भांगरभूंय | प्रतिनिधी
नवी दिल्ली, खबरां संस्थाः महात्मा गांधी राष्ट्रीय ग्रामीण रोजगार हमी कायदो (मनरेगा) रद्द करपाचें विधेयक केंद्र सरकार हाडपाची शक्यताय आसा. ताचे बदला सरकार गांवगिऱ्या वाठारांनी रोजगारा खातीर नवो पर्यायी कायदो हाडपाचो विचार करता अशी म्हायती सूत्रांनी दिली.
मेळिल्ले म्हायती प्रमाण, मनरेगाचे सुवातेर चड प्रभावी, कुशळटाय आदारीत आनी दीर्घकाळ रोजगार संद निर्माण करपी नवो गांवगिरो रोजगार कायदो तयार करपा खातीर सरकार काम करता. प्रस्तावीत कायद्यांत रोजगार निर्मिती वांगडाच गांवगिरी मुळावी बांदावळ, उत्पादकता आनी थळाव्या उदरगतीचेर भर दिवपाची शक्यताय आसा.
हे संबंदीं गांवगिऱ्या रोजगारा खातीर नवो पर्यायी कायदो करपा वांगडाच मनरेगा रद्द करपाचें वेगळें विधेयक संसदेंत मांडूं येता. पूण हे संबंदी सरकारान अजून अधिकृत घोशणा करूंक ना.
नव्या कायद्याचो आराखडो, चालीक लावपाची पद्दत आनी लावार्थ्यांचे स्वरूप हांचे विशीं सविस्तर म्हायती विधेयक मांडल्या उपरांतच स्पश्ट जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
