भांगरभूंय | प्रतिनिधी
मुरगांव : केंद्र आनी राज्य सरकार गोंयांक कोळसो हब करपाचें षडयंत्र रचता. मुख्यमंत्री डॉ. प्रमोद सावंत हे कोळसो हाताळपी अदानी आनी जेएसडब्ल्यू मुखार नतमस्तक जातात. म्हणूनच रेल्वेचें दोट्टीकरण करून वेळसांव, इरोशीम, कांसावली आनी हेर सुवातांचेर जमनी ताब्यांत घेवपाचो डाव रचिल्ल्याचो गंभीर आरोप गोंय प्रदेश कॉंग्रेस समितीचे अध्यक्ष अमित पाटकार हांणी केला. ते वास्को पत्रकार परिशदेंत उलयताले.
मुरगांव पत्तन प्राधिकरणाचो धक्को क्र. ६ आनी ७ चेर कोळसो कितल्याशाच पटिंनी वाडला. आयज मेरेन राज्य सरकारान कोळसो हाताळपी अदानी आनी जेएसडब्ल्यू कडल्यान चार हजार कोटींची विशेश अर्थीक रक्कम ( ग्रीन सेझ) वसूल करूंक ना. कारण सरकराचेर दोनूय आस्थापनां कडल्यान विशेश अर्थीक रक्कम वसुल करची न्हय अशें चेंपण केंद्र सरकारान घाल्ल्या अशी म्हायती विरोधी पक्ष फुडारी युरी आलेमाव हांणी दिली.
गोंयच्या अस्तंत घांटांतल्यान येवपी दक्षीण पश्चीम रेल्वे प्राधिकरणाचो दोट्टी रेल्वे मार्ग फकत मुरगांव बंदरांतल्या कोळसो हाताळपाक करता अशें रेल्वे निगमच्या वॅबसायटीचेर जाहीर केल्लें. अचकीत रेल्वे निगमान मंगळारा (ता.२) आपले वेबसायटीवेलो तो संदेश डिलीट केल्ल्याची म्हायती अमित पाटकार हांणी दिली.
राज्य सरकार गोंयचीं रानां, शेतां आनी घरां उध्वस्त करून रेल्वे दोट्टी मार्ग करपाचो कट रचता असो आरोपूय तांणी केलो.
ह्या वेळार तांचे वांगडा गोंय प्रदेश अल्पसंख्याक विभागाचे मुखेली नियाजी शेख, कॉंग्रेसचे हेर मागास वर्गीय समितीचे अध्यक्ष तशेंच आदले नगराध्यक्ष नितिन चोपडेंकार, आदले नगराध्यक्ष नंदादीप राऊत, वास्को कॉंग्रेस गटाध्यक्ष सिध्देश कलंगुटकार, मुरगांव कॉंग्रेस गटाध्यक्ष साईश अमेरकार, कुठ्ठाळी कॉंग्रेस गटाध्यक्ष पिटर डिसोझा आनी हेर पदाधिकारी हाजीर आशिल्ले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
