भांगरभूंय | प्रतिनिधी
भांगरभूंय । प्रतिनिधी
पणजीः राज्यांतल्या सरकारी प्राथमीक शाळेंतल्या विद्यार्थी गळटेक बालरथ लेगीत कारणीभूत आसात अशें शिक्षण संचालक शैलेश झिंगडे हांणी पत्रकारांक सांगलां.
विद्यार्थी गळटेक जायतीं कारणा आसलीं तरी विद्यार्थ्यांक हाड-व्हर करपा खातीर सुरू केल्ले बालरथ तातूंतलें मुखेल कारण आसा अशें सांगतना सरकारान फकत माध्यमीक शाळांतल्या विद्यार्थ्या खातीर बालरथाची सुविधा केल्या. मात तांच्या वांगडा तांची प्राथमीक शिक्षण घेवपी भावंड्याय येतात. पालकांक आपल्या भुरग्यांक शाळे मेरेन वचपा-येवपा खातीर वाहन मेळिल्ल्यान ते त्या माध्यमीक विद्यालयांत आशिल्ल्या प्राथमीक विभागांत आपल्या भुरग्यांक घालपाक लागल्यात ताका लागून सरकारी प्राथमीक शाळेंत भुरग्यांक व्हरपा- हाडपाचें काम तांका करचें पडटा अशें झिंगडे हांणी सांगलें.
प्राथमीक शिक्षक विद्यार्थ्यांक बरे भशेन शिकयतात असो दावो तांणी केलो. शाळांनी ऑनलायन संवादा खातीर सुविधा कित्याक ना ह्या प्रश्नाक जाप दितना तांणी सांगलें की 718 प्राथमीक शाळांतत चडश्या शाळांनी दोन वर्ग कुडी आसतात. कांय कडेन वीज पुरवणेचो प्रश्न आसता. ताकां कम्प्युटर दिल्यार ते चोरयेक वचपाची शक्यताय आसता. सुविधा दिवपाक जाता मात तशी विद्यार्थ्यांची संख्या आसप गरजेचें आसता.
सध्या आशिल्ले बालरथ जाय तितले नात. तांची देखरेख करप कुस्तार जाता. कोरोनाक लागून दोन वर्सा शाळा बंद आशिल्ल्यो. ताका लागून बालरथांचे टायर बदलचे पडले अशें तांणी सांगलें. शाळांच्या विलिनीकरणाची प्रक्रिया सुरू केली ना, नवें शिक्षणीक धोरण चालीक लावपा खातीर पयली पूर्व प्राथमीक वर्ग आनी पलली ते तिसरी हाचो एक वर्ग गट करचो पडटलो. वर्ग कुडी वाडोवच्यो पडटल्यो. ताचेर सध्या चर्चा सुरू आसा अशें झिंगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
