भांगरभूंय | प्रतिनिधी
मुख्यमंत्री: मुल्यवर्धीत शिक्षण दिवपी गोंय पयलें राज्य आशिल्ल्याचो दावो
भांगरभूंय I प्रतिनिधी
मडगांवः सरकार कोंकणी- मराठी मुळाव्यो शाळा बंद करपाक सोदता, असो कांय जाण चुकीचो प्रचार करतात. मात सरकार मुळाव्यो शाळा बंद करचें ना, अशें मुख्यमंत्री डॉ. प्रमोद सावंत हांणी सांगलें. शेनवारा दक्षीण गोंय जिल्होधिकारी कचेरेंत मुळाव्या शाळांच्या पालकां खातीर ‘शिक्षा पे चर्चा’ हे व्हर्च्युअल पद्दतीन आयोजीत केल्ले कार्यावळींत मुख्यमंत्री उलयताले. ह्या वेळार शिक्षण खात्याचे सचीव रवी धवन, शिक्षण संचालक शैलेश झिंगडे, उपसंचालक मनोज सावयकार आनी हेर अधिकारी हाजीर आशिल्ले.
मुख्यमंत्री डॉ. सावंत हांचे हस्तुकीं निपूण भारत मोहिमेचें उक्तावण आनी विद्या प्रवेश पुस्तिकेचें प्रकाशन जालें. ह्या वेळार नवें शिक्षणीक धोरण, शिक्षकांची तांक आनी उदरगत, निपूण भारत मोहीम भाशा ज्ञान, मदले सुटयेंतलें खाण ह्या विशयाचेर मार्गदर्शन केलें.
ही कार्यावळ फाटल्या शेनवारा जावपाची आशिल्ली, पूण कांय कारणांक लागून ती जाली ना, अशें मुख्यमंत्री डॉ. सावंत हांणी सांगलें.
शिक्षण खात्याच्या अधिकाऱ्यांनी स विशयांचेर मार्गदर्शन केलें. ताचेर सगळ्यांनी गंभीरपणान विचार करपाक जाय. राष्ट्रीय शिक्षण धोरणाचेर चड लक्ष दिलां. भुरग्यांचीं पिरायेचीं 3 ते 8 वर्सां खूब म्हत्वाची आसतात. तांचेर योग्य संस्कार करपाची जापसालदारी पालक आनी शिक्षक ह्या दोगांचीय आसता. निपूण भारत मोहिमे खाला भाशा आंकडे स्पश्ट केले जाल्यार फुडलें शिक्षण खूब सोंपें जावं येता. हे खातीर शिक्षकांक हाचें प्रशिक्षण दितले. गणीत विशय भुरग्यांक सोंपो करून शिकोवपाक जाय. हे खातीर शिक्षकांक प्रशिक्षण दिवपाचो वावर सुरू आसा. एनएससीच्या अहवाला प्रमाण गोंयांत विद्यार्थी गणितांत कच्चे आसात जाल्यार विज्ञानांत फाटीं पडटात. हे खातीर तज्ञांची मजत घेवन तांकां एकठांय हाडून प्रशिक्षण दितले, अशें मुख्यमंत्र्यान सांगलें.
आपले कडेन जायते पालक शिक्षकांची बदली करपाची मागणी घेवन येतात. मात, अशी कागाळ येवपाक जायना. नवे शिक्षक आसतात तांकां पालकांनी थोडो वेळ दिवपाक जाय. कारण तो गांव शाळा, पालक विद्यार्थी तांचे खातीर नवे आसतात. समजून घेवपाक वेळ लागता अशें ताणी सांगलें. सांग्यार ज्या शाळेंत शिक्षिकेची बदली केल्ली, तिणें ताबो घेवंक ना, अशें प्रकार सरकार हाचें मुखार सोंसून घेवचें ना, हाची एडीआयनी नोंद घेवची.
सरकार मुळाव्या शाळांचेर कितले पयशे खर्च करता, कशे पद्दतीन खर्च करता हाची खोलायेन म्हायती मुख्यमंत्र्यान दिली. मुळाव्या शाळांनी शिकोवपी शिक्षक आनी शिक्षिका हांकां बिएलओ म्हूण नेमणूक केल्ल्यान शिक्षणाचेर परिणाम जाता, अशो कागाळी येतात. हाचे मुखार तांकां बिएलओ ड्युटी दिवचे नात, अशें मुख्यमंत्र्यान सांगले.
मुळाव्या शाळांनी सरकारान येरादारीची वेवस्था करूंक ना, फक्त हायस्कुलांक बालरथ दिल्यात. कांय स्कुला ताचो वापर मुळाव्या शाळां खातीर करतात. मुळाव्यो शाळा ह्यो एका किलोमिटराचेर आसतात. सरकार नव्या 150 शिक्षकांची नियुक्ती मुळाव्या शाळांनी दर एका शाळेंत दोन प्रमाण नोव्हेंबर मेरेन करतले. तांकां प्रशिक्षण दिवपाचें काम सुरू आसा. ह्या वेळार कांय पालकांनी मुख्यमंत्री डॉ सावंत हांकां व्हर्च्युअल पद्दतीन प्रश्न विचारले. ताका मुख्यमंत्री सावंत हाणी जापो दिल्यो. गोंयच्या सुमार 900 वयर मुळाव्या शाळांचे प्रतिनिधी 2 हजार शिक्षक, पालक आनी हेर अधिकारी मेळून सुमार 50 हजार जाणांनी हे कार्यावळींत वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
