सरकार आनी जनता हांचे मदलो म्हत्वाचो दुवो पत्रकार

भांगरभूंय | प्रतिनिधी

श्रीपाद नायक : वरिश्ठ पत्रकारां खातीर राष्ट्रीय परिसंवादाचें आयोजन

भांगरभूंय । प्रतिनिधी

पणजी : लोकशायचो ‘चवथो खांबो’ म्हूण पत्रकारितेचें म्हत्व अधोरेखीत करून पत्रकार हो सरकार आनी जनता हांचे मदलो एक म्हत्वाचो दुवो म्हूण काम करता, अशें केंद्रीय मंत्री श्रीपाद नायक हांणी सांगलें. तशेंच पारदर्शकता, जापसालदारकी आनी राष्ट्रीय आनी समाजीक विशयांचेर प्रबोधन करपांत पत्रकारांचो मोलाचो वांटो आसता, अशेंय तांणी सांगलें.

फेडरेशन ऑफ सीनियर जर्नलिस्ट्स हे संघटनेन गोंय वरिश्ठ पत्रकार संघटणा, म्हायती आनी प्रसिध्दी खातें तशेंच गोंय श्रमीक पत्रकार संघटणा (गुज) हांच्या जोडपालवान मिरामार हांगा एक इतिहासीक राष्ट्रीय बसका आनी परिसंवादाचें आयोजन केलां. ह्या परिसंवादाचें उक्तावण केले उपरांत केंद्रीय मंत्री नायक उलयताले. हे परिशदेचो मुखेल उद्देश वरिश्ठ पत्रकारां मुखार आशिल्लीं आव्हानां सोडोवप आनी तांच्या कल्याणा खातीर एक एकसुत्री मार्गदर्शक आराखडो तयार करप हो आसा.

उक्तावण सुवाळ्याक म्हायती आनी प्रसिध्दी खात्याचे संचालक दीपक बांदेकार, फेडरेशन ऑफ सीनियर जर्नलिस्ट्स संघटणेचे अध्यक्ष संदीप दिक्षीत, वरिश्ठ पत्रकार गुरूदास सावळ, सुहासिनी प्रभुगांवकार आनी हेर मानेस्त हजर आशिल्ले.

दसकां वयर समाजसेवा आनी पत्रकारिता केल्ल्या उपरांतूय, जायत्या वरिश्ठ पत्रकारांक योग्य भलायकी सुविधा आनी अर्थीक थिराय मेळना. ह्या संदर्भांत फेडरेशनान प्रधानमंत्री नरेंद्र मोदी हांकां एक निवेदन सादर केलां, जातूंत तांच्यो सविस्तर मागण्यो, देखीक पत्रकारां खातीर राष्ट्रीय पेन्शन येवजण लागू करप, वरिश्ठ पत्रकारां खातीर सुदारीत भलायकी विमो सुविधा दिवप आनी पत्रकारांच्या निवृत्ती काळांत तांकां प्रतिश्ठा आनी सुरक्षा मेळपा खातीर कल्याणकारी उपाय येवजणो चालीक लावप हांचो आस्पाव आसा, अशी म्हायती केंद्रीय मंत्री नायक हांणी दिली.

हे बसकेच्या निमतान देशभरांतल्या वरिश्ठ पत्रकारांक आपले विचार मांडपाची आनी ह्या मळाचो फुडार सुरक्षीत करपाची एक बरी संद मेळ्ळ्या. सरकार आनी प्रसार माध्यम संस्थां मदलो विधायक संवाद आनी हेर कल्याणाचें प्रस्न सोडोवपाक नक्कीच मजत करतलो, अशें नायक हांणी म्हणलें. ह्या वेळार फेडरेशन ऑफ सीनियर जर्नलिस्ट्स संघटणेन काडिल्ले यादस्तिकेचें मानेस्तां हस्तुकीं लोकार्पण जालें.