सरकारी येणावळ बुडोवपी टॅक्सी धनयांक सोदतात

भांगरभूंय | प्रतिनिधी

4 परस चड टॅक्सी आशिल्ल्या 263 धनयांक जीएसटी खातीर नोटिसो

भांगरभूंय । प्रतिनिधी

पणजी : गोंयांत 4 परस चड टॅक्सी आशिल्ल्या टॅक्सी धनयांक वेवसायीक शुल्क खात्यान जीएसटी खातीर नोटिसो जारी केल्यात. आतां मेरेन 263 टॅक्सी धनयांक नोटिसो जारी जाल्यात. जीएसटी शुल्काची तपासणी जावन नेमा प्रमाण तांचेर कारवाय जातली, अशी म्हायती वेवसायीक शुल्क खात्यांतल्या गोपांनी दिली.

गोंयांत 18 हजार प्रवासी टॅक्सी आसात. रस्तो, परवानो, जीएसटी मेळून वर्साक 100 कोटींची येणावळ सरकाराक येवपाक जाय. येरादारी खात्याचे मंत्री मॉवीन गुदिन्हो हांणी विधानसभेंत ही म्हायती दिल्या. प्रवासी टॅक्सींतल्यान सरकाराक इतली येणावळ मेळना. खूब जाणां कडेन 4 परस चड प्रवासी टॅक्सी आसात. एकाच धनया कडेन 4 परस चड टॅक्सी आशिल्ल्यांचो सोद घेवप सुरू आसा. कांय जाणां कडेन 15 ते 20 टॅक्सी आशिल्ल्याची म्हायती मेळ्या. ह्या सगळ्यांच्या शुल्काची तपासणी जातली. जे कोण शुल्क फारीक करिनात तांचेर कारवाय जातली. मुख्यमंत्री डॉ. प्रमोद सावंत हांचे आदेशा प्रमाण ही कारवाय सुरू जाल्या.

जांचे कडेन 4 परस चड टॅक्सी आसात, त्या सगळ्या टॅक्सीं खातीरचो जीएसटी फारीक करिनात. हाका लागून सरकाराची येणावळ बुडटा. शुल्काच्या माध्यमांतल्यान सरकारची येणावळ बुडोवपी टॅक्सी धनयांचो सोद घेवप सुरू आसा.

सरकारान गोवा मायल्स टॅक्सी अॅप सेवा सुरू केल्या. गोवा मायल्साच्यो 1500 टॅक्सी आसात. ह्या 1500 टॅक्सींतल्यान सरकाराक वर्सुकी 8.5 कोटींची येणावळ येता. तुळेन गोंयांतल्या प्रवासी टॅक्सीकारां कडल्यान फावो त्या प्रमाणांत येणावळ येना. शुल्क फारीक करपात टॅक्सीकारां मदीं शिस्त निर्माण जावची, म्हूण सरकारान हो खटाटोप सुरू केला.

नोटिशीक जाप दिल्या उपरांत दरेकी टॅक्सी धनयाची अधिकाऱ्या मुखार सुनावणी जातली. दरेकी टॅक्सी खातीरच्या शुल्काच्या पावत्यो सादर करच्यो पडटल्यो. जीएसटी सारको फारीक करूंक ना, तांचेर कारवाय जातली. कांय टॅक्सी धनयांचो वर्साचो वेवसाय 20 लाखां परस चड आसा. वेवसायाच्या प्रमाणांत टॅक्सीकार शुल्क उणें फारीक करतात, अशें निरिक्षण आसा.

थळाव्या टॅक्सीकारांचो गोवा मायल्स टॅक्सी सेवेक विरोध आसा. गोवा मायल्स टॅक्सी सेवा बंद करची म्हूण टॅक्सीकारांनी खूब खेपे आंदोलनां केल्या. तांच्या आंदोलनाक अजून मेरेन येस येवंक ना. पुराय संवसारांत अॅप टॅक्सी सेवा सुरू आसा. पर्यटक तशेंच हेर प्रवाशांक योग्य दरांत टॅक्सी सेवा मेळपाक जाय म्हूण गोवा मायल्स सेवा सुरू केल्या, अशें येरादारी मंत्री मॉवीन गुदिन्हो हांणी स्पश्ट केलां. दोन म्हयन्या पयलीं मोपा विमानतळा वयल्या टॅक्सीकारांनी तरेकवार मागण्यां खातीर आंदोलन केल्लें. गोंयांतल्या टॅक्सीकारां आड पर्यटक तशेंच हेर लोकांच्यो लेगीत खूब कागाळी आसात. हे फाटभुंयेर टॅक्सीकारांच्या जीएसटी शुल्काच्या तपासणेची प्रक्रिया सरकारान सुरू केल्या.