भांगरभूंय | प्रतिनिधी
दामोदर मावजोः राजभास कायद्यांत दुरुस्ती करपाची गरज
मराठी धरून खंयचेच भाशेक विरोध ना, मात कायद्यांत मराठी नाका
भांगरभूंय । प्रतिनिधी
पणजी : सरकारी वेव्हारांत फकत कोंकणीचोच वापर जावचो. ते खातीर राजभास कायद्यांत दुरूस्ती जावपाक जाय. मराठी भाशेक विरोध नासलो तरी राजभास कायद्यांत तिचो उल्लेख आसपाक जायना. सरकारी वेव्हार, कायदे, अधिसुचोवण्यो हे सगळे कोंकणींतल्यान जावपाक जाय, अशें ज्ञानपीठ पुरस्कार जैतिवंत साहित्यीक दामोदर मावजो हांणी म्हणलां.
मुख्यमंत्री डॉ. प्रमोद सावंत हांणी कोंकणी कार्यशाळेंत कोंकणी आनी मराठींतल्या पत्र वेव्हाराक कोंकणी आनी मराठींतल्यान जाप दितलें, अशें स्पश्ट केलें. कोंकणी टायपींग शिकून कोंकणींतल्यान पत्रवेव्हार करपाचो उलो मुख्यमंत्र्यांनी मारलो. कोंकणी अणकारप्यांक खूब वाव आसा. हाका लागूक पदवीधरांनी कोंकणी भास शिकची, अशेंय तांणी म्हणलें.
हाचेर कोंकणी साहित्यीक आनी वावुरप्यां मदीं तरेकवार प्रतिक्रिया उक्तायतात. कोंकणीचे ज्येश्ठ साहित्यीक आनी ज्ञानपीठ पुरस्कार जैतिवंत दामोदर मावजो हांणी राजभास कायद्यांत दुरुस्तीची मागणी केल्या. कोंकणी ही गोंयची राजभास आसा. कोंकणीचो वापर सरकारी कामकाजांत जातलो. कोंकणी सयत मराठीचो वापर लेगीत करपाक हरकत ना, अशें राजभास कायद्यांत स्पश्ट केलां.
गोंयकार कोंकणींतल्या उलयतात. सगळ्यांक कोंकणी कळटा. हाका लागून कोंकणी ही राजभास जाल्या. जरी कोणी मराठींतल्यान पत्र बरयलें, जाल्यार ताका मराठींतल्यान जाप दिवची. इंग्लिशींतल्यान बरयलें जाल्यार इंग्लिशींतल्यान जाप दिवची. मात राजभास कायद्यांत जो मराठीचो उल्लेख आसा, ताची गरज ना. राजभास कायदो हो राजभाशेच्या वापरा खातीर आसा. हाका लागून कायद्यांत फक्त कोंकणीचो उल्लेख पुरो. मराठीचो उल्लेख नाका. हाचे खातीर राजभास कायद्यांत दुरुस्तीची गरज आसा, अशें मावजो हांणी स्पश्ट केलें.
जी भास ज्या राज्यांत उलयतात, ती राजभास आसा. महाराष्ट्रांत मराठी ही राजभास आसा. मराठी भाशेचे उदरगती खातीर ज्या गजालींची गरज आसा, त्यो गजाली महाराष्ट्रांत सुरू आसा. कोंकणी खातीर शब्दकोश, परिभाशा कोश तयार करपाचो वावर गोंय सरकाराक करचो पडटलो. मराठी वा हेर भाशां खातीर त्या, त्या राज्यांनी वावर सुरू आसा. भास म्हूण मराठीक विरोध करपाचो कसलोच हेतू हाचे फाटल्यान ना, अशें मावजो हांणी स्पश्ट केलें.
खूब वर्सां आदीं राजभास समितीची बसका जाली. वांगडी म्हूण आपूण ते बसकेक हाजीर आशिल्लो. बसकेत मराठीच्या प्रतिनिधीन मराठींतल्यान शब्दकोश, परिभाशा कोश जावपाची मागणी केली. मराठींत शब्दकोश, परिभाशा कोश आसा. ते वेगळे करपाची गरज ना. कोंकणी खातीर ना, म्हूण ते करपाक जाय, इतली गजाल हांवें बसकेंत सांगली. राजभास कायद्यांत मराठीचो उल्लेख आशिल्ल्यान मराठी भाशेचो प्रतिनिधीचो समितीचेर आस्पाव जाता, अशी गजाल तांणी सांगली.
1987 सावन कोंकणीक राजभास दर्जो मेळ्ळे उपरांत आयिल्ल्या दरेक मुख्यमंत्री आपल्या कार्यकाळांत प्रशासकीय पांवड्यार राजभाशेची अंमलबजावणी करपा खातीर कृती आराखडो जाहीर करता. पूण हें कार्य वेगवेगळ्या कारणांक लागून आडखळून उरता. सरकारी कर्मचाऱ्यांक कोंकणी टायपींग आनी बरोवपाचें प्रशिक्षण दिवप ही येवकार दिवपा सारकी गजाल, पूण फुडें कितें? हे विशीं सरकार गंभीर आसपाक जाय, अशें ज्येश्ठ पत्रकार पत्रकार संदेश प्रभुदेसाय हांणी सांगलें.
गोंयचें राजपत्र अजून मेरेन अस्तिवांत येना. ह्या घोशणेचो मुख्यमंत्र्यांनी नियाळ घेतला काय असो प्रस्न उपस्थीत करून मुख्यमंत्र्यांनी हाका पुराय वेळ दिवपाची गरज आसा अशें प्रभुदेसाय हांणी सांगलें. तशेंच कॅबिनेट दर्जाचो राजभास आयुक्त नियुक्त करपाची गरज आसा, असोय सल्लो तांणी दिला.
लोकांचें चेपण गरजेचें
राजभास कायदो जावन खूब वर्सां जालीं. तरी फावो त्या प्रमाणांत सरकारी वेव्हारांत कोकणीचो वापर जायना. सरकारान कोंकणीच्या वापराक प्राधान्य दिलें ना. लोकांचे चेपण नाशिल्ल्यान हे गजाली कडेन आतां मेरेनच्या सगळ्या सरकारांनी आडनदर केली. खंयची गजाल जावपाक जाय, जाल्यार सरकाराचेर लोकांचे चेपण आसप गरजेचें, अशेंय मत दामोदर मावजो हांणी मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
