भांगरभूंय | प्रतिनिधी
भांगरभूंय । प्रतिनिधी
वाळपयः सरकारा वतीन वाळपय पालिका सभाघरांत आयोजीत केल्ले सरकार तुमच्या दारांत कार्यावळींत सत्तरी तालुक्यातल्या पंचायत मंडळांनी तशेंच साखळे पालिका मंडळान पंचायत वाठारांतले रस्ते तशेंच पियेवपाच्या उदका पुरवणेच्यो समस्या सरकारी अधिकाऱ्यां सामकार मांडल्यो. ह्या वेळार बांदकाम मंत्री नीलेश काब्राल, पर्येची आमदार दिव्या राणे, सत्तरीचो उपजिल्होधिकारी प्रवीण परब, मामलेदार दशरथ गांवस, जिल्हो पंचायत वांगडी सगुण वाडकार, देवयानी गांवस, राजश्री काळे, सरपंच आनी पंच तशेंच साबार लोक हाजीर आशिल्ले.
आपापल्या वाठारांतल्यो समस्या तालुक्यांतल्या स्थानिक स्वराज संस्थेच्या लोक प्रतिनिधींनी त्या त्या खात्याच्या मंत्र्यां कडेन मांडच्यो अशें आवाहन बांदकाम मंत्री नीलेश काब्राल हांणी केलें. वाळपय आनी पर्यें मतदारसंघातल्या उदरगतीच्या कामां विशीं तांणी सरपंच, पंचा कडेन भासाभास केली. प्रलंबीत आशिल्ल्या कामाची वळेरी लोक प्रतिनिधींनी काब्राल हांका सादर केली. ज्या सुवातांनी उदका पुरवणेची समस्या आसा ती सुटावी करपा खातीर बांदकाम खात्याचो उदका पुरवण विभाग धोरणात्मक निर्णय घेतलो अशें काब्राल हांणी सांगलें.
सरकार तुमच्या दारांत उपक्रमा वरवीं सत्तरी तालुक्यांतल्या गांवगिऱ्या वाठारांतल्या लोकां कडेन उलोवन कामा चालीक लावपाचो यत्न करतले अशें आमदार दिव्या राणे हिणे सांगलें. पयल्याच फावट सरपंच, पंच जाल्ल्यांनी लोकां मदीं वचून लोकांच्या समस्यां आयकून घेवपाचो सल्लो तांणी तांका दिलो. केरी पंचायतीची सरपंच दीक्षा गांवस , मोर्लेचो सरपंच अमित शिरोडकार, पर्येची सरपंच रती गांवकार, होंडाचो सरपंच शिवदास माडकार, पिसुर्लेचो सरपंच देवानंद परब, भिंरोडेचो सरपंच उदयसिंग राणे, माउसचो सरपंच सोमनाथ काळे, ठाणेची सरपंच सरिता गांवकार, नगरगांवची सरपंच संध्या खाडिलकर, सावर्डेची सरपंच उज्वला गांवकार, खोतोडेचो सरपंच नामदेव राणे, वाळपयची नगराध्यक्ष सेहझीन शेख, नगरसेवक रामदास शिरोडकर हांणी चर्चेंत वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
