भांगरभूंय | प्रतिनिधी
पणजी ः महाविद्यालयांतल्या विद्यार्थ्यांक विशयाचेर अतिरिक्त तशेंच वेवसायीक गिन्यान मेळचें ह्या हेतून आतां सरकारी म्हाविद्यालयांनी तज्ञ आनी वेवसायीकांचीं व्याख्यानां जातलीं. हे खातीर उच्च शिक्षण संचालनालयान पात्र मानेस्तांची नेमणूक करतले. उपरांत व्याख्यात्यांची खाशेली वळेरी तयार करतले. हे वळेरेतले मानेस्त वेगवेगळ्या म्हाविद्यालयांनी व्याख्यानां दितले.
ही म्हायती उच्च शिक्षण संचालनालयांतल्या सुत्रां कडल्यान मेळ्ळ्या. बँकींग, वेपार, उद्देग, फार्मासी, आयटी, संगणक, पर्यावरण मळार तशेंच वेगवेगळ्या प्रकल्पांत धा वर्सां काम करपाचो अणभव आशिल्ले अधिकारी वा तज्ञ व्याख्यानां दिवपाक पात्र आसात. ते खातीर तांकां उच्च शिक्षण संचालनालयात अर्ज करुन सविस्तर म्हायती दिवची पडटली. ज्या व्यक्तींनी एका विशयांत डॉक्टरेट (पीएच.डी.) पदवी मेळयल्या आनी त्या विशयांत खाशेलें योगदान दिलां ती व्यक्तीय व्याख्यानां दिवपाक पात्र थारता. फकत तांणी प्रमाणपत्रां वा योगदानाचे दाखले सादर करप गरजेचें. इत्सूक उमेदवारांनी प्रमाणपत्रां सयत 12 मार्चा मेरेन उच्च शिक्षण संचालनालयाच्या कार्यालयांत अर्ज सादर करचो, अशें कळयलां.
अर्जांचेर विचार करून सरकार व्याख्याना खातीर तज्ञांची निवड करतले. हे तज्ञ वा जाणकार सरकारी म्हाविद्यालयांनी वचून व्याख्यानां वा प्रशिक्षण दितले. व्याख्यानां वा प्रशिक्षणाक मानधन दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
