भांगरभूंय | प्रतिनिधी
गोंय हें पर्यटन थळ आशिल्ल्यान हांगा सहल, भोंवडेर हजारांनी लोक दर म्हयन्याक येतात. तशेंच लग्न, लग्नाचो- भुरग्यांचो वाडदीस मनोवपाकूय भायल्यान लोकांची सहकुटुंब, सहपरिवार भिरीं येतात. जायते गोंयकारुय फुलां, बारसो, संवसार पाश्टी, वाडदीस मोठ्या प्रमाणांत करतात. हें करपाक अर्थांत गोंयचीं हाॅटेलां वा हाॅल आसातूच. थंय दुडू दिल्यार सगली वेवस्था करतात. म्हणल्यार तुमी फक्त वचपाचें. वांगडां कांयच व्हरपाची गरज ना. सजावट, संगीत, जेवण, फोग सगली- सगली आयोजकांची जापसालदारकी. हें करपी गोंयांत जायते वेवसायीक आसात. कांय इव्हेंट मॅनेजमेंट कंपनीय आसात. मात, फाटल्या कांय वर्सां सावन कांय भायल्यो कंपनींय हांगा येवपाक लागल्यात. कायदेशीर मार्गान त्यो आयोजन करतात, जाल्यार तांकां आडावपाक मेळना. पूण, थोड्यो कसलीच सरकारी परवानगी घेनासतना गोंयांत येवन सुवाळे करपाक लागल्यात. हें चुकीचें. हालींच फात्राडे दर्यावेळे लागसार एका रिसोर्टांत असोच एक लग्नसुवाळो जालो, तेन्ना तो आयोजीत करपी इव्हेंट मॅनेजमेंट कंपनीन सरकारी यंत्रणांचे परवाने घेवंक नाशिल्ल्याचें उक्ताडार आयलां. ही लग्नाचें आयोजन करपी कंपनी गोंयां भायली.
असल्यो जायत्यो कंपनी गोंयांतल्या एजंटां वरवीं सरकारी कचेऱ्यां कडेन संपर्क करून परवाने घेतात. पूण कांय कारणाक लागून ते मेळूंक नात जाल्यार त्यो फाटीं सरनात. सुवाळो करपाक सोदप्या कडल्यान लाख घेतिल्ले आसतात, म्हणटकच गुपचूप सुवाळो करून त्यो गायब जातात. ही कंपनीय सुटपाची. पूण, फोग मारलो आनी सगलें भायर सरलें. रातच्या आठ वरांचेर साबार रंग शिंवरपी, वेगवेगळे आवाज करपी फोग मळबांत फुटलो. तो नेमको लायटीच्या सरयां कडेन. कितेंय जाल्लें जाल्यार लोकांचें जिवीत धोक्यांत येवपाचें. तशेंच पर्यटक रावतात, त्या दर्यावेळे वयल्या इमारती, रिसोर्टां लागसार शुटिंगा खातीर ड्रोनाचो वापर केलो. सरकारी आदेश माड्डुवपाचो हो प्रकार जालो, म्हूण कोलवेंच्या पुलिसांनी कारवाय केली. तेन्ना हो लग्नसुवाळो आयोजीत करपाक परवानेच घेवंक नाशिल्ल्याचें उक्ताडार आयलें खंय. आतां पुलिसांनी इव्हेंट मॅनेजमेंट कंपनी आड गुन्यांव नोंद केला. अर्थांत दंड भरतकच प्रकरण फायलींत बंद जातलें. सोंपतलें. पूण पुलिसांनी, हाचे मुखार जंय असले हे सुवाळे जातात, थंय चवकशी केल्यार बरी. खुद्द त्या रिसोर्टांनी, लग्नां करपी कुटुंबांनीय आयोजनाचें काॅण्ट्रेक्ट दिल्ले कंपनीन सरकारी परवाने घेतल्यात काय नात, हें तपासून पळोवपाचो आतां वेळ आयला. नाजाल्यार एकलो करता पाप आनी भलतोच दिता जाप अशें जावं शकता. एकल्याचे चुकीक लागून भलत्यांकूच त्रास, मनस्ताप जावं येता. कारण नासतना बऱ्या हाॅटेलाचें, रिसोर्टाचें नांव बदनाम जावं येता. फक्त लग्नाचे वा वाडदिसाचे सुवाळेच न्हय, तर हेर कार्यावळींचेरुय नदर दवरपाक जाय. कारण, परवाने घेना जाल्यार सरकाराक लुकसाण जातलें. तिजोरेक बुराक घालपी ह्या कोळहुंदरांचो बंदोबस्त जावंक जाय. तांकां हेर कोण कोळहुंदीर सामील आसात जाल्यारुय ताची चवकशी जावंक जाय.
गोंयांत येवप्यां मदीं अतिगिरेस्त लोकांचोय अर्थांत आसपाव आसता. फिल्मस्टार, उद्देजक, खेळगडे गोंयांत वैयक्तीक सुवाळे आयोजीत करतात, तेन्ना कोट्यांनी रुपयांचो धुंवर करतात. ताचें आयोजन करपी भायली कंपनी आसली आनी तिणें कसलोच परवानो घेवंक ना जाल्यार मागीर कंपनींचो फायदोच फायदो. खरें म्हणल्यार लाखांनी घेवपी ह्या कंपनींनी सोंपेपणी परवाने घेवं येतात. न्हय तांणी ते घेवपाकूच जाय. दुसरी गजाल, फोग, संगीताची. फोग मारतना तो मेकळ्या मैदानाचेर मारपाक जाय. भरवस्तींत, लायटीच्यो सरयो आसात थंय तो मारलो आनी कसलीच दुर्घटना जाली जाल्यार तें कितल्याक पडूं येता, हाचोय विचार जावंक जाय. संगीताची कार्यावळ आसल्यार लोकांक त्रास जातलो, इतलो आवाज आसपाक जायना. रातच्या 10 वरांचेर तो बंद जावचो. तसो कायदोच आसा. मात, राज्यांत बरेच खेप कायदो खुटयाळ्याक लावपाचे प्रकार जातात. हाका कोण जापसालदार हो वादाचो विशय. सरकारी यंत्रणा जितल्यो सदळ रावतल्यो तितल्यो ह्यो भायल्यो इव्हेंट मॅनेजमेट कंपनीं आमच्या माथ्यार मिरयां वाट्टल्यो. तेन्ना हाचे मुखार सगल्यांनीच सादूर रावचें पडटलें. पयशे करपाक सगल्यांनी गोंयांत येवचें, पूण कितें करतात तें कायद्यान करचें. गोंय म्हणजे धर्मशाळा न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
