भांगरभूंय | प्रतिनिधी
सगळ्यांत चड 103 पॅरा शिक्षक; मुळाव्या शाळांनी 75 शिक्षक
भांगरभूंय । प्रतिनिधी
पणजी : गोंयांतल्या सरकारी शाळांनी 580 शिक्षक कंत्राटी पद्दतीचेर काम करतात. तातूंतले कांय शिक्षक 13 ते 19 वर्सां सावन कंत्राटाचेर काम करतात. तांकां सेवेंत कायम करपा संबंदांत सरकारान कसलेंच धोरण तयार करूंक ना. ह्या 580 शिक्षकां मदीं सरकारी मुळाव्या शाळांतल्या 75 शिक्षकांचो आस्पाव आसा. शिक्षण खात्यान जारी केल्ल्या एका अहवाला प्रमाण ही म्हायती मुखार आयल्या.
जे 580 शिक्षक कंत्राटी पद्दतीचेर आसात, तातूंत सगळ्यांत चड 103 पॅरा शिक्षकांचो आस्पाव आसा. तातूंतले 63 शिक्षक 2006 सावन, जाल्यार हेर शिक्षक 2008 सावन कंत्राटी पद्दतीचेर काम करतात, अशें शिक्षण खात्यान अहवालांतल्यान सादर केल्ल्या वर्सां वयल्यान स्पश्ट जाता.
विद्यालयां, उच्च माध्यमिकां मदले कला शिक्षण प्रशिक्षक, कृशी शिक्षक, ऑटोमोबायल, बँकींग, ब्युटी आनी वेलनेस, बांदकाम, अलेक्ट्रॉनिक्स, भलायकी, आयटी, लॉजिस्टीक, प्लंबींगस, टुरिझम आनी हॉस्पिटॅलिटी हे सारके विशय शिकोवपी शिक्षकांचो कंत्राटी शिक्षकां मदीं आस्पाव आसा.
ह्या शिक्षकांक नोकरेंत कायम करपा संबंदांत सरकारान अजून कसलेंच धोरण तयार करूंक ना, अशें अहवालांत म्हणलां.
19 वर्सां सावन कंत्राटी पद्दतीचेर काम करता त्या पॅरा शिक्षकांनी सेवेंत कायम करपाची मागणी करून हे आदीं खूब खेपे आंदोलनां केल्यांत. पणजेच्या आझाद मैदानाचेर धरणें धरल्यात. ताची दखल घेवन सरकारान वेळावेळार तांच्या वेतनांत वाड केली, पूण तांकां अजून सेवेंत कायम करूंक ना, ताका लागून तांची निरशेवणी कायम आसा.
कंत्राटी पद्दतीचेर काम करपी शिक्षकांच्या प्रस्ना कडेन फाटल्या कांय वर्सां सावन गोंयांतल्या सत्ताधारी आनी विरोधी आमदारांनीय फाट केल्या. कांय वर्सां आदीं आमदार विजय सरदेसाय, दिगंबर कामत, आलेक्स रेजिनाल्ड हांणी पॅरा तशेंच हेर कंत्राटी शिक्षकांचो प्रस्न विधानसभा अधिवेशनांत मांडिल्लो. कंत्राटी पद्दतीचेर पांच वर्सां सेवा दिल्ल्या शिक्षकांक नोकरेंत कायम करपाची मागणी लेगीत तांणी लावन धरिल्ली. त्या वेळार मुख्यमंत्री डॉ. प्रमोद सावंत हांणी कंत्राटी शिक्षकांच्या ह्या प्रस्नाचेर विचार करपाची हमी सभाघरांत दिल्ली. पूण फाटल्या कांय अधिवेशनांत आमदारांक कंत्राटी शिक्षकांचो विसर पडिल्ल्याचें दिसून आयलां.
सरकारी शाळांनी सुमार 400 पदां रितीं
गोंयांतल्या सरकारी शाळांनी शिक्षकांची सुमार 400 पदां रितीं आसात. अशें आसून लेगीत मुळाव्या शाळांनी कंत्राटी पद्दतीचेर काम करपी 75 शिक्षकांक कायम करूंक नात. आतां सरकारी शाळांतल्या शिक्षकांचीं पदां कर्मचारी भरती आयोगा वरवीं भरतले. ताका लागून कंत्राटी शिक्षकांक लेगीत आयोगाची परिक्षा पास जावन निवड जाले उपरांतूच सेवेंत कायम जावपाक मेळटलें. इतलीं वर्सां काम करून सेवेंत कायम जावपाक शकले ना, अशी खंत साबार कंत्राटी शिक्षक उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
