भांगरभूंय | प्रतिनिधी
सर्वसामान्य प्रशासन खात्या वतीन अधिसुचोवणी जारी
भांगरभूंय | प्रतिनिधी
पणजी : गोंय सरकारान दर वर्सा 16 जानेवारीक ‘ओपिनियन पोल डे’ म्हणल्यारूच ;जनमत कौल दीस’ राज्य पांवड्यार सरकारी कार्यावळ म्हूण मनोवपाचो म्हत्वाचो निर्णय घेतला. हे संबंदीची अधिसुचोवणी सामान्य प्रशासन खात्यान मंगळारा जारी केल्या.
विरोधी पक्ष फुडारी युरी आलेमांव हांणी जुलय 2024 त जनमत कौल दीस मनोवपा संबंदी विधानसभेंत खाजगी थाराव सादर केल्लो. राज्य पांवड्यार सरकारी कार्यावळ म्हूण हो दीस मनयतले अशें मुख्यमंत्री डॉ. प्रमोद सावंत हांणी जाहीर केल्लें. मजगतीं, मंगळारा एका वर्साच्या काळा उपरांत सामान्य प्रशासन खात्याचे अवर सचीव श्रयस डिसिल्वा हांणी अधिसुचोवणी जारी करून 16 जानेवारीक राज्य पांवड्यार जनमत कौल दीस म्हूण मनयतले आनी 2025-26 ह्या अर्थीक वर्सा सावन म्हणल्यार जानेवारी 2026 सावन राज्य पांवड्यार दर वर्सा ‘जनमत दीस’ मनयतले आनी राजभास संचालनालय हे खातीर नोडल विभाग म्हूण काम करतले, अशें म्हणलां. कार्यावळीचे तयारेची जापसालदारकी ह्या खात्याचेर आसतली.
16 जानेवारी 1967 दिसा गोंयांत इतिहासीक जनमत चांचणी जाल्ली. लोकांनी दिल्ल्या मतांक लागून गोंय महाराष्ट्रांत विलीन जावपा पसून वाटावलें. ह्या सार्वमतांक लागून आयज गोंय स्वतंत्र राज्य जालां. हो दीस गोंयची अस्मिताय आनी लोकशाय मूल्यांचें प्रतीक मानतात आनी ताका लागून राज्यभर सरकारी पांवड्यार तो मनोवचो म्हूण मागणी जायत आशिल्ली. ह्या अर्थीक वर्सा 16 जानेवारी (2026) हो दीस सरकारी कार्यावळ म्हूण जनमत कौल दीस मनयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
