भांगरभूंय | प्रतिनिधी
-भलायकी मंत्री विश्वजीत राणेः 5 वर्सांचो आंकडेवारी सभाघरांत सादरपणजीः सोमारा विधानसभा सभाघरांत उलयतना भलायकी मंत्री विश्वजीत राणे हांणी स्पश्ट केलें, दक्षीण आनी उत्तर गोंय जिल्लो हॉस्पिटल, फोंडेंच्या उपजिल्लो हॉस्पिटला सयत प्राथमीक, शारी आनी समाजीक भलायकी केंद्रांनी उपचार घेतिल्ल्या 1,80,256 दुयेंतींतल्यान फाटल्या पांच वर्सांत 56 टक्के वा 1,00,872 दुयेंतींक उपचारा खातीर गोमॅकॉत धाडल्यात.
विरोधी फुडारी युरी आलेमांव हांणी प्रस्नोत्तर वरांत हो प्रस्न मांडलो. दक्षीण आनी उत्तर गोंय जिल्लो हॉस्पिटल, फोंडेंचे उपजिल्हो हॉस्पिटल तशेंच राज्यांतल्या प्राथमीक, शारी आनी समाजीक भलायकी केंद्रांनी दुयेंतींचेर उपचार करपाक गरजेच्यो सुविधा ना. दोतोर आनी हेर कर्मचारी फावो ते नात. देखून थंयच्यान दुयेंतींक उचारा खातीर गोमॅकॉत व्हेल्यां. फाटल्या कांय वर्सांत अशा दुयेंतींची संख्या वाडत आसा अशें युरी आलेांव हांणी सांगलें.
हे विशीं उलयतना मंत्री राणे हांणी सांगलें, गोंयांतल्या सगल्या सरकारी हॉस्पिटलांनी गरजेच्यो सुविधा स्थापन करपाचे आनी दोतोर आनी हेर कर्मचारी नेमपा खातीर सरकार यत्न करीत आसा.
तुमीय येयात, फुडलें सरकार घडोवया
युरी आलेमांव हांणी हल्लो करपाक सुरवात केल्या उपरांत विश्वजीत राणे लेगीत आक्रमक जाले. दर खेपे तुमी सत्तेर आयले उपरांत सगळें सुदारतले अशें म्हणटात. पूण सध्याच्या सरकारांतले अर्दे लोक तुमचेच आसात. तशेंच आमी फुडलेंय सरकार घडयतले अशें सांगून तुमी आमचे वांगडा येयात, सरकार घडोवपाचें आवाहनय केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
