भांगरभूंय | प्रतिनिधी
फातोड्डेंकारांचें म्हणणें: मंत्री सुदिन ढवळीकार हांणी आयकून घेतल्यो समस्या
भांगरभूंय । प्रतिनिधी
मडगांवः पालिका आसूं वा जिल्होदिकारी कार्यालयांत सरकारी कर्मचारी वेळार येनात. तशेंच वरिश्ठ अधिकारी नासत जाल्यार वेळा आदीं घरा वतात. सरकार तुमच्या दारार अशे उपक्रम चालीक लावन लेगीत सरकारी कामां दोन फावटी मारून जालीं, अशें केन्नाच जायनात. हे खातीर योग्य उपाय येवजण्यांची गरज फातोड्डेंच्या लोकांनी उक्तायली.
चलो पंचायत मोहिमे खाला मंत्री सुदिन ढवळीकार फातोड्डेंच्या लोकांच्यो समस्या समजून घेवचे खातीर आयिल्ले. खाजगी बशी चड तिकेट घेतात, रस्त्याचेर उब्यो करतात त्यो रेंट ए कार, गाडे, दायज थळांचो सांबाळ करपा कडेन केल्ली आडनदर हे सयत सरकारी कार्यालयांतल्या कर्मचाऱ्यां कडल्यान वेळार कामां जायनात, अश्यो कागाळी ह्या वेळार लोकांनी मांडल्यो.
मडगांवच्या रवीन्द्र भवनांत बिरेस्तारा दनपारां मंत्री सुदिन ढवळीकार लोकांच्यो समस्या समजून घेवचे खातीर आयिल्ले. ह्या वेळार आमदार विजय सरदेसाय, वीज खात्याचे अधिक्षक अभियंते राजीव सामंत, बांदकाम खात्याचे अधिकारी औदुंबर भेंडे, पालिका मुख्याधिकारी दौरीश शंखवाळकार हाजीर आशिल्ले.
फातोड्ड्यां आतां गाडयांची संख्या वाडपाक लागल्या. ताका लागीन भौशीक येरादारीचो बरो पर्याय दिवचो. खाजगी बशी चड तिकेट घेता, पूण येरादारी खातें मात ताची दखल घेना. नळाचे मिटर बरयतना उण्यांत उण्या युनिटाचे पयशे घेतात, पूण ते परस उणे युनीट जाले जाल्यारूय तितलेच पयशे भरचे पडटात. तशेंच मिटर शुल्क म्हूण बिलांत पयशे कायम लायतात. मिटराचे किंमती इतले पयशे घेतले उपरांत ते शुल्क उणे करचे. तशेंच मिटराचे बाबतींत लेगीत करचें, अशें लोकांनी सांगलें. रस्त्यांचेर रेंट अ कार पार्क करतात. तशेंच रस्त्या कुशीक गाडेय उबे करतात. ताका लागून लोकांक त्रास जातात, अश्योय समस्या तांणी मांडल्यो.
रस्त्याचेर पार्क केल्ल्या मोटारींचेर कारवाय करपाच्यो सुचोवण्यो मंत्री ढवळीकार हांणी केल्यो. तशेंच बेकायदो गाड्यांचेर कारवाय करपाक मुख्याधिकाऱ्याक सांगलें. पालिका इमारत, भलायकी केंद्राची इमारत, कोमुनिदाद इमारत, पोरण्या हॉस्पिसियोची इमारत ह्या दायज थळांची राखण करपाची लोकांनी मागणी केली. फातोड्डें मतदारसंघा कातीर एक सबस्टेशन उबारपाचें थारायलां, अशें मंत्री ढवळीकार हांणी सांगलें. तशेंच आमदार विजय सरदेसाय हांणी फातोड्ड्यां खातीर फक्त स येरादारी पुलीस कर्मचारी आसात अशें सांगलें. तशेंच मुख्यमंत्र्यान फातोड्ड्यां येरादारी विभाग दिवचो, अशी मागणी केली.
जमतां तितलीं कामां तत्काळ करतलेः ढवळीकार
लोकांचीं कामां जायनात, अश्यो कागाळी दिल्ली मेरेन पावल्यात. त्या वेळार दरेक मतदारसंघांतली पंचायत, पालिका वाठारांतले लोकप्रतिनिधी आनी लोकांच्यो समस्या मंत्र्यांनी समजून घेवन त्यो सोडोवच्यो. ज्यो समस्या लोकांनी मांडल्यात तातूंतल्यो तत्काळ जावपी गजाली करून हेरांची प्रक्रिय सुरू करतले. दरेका खात्या कडल्यान समस्या सोडोवन 48 वरां भितर मुख्यमंत्र्यांक अहवाल सादर करतले, अशें मंत्री सुदिन ढवळीकार हांणी सांगलें.
म्हापश्यां नगरसेवकांचीं कामां जायनात
म्हापशें आनी फातोड्डें ह्या दोन मतदारसंघांतल्या लोकांनी ज्यो समस्या मांडल्यात तातूंत खूब फरक आसा. जो काम करता ताचे चड प्रस्न आसनात, ते प्रमाण फातोड्डेंकारांचे व्हड प्रस्न नाशिल्ले. म्हापश्या साद्यो साद्यो समस्या मांडल्यो. 27 कामां दिल्लीं, पूण तीं जावंक नाशिल्ल्याचें म्हापश्यां नगरसेवकांनीच सांगलें. आपूण कोणाचेर आरोप करिना. जांच्या अखत्यारी खाला पालिका आसा आनी ती ज्या पक्षाची आसा तांची ती समस्या, ताचेरूय प्रस्नचिन्न उप्रासता, अशें मंत्री सुदिन ढवळीकार हांणी सांगलें.
अदानी गॅस पायपलायनीक केंद्र पांवड्यार परवानगी
अदानी गॅस पायपलायन आनी गेल इंडियाच्या केबलां खातीर गोंय राज्य सरकारा कडेन कांय ना. तांकां केंद्रा कडल्यान राष्ट्रीय पांवड्यार परवानगी दिल्या. फकत गोंयांतले जिल्होधिकारी तांकां नाहरकत दाखलो दितात, राज्य सरकाराच्या हातांत कांयच आसना. गेल इंडिया कडल्यान राज्य सरकारा कडेन चर्चा करिनासतना पायपलायन घातल्या, अशें मंत्री सुदिन ढवळीकार हांणी सांगलें. जाल्यार विजय सरदेसाय हांणी सांगलें, ह्या कामांक लागून लोकांक त्रास जातलो. ताका लागून रस्ते आदले वरी करपाची वर्क ऑर्डर ते घेवन आयले बगर काम करपाक दिवचे नात, अशीय तांणी शिटकावणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
