भांगरभूंय | प्रतिनिधी
कॅशियरान पयशे स्वता खातीर वापरले
पीडब्ल्यूडीच्या मडगांव विभागांतलो प्रकार
प्रकरण महालेखापालाच्या अहवालांतल्या उक्तें
भांगरभूंय । विशेश प्रतिनिधी
पेडणें : गोंय भौशीक बांदकाम विभागांत 15.18 लाखांच्या सरकारी निधीचो गैरवापर जाल्लो प्रकार महालेखापालाच्या (कॅग) अहवालांतल्यान मुखार आयला. भौशीक बांदकाम विभागाच्या विभाग नं. 6 (रस्ते) मडगांव, हातूंत हो प्रकार घडला. कार्यालय मुखेल्याच्या अर्थीक नेमां प्रमाण गरजेचें आशिल्लें लेखा परिक्षण तपासणी करूंक नाशिल्ल्यान कॅशियरान सरकारी निधी स्वताच्या वैयक्तीक वापरा खातीर मोडिल्ल्याचे दिसून आयलां.
कॅगाच्या 31 मार्चाक सोंपिल्ल्या अर्थीक वर्साच्या अहवाला प्रमाण, जानेवारी ते सप्टेंबर 2022 ह्या काळांत कॅशियरान वट्ट 28.80 लाख सरकारी रकम हाताळिल्ली. तातूंत सुरवातीच्या 13,712 रुपयांचो आस्पाव आशिल्लो. मात तातूंतले फक्त 12.94 रुपयाच सरकारी खात्यांत जमा केले. जाल्यार उरिल्ले 15.86 लाख योग्य तरेन रोकड पुस्तिकेंत नोंद करूंक नात, खात्यांत लेगीत जमा जावंक ना. ही व्हडली चूक खात्याचे मुखेली, डीडीओ आशिल्ले कार्यकारी अभियंत्याचे आडनदरेक लागून जाली, अशें कॅग अहवालांत म्हणलां.
रोख वेव्हार वेळार नोंद जाय नाशिल्ले, म्हयन्याची नोंदणी आनी रोख पुस्तकांची नेमान तपासणी जावंक नाशिल्ली आनी अंतर्गत अर्थीक नियंत्रण यंत्रणा पुरायपणान अपेशी आशिल्ली. हाका लागून ही फटवणूक खूब तेंप लक्षांत येवंक ना, अशें कॅगान म्हणलां.
नोव्हेंबर 2022 वर्सा कॅगाचे तपासणे वेळार कॅशियरान बेगोबेग 4.18 लाख रुपया जमा केल्ले. उपरांत कार्यकारी अभियंत्याचे सुचोवणे प्रमाण डिसेंबर 2022 त आनीक 11.82 लाख रुपया भरले. पूण 11 हजार 184 रुपया 14 डिसेंबर 2023 ह्या दिसा मेरेन जमा जावंक नाशिल्ले. मार्च 2023 वर्सा ऑडिट निरिक्षणांक जाप दितना, कॅशियरान स्वता खातीर सरकारी निधी वापरला आनी ऑक्टोबर 2022 त ताका पदा वयल्यान काडला, अशें कार्यकारी अभियंत्यान मान्य केलां. पूण कॅगान ही जाप समाधानकारक ना, अशें नमूद केलें. कारण कसलीच शिस्तभंगाची कारवाय जावंक ना आनी फाटल्या अर्थीक वर्सां विशीं पुराय तपास जावंक ना. देखून आदल्या काळांत आनीक व्हड गैरवेव्हार जाल्ल्याची शक्यताय न्हयकारूंक शकना, अशें कॅगाक दिसता. दोशी अधिकाऱ्यांक बेगोबेग जापसालदार धरून शिस्तभंगाची कारवाय सुरू करची. मार्च, जून आनी ऑक्टोबर 2023 त हें प्रकरण गोंय सरकारा कडेन धाडलें तरी एप्रील 2024 मेरेन अधिकृत प्रतिसाद मेळूंक नाशिल्लो, अशें कॅगान अहवालांत म्हणलां. सरकारी खात्यांतली अर्थीक जापसालदारकी, पारदर्शकता आनी नियंत्रणांत गंभीर उणाव उक्ते जाल्यात आनी सरकारी निधीची राखण करपाक संस्थांनी सुदारणा करपाची गरज ‘कॅगा’न उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
