सरकार मुखार सरता, सुदारता

भांगरभूंय | प्रतिनिधी

राजभाशेंतल्यान, देशी भाशेंतल्यान मुळावें शिक्षण घेतल्यार लुकसाण जायना हेंवूय शिक्षण मंत्री आशिल्ल्या मुख्यमंत्र्यांनी सांगचें.

एकामेकांचेर चिखल उडोवपाचें राजकारण सत्तेंतल्या मंत्री, आमदारां मदीं हाचें आदींय जालां. ताचो लाव विरोधांत आशिल्ल्या राजकी पक्षांनी घेवप नवें न्हय. चिखलांत मुखेल विशय फाटीं पडचे न्हय हाची जतनाय घेवपाची गरज आसा. वेंचणुको लागीं येता तेन्ना चिखोल एकामेकांच्या आंगार उडोवपाचो प्रकार वाडटलो, समेस्तांक ताचें कितलें पडून गेलां? समेस्त आपल्या पोटाचो विचार करतात.
पावसाचो उटंगारय नव्यो येवजण्यो करपाक, फुडें वचपाक सरकाराक आडायना. सरकार मुखार सरता, केल्ल्यो चुकी, घेतिल्ले निर्णय सुदारता, लोकां पासत वावुरता, वायटा आड जागयता हें म्हत्वाचें.
रिटायर जाल्ल्यांक कितलो तेंप सेवावाड दिवप हाची नेमावळ आसा. सेवावाडी उपरांत अधिकारी, कर्मचारी कितें करतात? आदले वरीच खात्यांत वावुरतात ताचेर नदर दवरप गरजेचें.
गोंय वैजकी म्हाविद्यालयाचे आदले डीन, आॅर्थोपेडीक सर्जन, विभाग मुखेली डाॅ. शिवानंद बांदेकार हांकां सेवावाडींतल्यान मेकळे केलें. तांणी आपले उपरांत विभाग बळिश्ट उरचो म्हणून गिन्यांनी घडयल्यात, हाचे फुडेंय ते सेवा दिवप नेटान चालूच दवरतले असो विश्वास आसा. डाॅ. बांदेकार हांणी बदलाचें वारें गोमॅकॉंत हाडलां, गरजे वेळार केंद्रीय मंत्री श्रीपादबाब नायक हांचे वरी दुयेंतींक बळगें दिलां, बरी सेवाय दिल्या. तांचे उत्कृश्ठताये पासत सेवेंत चड वर्सां रावपाची संद तांकां मेळ्ळी, ताचो हेरांनी लाव घेतलो. नाका आशिल्ल्यो घडणुको म्हाविद्यालयांत जाल्यो तेन्ना गोमॅकाॅंतले दोतोर तांच्या फाटल्यान रावले. निमाणें तांची पिराय वाडटा, तांच्या हाताक, मेंदवाक थाकाय जाय, ते आदले वरी वावर करुंक शकनात, तिडकतात हें सरकाराकय कळ्ळें. सरकारान तांकांच न्हय सेवावाडीर आशिल्ल्या हेरांकय सेवेंतल्यान अळंग कुशीक काडप सुरू केलां, हो सरकाराचो प्लस पाॅयंट. राजकी चिखलकाल्यांतल्यान सरकार मुखार सरता, नवे दिकेन राज्याक व्हरपाचे येत्न करता तें समेस्तां मेरेन पावलें जाल्यार मतां कित्याक मेळचीं नात?
वेंचणूक लागीं येता तशे चिखोल उडोवपी, उडोवन घेवपी आतां चड जाल्यात. वेंचणुके आदलीं निमाणीं दोन वर्सां म्हत्वाचीं आसलीं तरी राजकी पक्षाच्या मुखेल्यांनी राज्या पासत पांच धा वर्सांत कितें केलां? चिखलांतल्यान तांणीच कमळां फुलयल्यांत? हें जोखपाक मतदार आसात. मतदार मोने नात, तेय उलयतात उतरांनी, मतांतल्यान. उतरां, भाशेचो सांबाळून उपेग केल्यार तोखणाय जाता. कांय वेळार सरकारान केल्लो बरो वावर नदरे आड वता, तिडकय उक्तावप जाता तेन्ना सरकार जायरातींतल्यान, लोकप्रतिनिधी आपल्या वावराची म्हायती माध्यमांतल्यान दितात. सकारात्मक जाल्यार फळ कित्याक मेळचें ना?
तुमी आरड मारत रावात, आमी वावुरत रावतले, समेस्तां मेरेन सरकाराच्यो येवजण्यो पावयतले, समेस्तांक जागयतले ही मोख लोकप्रतिनिधींनी दवरची. हालींच जाल्ले अॅसीड आंगार उडोवपाचे घडणुकेन, घुंवळे वखदांच्या वेवसायांतल्यान सादूर जावन वायटा बराबरीन बरेंय सांगत रावया, बदलुया, सुदारुया. सेवेंतल्यान मेकळे जातना कितें करपाचें हाचें प्लॅनिंग डाॅ. बांदेकार हांणी केलां, ती देख हेरांनीय घेवची. गोमॅकाॅचे डीन डाॅ. जे. पी. तिवारी रातदीस वावुरपी, सेवाव्रती हें तांच्या दुयेंतींक, इश्टांक, गोंयकारांक खबर आसा. आपल्या वावराची जायरात तांणी केली ना हें सत. बोवाळांत वैजकी शिक्षणांत 20 जागे अंदूं वाडल्यात. फुडारांत गोमॅकाॅंत व्हड बदल जातले, नव्यो साधनुसुविधा, नवें वैजकी म्हाविद्यालय गोंयाक मेळटलें अशें चिन्न आसा.
युवा बदलांक आशेला, तांकां बदलांचे वाटेन व्हरप ही सरकाराचीय लागणूक. तरणाटे वेसनी जावचे ना हेखातीर तांकां जागें करतना तांच्या आवय बापायकय शिटकावण्यो दिवपाची गरज आसा.
इंग्लीशीक मुळाव्या शिक्षणांत माथ्यार घेवप बरें, वायट तें गोंय शिक्षण मंडळाचे आदले अध्यक्ष पांडुरंग नाडकर्णी हांणी सदांच सांगलां. इंग्लीश खंयच्या पांवड्यार भुरग्यांक शिकोवप? इंग्लीश विश्वाची भास जाता तेन्ना गोंयांत इंग्लीशी इतलीच उंचेल्या शिक्षणांत राजभास उपेगी थारता. राजभाशे पसून पयस वचप लाव दिवपी न्हय राष्ट्रभासय सगल्यांक येवपाक जाय. राजभास शिकल्यार राष्ट्रभाशा कळप सोंपें तितलेंच राष्ट्रभास शिकिल्ल्यांक राजभास कळटा. राजभाशेंतल्यान, देशी भाशेंतल्यान मुळावें शिक्षण घेतल्यार लुकसाण जायना हेंवूय शिक्षण मंत्री आशिल्ल्या मुख्यमंत्र्यांनी सांगचें.
शिक्षण आनी गायन, नाच, वाद्यांचो लागसारचो संबंद आसा. कला आनी संस्कृती खातें मुख्यमंत्र्यांनी आपले कडेन दवरलां. मंत्रीमंडळांत बदल जातले तेन्ना कला आनी संस्कृती खातें मुख्यमंत्र्यांनी आपले लागीं दवरचें. कलेच्या आंगणांत साहित्य केळोवपा पासत ल्हानसो पुस्तकांचो कोनसो, सिने शिक्षण कला अकादमींत हाडपा पासत बांदावळ जावची.
गायक अजित कडकडे हांचो भोवमान उसरां काय जालो ताची धादोसकाय हजारांनी गोंयकारांक मेळ्ळी. गोंयची धूव अभिनेत्री वर्षा उसगांवकार, गोंयच्या वरिश्ठ शिक्षणकर्मींचोय विचार गोमन्तविभूषण दितना बेगीन करचो. नव्या मतदारांक, शिक्षणकर्मींकय श्री. कडकडे हांच्या भोवमानान अभिमान दिसतलो.
विकसीत भारता वांगडा विकसीत गोंय जातलें तेन्ना दुसरे श्री. कडकडे मेळटलेच तेभायर गोंया भायर गायन, नाचाचें शिक्षण घेवपी तरणाटे आसात तातूंत एक लता, आशा कित्याक नासुये?
नाटक, संगिताक आधुनीकतायेची जोड दिवपाचो, ई युगांत व्हरपाचो वावर जाता. तरणाट्यांक संद मेळटली, यूग नवें थंय फुलतलें अशी आस्त बाळगुया. नवे गोंय कला अकादमीची बुन्याद 2026 दसऱ्याक घालून कला कौशल्यांत स्वयंपूर्णा घडोवपाची मोख सरकारान दवरची.
दिवचल मतदारसंघांतलें गौरी भट आसूं, वर्षाचे गुरु डाॅ. अजय वैद्य, कलाकार उज्वला तारकार, गायिका प्रचला आमोणकार, सत्तरीचे रुपेश गांवस कलेक न्याय दिवपी. गायक दामोदर शेवडे, गुरुदासबुवा शिरगांवकार, पूर्णांनंद च्यारी, सिने कौशल्यांत गोंयांक व्हड करपी आदित्य जांभळे, सिने दिग्दर्शक राजेंद्र तालक, निर्माते शर्मद रायतुरकार, गायिका हेमा सरदेसाय, गायक रेमो फर्नांडीस, प्रवीण गांवकार, चित्रकार निरुपा नायक, संजय हरमलकार हांकां साबार मंडळार घेवन कला अकादमी फुडें व्हरची पडटली. सिद्धेश देसाय, आरती नायक हे कलेंत उच्च शिक्षण घेवन व्हड जाल्ले, कलेची साधना करपी. तांचो आधार सरकाराक आसतलोच. लेखक, कलाकार तोमाझीन कार्दोज, प्रिन्स जेकब, ज्ञानपीठकार दामोदर मावजो, लेखिका हेमा नायक, मुकेश थळी, डाॅ. नंदकुमार कामत कला अकादमीची नवी वाट, अकादमीत नवे वाटे वयलो साहित्याचो कोनसो कसो आसचो तें मार्गदर्शन करुंक शकतात. गायक शौनक अभिषेकी, महेश काळे, तरणाटे गोंयकार गीतकार कला अकादमीचे नवे कला अकादमीचे खांबे जावंक शकतात. कलेचे साधनेंत घुस्पून रावपी पंडित कमलाकर नायक, रजनी ठाकूर कलेंतले वाटचिरे. गोंयचे मातयेंत कला आयजय आसा, गरज परंपरेंतल्यान नवे दिकेन वचपाची.

सुहासिनी प्रभुगांवकार
9881099260