भांगरभूंय | प्रतिनिधी
पणजीः भलायकी खात्यान 2000 वर्सा सुरू केल्ले गोंय मेडिक्लेम येवजणेंत बदल जाला. हाचे प्रमाण सरकारी हॉस्पिटल सोडल्यार खाजगी सुपर स्पेशॅलिटी हॉस्पिटलांतल्या उपचारांक पांच लाख रुपया मेरेन मजत मेळटली. पयलीं ही रक्कम 1.50 लाख रुपया आशिल्ली. हाचे भायर हे येवजणे खातीर वर्सुकी कुटुंब उत्पन्नाची मर्यादा 1.50 लाख रुपयां वयल्यान 8 लाख रुपया मेरेन वाडयल्या. हाचो फायदो चड लोकांक जातलो.
हे येवजणे प्रमाण सरकारी हॉस्पिटलांत दुयेंसाचेर उपचार मेळना जाल्यार राज्यांतल्या वा राज्या भायर खाजगी हॉस्पिटलांत उपचार करपाक मेळटा. हाचे प्रमाण प्रगत शस्त्रक्रिया, प्लास्टीक सर्जरी, सांधे बदलप, अस्थीमज्जा प्रत्यारोपण, हृदयविकाराची शस्त्रक्रिया, उक्त्या काळजाची शस्त्रक्रिया, तंत्रीक शस्त्रक्रिया अशा वेगवेगळ्या वैजकी उपचार पद्दतीं खातीर अर्थीक मजत दितात. हातूंत गोंयांतली 15, महाराष्ट्रांतली 12, कर्नाटकांतली 5 आनी हेर राज्यांतल्या 7 खाजगी हॉस्पिटलांचो आस्पाव जाता.
येवजणे खातीर पात्र थारपा खातीर व्यक्ती फाटलीं 15 वर्सां वा ताचे परस चड काळ गोंयचो रहिवासी आसूंक जाय. तशेंच गोंयच्या मतदार वळेरेंत ताचें नांव आसप गरजेचें. तशेंच पुराय कुटुंबा खातीर वर्सुकी 8 लाख रुपया अर्थीक मर्यादा आशिल्ल्या मनशाक हे येवजणेचो लाव घेवंक मेळटा. हे येवजणेचो लाव घेवपा खातीर गोंय पॉलिटेक्निक विद्यापिठाच्या अधिक्षका कडल्यान उल्लेख केल्ल्या दुयेंतीचेर गोंय सरकारी हॉस्पिटलांत उपचार करपाक मेळचे नात अशें प्रमाणपत्र घेवप गरजेचें आसा. ह्या प्रमाणपत्राच्या आदाराचेर भलायकी खात्याचो संचालक मेडिक्लेम प्रमाणपत्र जारी करपाची प्रक्रिया सुरू करतलो.
हाचे उपरांत दुयेंती वा तांच्या कुटुंबांक येणावळीच्या पुराव्या वांगडा भलायकी संचालनालयांत येवजणे खातीर अर्ज करचो पडटा. कागदपत्रांची चवकशी केल्या उपरांत भलायकी संचालक त्या हॉस्पिटलाच्या प्रशासनाक पत्र धाडटलो. हाचे उपरांत भलायकी खात्याचो विमो विभाग त्या हॉस्पिटलाचे उपचार शुल्क भरतलो. मेडिक्लेम प्रमाणपत्र मेळयनासतना दुयेंतीक राज्या भायल्या हॉस्पिटलांत व्हरचें पडटा अशा आणीबाणीच्या वेळार दुयेंतीच्या कुटुंबांतल्या वांगड्यांक थेट भलायकी संचालकाक अर्ज करपाक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
