भांगरभूंय | प्रतिनिधी
डॉ. दिव्या राणेः वाळपय, पर्ये मतदारसंघांतल्या 250 जाणांक भेटयलीं लाडली लक्ष्मीचीं मंजुरीं पत्रां
भांगरभूंय । प्रतिनिधी
वाळपयः सरकाराच्यो खूबश्यो कल्याणकारी येवजण्यो आसात, मात त्यो गांवगिऱ्या वाठाराच्या निमाण्या पोता मेरेन पावपाक जाय. ते खातीर गांव पांवड्याचेर काम करपी सरपंच, पंच, नगरसेवक हांची भुमिका म्हत्वाची आसता. तांणी अशा घटकांचो सोद घेवन तांकां विवीध येवजण्यांचो लाव घेवपा खातीर मजत करची, असो उलो पर्ये मतदारसंघाची आमदार डॉ. दिव्या राणे हांणी मारलो.
वाळपय आनी पर्यें मतदारसंघांतल्या वट्ट 250 जाणांक लाडली लक्ष्मीच्या मंजुरी पत्रांच्या वितरण सुवाळ्यांत डॉ. राणे उलयताली. वाळपय कार्यालयांत ही कार्यावळ घडोवन हाडिल्ली. ह्या वेळार दोनूय मतदारसंघांतले सरपंच, पंच, वाळपयची नगराध्यक्ष, नगरसेवक हाजीर राविल्ले.
सत्तरी म्हालांत आतां मेरेन व्हड प्रमाणांत लाडली लक्ष्मीच्या प्रस्तावांक मंजुरी मेळ्ळ्या. सरकारान आनी ह्या खात्याचे मंत्री विश्वजीत राणे हांणी सत्तरी म्हालांतल्या 250 प्रस्तावांक मंजुरी दिल्या. ताका लागून फुडल्या कांय दिसां भितर हे संबंदांतली रक्कम दरेका लाबार्थीच्या खात्याचेर जमा जातली. लाडली लक्ष्मी येवजणे खाला दरेका लाबार्थीच्या खात्याचेर जमा जातली. हे येवजणे खाला दरेके चलयेक एक लाख रुपयांची अर्थीक मजत मेळटा, अशें डॉ. राणे हांणी सांगलें.
समाजाचे सर्वांगी उदरगती खातीर दरेका घटकाची उदरगत जावप गरजेची. ते नदरेन भाजपा सरकार काम करता. फुडारांत लेगीत हे येवजणेचो लाव घेवचे खातीर दरेके चलयेन प्रस्ताव सादर करचे, अशें डॉ. राणे हांणी सांगलें.
ह्या वेळार आमदार डॉ. दिव्या राणे हांचे हस्तुकीं सगळ्या मंजुरी पत्रांचें वितरण केलें. तातूंत वाळपय मतदारसंघांतल्या वाळपय पालिका, सांवड्डें पंचायत, नगरगांव पंचायत, गुळेली पंचायत, खोतोडें पंचायत, उसगांव पंचायत हांचो आस्पाव आसा. जाल्यार पर्यें मतदारसंघांतल्या केरी पंचायत, पर्यें पंचायत, मोर्लें पंचायत, पिसुर्लें पंचायत, होंडा पंचायत, भिरोंडें पंचायत, ठाणें पंचायत हांचो आस्पाव आसा.
नगराध्यक्ष सेहझिन शेख हांणी सांगलें, लाडली लक्ष्मी येवजणेक लागून आयज दरेका कुटुंबाक फायदो जाला. खूब जाणांची अर्थीक स्थिती दुबळी आसता. तांकां लग्न सुवाळ्या वेळार अशे तरेची मजत मेळप हो व्हड आदार आसता. फुडारांत लेगीत हे येवजणेचो लाव घेवचे खातीर संबंदितांनी आपले प्रस्ताव तयार करून सरकाराक सादर करचे, अशी विनवणी तांणी केली. म्हावूसचे सरपंच सोमनाथ काळे हांणी सांगलें, विश्वजीत राणे हांणी सत्तरी म्हालांतल्या दरेके पंचायत पांवड्याचेर सादर केल्ल्या प्रस्तावांक मंजुरी दिल्ली. ताका लागून ह्या मंजुरी पत्रांचें वितरण जालें. खूब जाणांनी रीण काडून चलयांचीं लग्ना लावन दिल्यांत, ते ह्या रकमेच्या माध्यमांतल्यान रिणांतल्यान मेकळे जातले, हे खातीर तांणी सरकाराचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
