भांगरभूंय | प्रतिनिधी
अादल्या तेंपार वखदां, वैजकी उपचार तितले प्रगत नाशिल्ले. ताका लागून देवी, प्लेग येवन शेंकड्यांनी लोक मरताले. आयज पसून गरीब देशांनी मलेरिया, डेंग्यू लोकांक संवसाराक आदेवश करपाक लायतात. पन्नाशी हुपचे पयलीं बरेच लोक मरताले. दुयेंसांची धाम पातळनाशिल्ली त्या वाठारांतले चडशे लोक मात रोगमुक्त आशिल्ले. म्हणजे आयज दिसता ताका गोडेंमुत, प्रेसांवाचें आसता, तशें त्या काळार नाशिल्लें. कारण लोक कश्टाचीं कामां करताले, चलून भोंवताले, भायलें खायनाशिल्ले. वेळार न्हिदताले, फांतोडेर उठ्ठाले. भलायकेची व्हडली समस्या उप्रासली जाल्यारुच तांकां धोको आसतालो. त्या काळार आयचे सारकी दरेके गजालीक गाडी भायर काडप, भायर खावप, नशा करप, वराचीं वरां टिव्ही पळोवप, मोबायल फोना वयली सोशल मिडीया धवळप हेंय जायनाशिल्लें. मात, आतां हींच कारणां दुयेंत पडपाक, अपघात जावपाक, भलायकी इबाडपाक जापसालदार थारल्यांत. ताका लागून सगल्याच हाॅस्पिटलांनी, भलायकी केंद्रांनी सदांच दुयेंतींची गर्दी दिश्टी पडटा. आनीक कांय वर्सांनी अत्याधुनिक वैजकी उपचार पद्दती आसून लेगीत मनीस पंचाहत्तरी हुपतलो, हाची खात्री कोणूच दिवपाक शकचो ना.
दक्षीण गोंयांत खाजगी हाॅस्पिटल सुरू करपा वयल्यान विधानसभेंत काल प्रस्नांचो शिंवर जालो. दक्षीण गोंय जिल्हो हाॅस्पिटलांतल्यान दुयेंतींक बांबोळे वा खाजगी हाॅस्पिटलांनी धाडपाचें प्रमाण वाडत आसा. थंय उपचाराच्यो गरजेच्यो साधनसुविधा नाशिल्ल्यान दुयेंतींक मनस्ताप सोंसचो पडटा, अशें विरोधकांनी सांगलें. फाटल्या चार वर्सांच्या काळांत 17,425 दुयेंतींक जीएमसींत धाडल्यात. अंदूं पयल्या स म्हयन्यांत 2389 दुयेंतींक जीएमसींत हालयल्यात, तर 71 जाणांक खाजगी हाॅस्पिटलांनी अशी आंकडेवारीच आमदारांनी सादर केली. सरकार जिल्हो हाॅस्पिटलाचें खाजगीकरण करपाक सोदता, असो आरोपूय तांणी केलो. हाचेर दक्षीणेंतल्या 75 टक्के दुयेंतींचेर जिल्हो हाॅस्पिटलांतूच उपचार जातात, अशें भलायकी मंत्र्यान सांगलें.
खरें म्हणल्यार सगलींच भलायकी केंद्रां सुसज्ज करपाचो आयज वेळ आयला. सांखळेच्या केंद्रांत अत्याधुनिक सुविधा आसात. थंय दोळ्यांचेर उपचार करपाक तर भायल्यान दुयेंती येतात. तशी सुविधा दरेका भलायकी केंद्रांत कित्याक आसची न्हय? 30- 35 वर्सां पयलीं सादें टिटानसाचें इंजेसांव पसून कांय वेळार भलायकी केंद्रांनी नासतालें. ताका लागून दुयेंतींक फुडल्या हाॅस्पिटलांत वच्चें पडटालें वा खाजगी दोतोरांक मेळचें पडटालें. आयज पसून दुयेंतीं मात्सो गंभीर जाल्यार ताका रोखडोच उत्तर, दक्षीण गोंय जिल्हो हाॅस्पिटलांनी धाडटात. थंयच्यान मागीर जीएमसींत. बांबोळे उपचार बरे जातात. खास करून काळजाच्या दुयेंतींचो विभाग दर्जेदार आसा. भलायकी चाचण्योय कांय दोतोर वाजेनासतना करतात. मात, एक- दोन कामगार, नर्शी वा दोतोरांक लागून पुराय जीएमसी बदनाम जाता…. आनी एकदां हें खत लागलें काय तें पुसून वचप बरेंच कठीण आसता. तरीय बरेच दुयेंती खाजगी हाॅस्पिटलां परस सरकारी हाॅस्पिटलां पसंत करपाक लागल्यात. हाचे फाटलें एक कारण म्हणल्यार म्हारगाय. भोंवतेकांक खाजगी उपचार अर्थीक नदरेन परवडनात. मात, सरकारी हाॅस्पिटलांनी तपासपाक गेल्यार उणोच अर्द आदेस दिवचो पडटा, अशें म्हणून जांकां परवडटा ते खाजगी हाॅस्पिटलांचीं सोंपणां चडटात.
दक्षीण गोंयांत खाजगी हाॅस्पिटल उबारपाच्या निर्णया मेरेन अजून सरकार येवंक ना. आमदार आनी थळाव्यांक विस्वासांत घेवनूच हे विशींचो निर्णय जातलो, अशें भलायकी मंत्र्यान म्हणलां. खाजगी हाॅस्पिटला खातीरची हालचाल जाल्यार दक्षीणेंत खर विरोध जातलो, हें मात निश्चीत. जायत्या सरकारी हाॅस्पिटलांनी, भलायकी केंद्रांनी उपकरणां आसात. पूण तीं चलोवपी कोण नासतात. कांय वेळार संबंदीत कर्मचारी एकलोच आसता आनी तो रजेर आसल्यार दुयेंतींक संबंदीत वैजकी चांचणी करपाक मेळना. तेन्ना लाखांनी रुपयांची मोलादीक यंत्रां चलोवपाक तंत्रज्ञ, कुशळ कर्मचारी सदांच उपलब्ध आसतले, हाचेर सरकाराक भर दिवचो पडटलो. साद्या उपचारां खातीर दुयेंतींक पेडणेंच्यान म्हापश्यां, म्हापशेंच्यान बांबोळे अशें वच्चें पडचें न्हय. गरजेच्यो चांचण्यो थंयच्या थंय करपा इतलें दरेक भलायकी केंद्र सुसज्ज जावंचें. 108 सेवेचो आंवाठ आनीक वाडपाचो वेळ आयला. कारण जायते फावट फोन करूनय गाडी जाग्यार नासता. ती कोणाक तरी हाॅस्पिटलांत घेवन गेल्ली आसता. रातच्या वेळार पसून हें घडटा. हाचो अर्थ गाडयो एकतर उण्यो आसात, नाजाल्यार दुयेंतींचो आंकडो वाडला. दुसरी शक्यताय चड. कारण वयर म्हणलां ते प्रमाण, आयज बारीक सारीक कारणां वयल्यान भलायकी इबाडपाचे प्रकार घडटात, इतलो मनीस दुबळो जाला. आसा त्या हाॅस्पिटलांतल्या खाटींचो, कर्मचाऱ्यांचो, दोतोरांचो, नर्शींचो आंकडो वाडोवप आनी दुयेंतींक गरजेच्यो वैजकी सुविधा लागचे लागीं मेळटल्यो हाची खबरदारी सरकारान घेवप, ही तांची लागणूक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
