर्चा जाल्ली नाका अशें कोणाक दिसलें जाल्यार ती तांची चूक म्हणपाक मेळची ना. काँग्रेस आनी हेर विरोधी पक्ष मणिपूर आनी हेर राज्यांतल्या असल्या घडणुकांचेर चर्चा करपा पसून पयस पळून वतात असो आरोप सरकार पक्ष करता. जाल्यार विशिश्ट अटी घालून चर्चा जावपाची अपेक्षा धरून आशिल्ले विरोधक सरकाराचेरूच तशे आरोप करतात. मात तशें करतना लोकसभेच्या सभापतींक लेगीत घटनेचे फास्केंत रावनूच सभाघराचें कामकाज चलोवपाचें आसता हाचो तांकां विसर पडिल्लो आसता.
सध्याचे घडयेक चर्चा जावप आनी मणिपूरांत त्या माध्यमांतल्यान काय जायना सगल्यांक मान्य असो उपाय काडपाक येतलो काय हाचेर भर दिवपाची गरज आसतना विशिश्ट अजेंडा दोळ्यां सामकार दवरून विरोधकांनी हो पवित्रो घेतिल्लो दिसता. लोकशायेच्या परमोच्च मंदिरांत एक हत्यार म्हणून विरोधक बोवाळ घालतात अशें विधान उपराष्ट्रपती आनी राज्यसभेचे अध्यक्ष जगदीप धनकड हांणी ह्या संदर्भांत केलां, आनी तशें करप खूब वेदना दिवपी आशिल्ल्याचें तें म्हणटात. उपराष्ट्रपतीन उक्तायिल्ले भावने कडेन सगलेच सहमत आसतले. एखाद्री गजाल कितली ताणून धरपाची हाकाय मर्यादा आसता. हाचें भान दवरून फुडें वचपाची गरज आसा. सभाघराचें कामकाज चलोवप ही सरकाराची जापसालदारकी आसा. तरी विरोधकांनीय विशिश्ट मर्यादेंत रावन आपलें काम करचें ही अपेक्षाय ह्या कामांत बाळगली वता.
विरोधकांनी जायते फावटी संसदेच्या सभाघरांत बोवाळ घालीत कामकाज आडयिल्ल्याच्यो देखी आसात. आयज सत्तेर आशिल्ल्या पक्षान लेगीत विरोधांत आसतना कांय गंभीर अशा प्रकरणांत सरकारान आडायिल्लें पूण विशिश्ट मर्यादे मेरेन हें सगलें चलता. केंद्रीय अर्थसंकल्प लेगीत सभाघरांत विनाचर्चा मंजूर जाता हें हालिंसाराक आमी जेन्ना पळयतात तेन्ना आमी देशाक खंय घेवन वतात हें कळना. आनी हें सगले खंय तरी थांबोवपाची गरज आसता. संसंदेतले प्रायोजीत गदारोळ लोकशाय विरोधी आशिल्ल्याचें उपराष्ट्रपती ताचेर नाराजी उक्तायतना म्हणटात जाल्यार एकूण फाटभुंयेर ती खूब म्हत्वाची मानची पडटली. प्रस्न-जापेचो वेळ बंद उडयतात. प्रस्नकाळ हो सरकाराक उत्तरदायी थारावपा खातीर म्हत्वाचें साधन आसता हाचें भान लेगीत विरोधकांक नासप हाचेंय अजाप दिसता. मणिपूर पेटत रावल्यार ताचे दूरगामी परिणाम भोगपाची तयारीय सगल्यांक दवरची पडटली.
शेजारच्या मिझोरामांत लेगीत ताचे पडसाद दिसपाक लागल्यात आनी हें सामकें गंभीर अशे परिस्थितीचेर उपाय काडपाचे सोडून आमी पळून वतले जाल्यार ती व्हडली घोडचूक थारतली. संसदेंत सरकार आनी विरोधकांनी ह्या प्रस्नाचेर मनान एकठांय येवन चर्चा करून मणिपूरचे जनतेक आश्वस्त करपाची गरज आसतना सरकार आनी विरोधी पक्ष हाचें मदली दरी चडूच रुंद जायत चल्ल्या अशें चित्र काल सोमाराक लेगीत दिसून आयलें.
‘इंडिया’ च्या बॅनरा खाला एकठांय आयिल्ल्या विरोधी पक्षांक आपली ताकद वाडिल्ली भाजपाक दाखोवन दिवपाची हीच संद आशिल्ल्याचो निर्धार केल्ल्याचें चित्र संसदेच्या दोनूय सभाघरांत काल सोमारा तांणी केल्ली बॅनरबाजी आनी घोशणाबाजी वयल्यान दिसलें. सरकार आनी विरोधक हांणी मेळून सभाघराचें कामकाज सुरळीत चलोवप हेंच संसदीय लोकशायेंत अभिप्रेत आसता. पूण ही समजिकाय सोंपपा कडेन तर पावली ना मूं, असोच प्रस्न सध्या सगल्यांक पडपाक लागला.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
