भांगरभूंय | प्रतिनिधी
भांगरभूंय । प्रतिनिधी
दिवचलः सरकार तरणाट्यांच्या कुशळताय शिक्षणा खातीर यत्न करता. ताका राज्यांतल्या तरणाट्यांनी प्रतिसाद दिवपाची गरज आसा. फुडाराक सरकारी नोकऱ्यां खातीत फकत पदवी आनी पदविका प्रमाणपत्र चलचें ना. अणभव तशेंच प्रशिक्षण आनी कुशळताय शिक्षण आसप सक्तीचें जातलें. ताका लागून तरणाट्यांनी आपल्या गुणांक कुशळतायेची जोड दिवंन फुडाऱ्यांतले सर्तीक तोंड दिवपा खातीर आतां सावन तयारेक लागचें अशें आवाहन मुख्यमंत्री डॉ प्रमोद सावंत हाणी केलां.
साखळी सरकारी म्हाविद्यालयांत कुशळताय उदरगत वाचपघराचें उक्तावण करपाचे कार्यावळींत ते उलयताले. वेर्णा उद्देगीक वसणुकेतल्या पुट्मायस्टर कॉन्सट्रेट्स मिशिन्स कंपनी वतीन गोंयांत कुशळताय शिक्षणा वांगडा वेल्डिंग गुण शिक्षणा खातीर समजिकायेची कबलात केल्या. तिचे वरवी पणजी आयटीआयांत सगल्यांत पयलीं साधन-सुविधा आनी शिक्षण दितले. ताका मेळपी प्रतिसाद पळोवन उपरांत दिवचल आनी वास्को आयटीआयत व्हो उपक्रम चालीक लायतले. वेल्डिंग कामाचें प्रशिक्षण आधुनीक पद्दतीन दिवपा खातीर व्हो उपक्रम कंपनीन हातांत घेतला.
मुख्यमंत्री डॉ सावंत हांचे उपस्थितींत समजिकायेचे कबलातीचर सयो केल्या. ह्या वेळार गोंय सीएसआर अधिकारिणीचो प्रधान सल्लागार डॉ गुरुराज कंपनीचो वेवस्थापकीय संचालक कंजनभा भट्टाचार्य, जीडीपी फावंडेशनाचो वेवस्थापकीय विश्वस्त किशोर शाह, सीए संदेश प्रभू खानोलकार, अर्थीक विभागाचे मुखेली रचीत अरोरा, कुशळताय उदरगत शिक्षण खात्याचो संचालक एस एस गांवकार, उच्च शिक्षण संचालक भूषण सावयकार, प्राचार्य मेंडीस हाजीर आशिल्ले.
हे कार्यावळींत वेल्डिंग गुणात्मक शिक्षणाचेर अभ्यास प्रकल्प राज्यांतल्या तीन आयटीआयांत चालीक लायतले. ताची आखणी जीडीपी फावंडेशनात केल्या. ताचे वरवीं वेल्डिंग प्रशिक्षणार्थींचीं तांक, साधनसुविधा, नैपुण्य हाची पुराय म्हायती घेतले. गोंयांत आनी गोंयां भायर आशिल्ली मागणी मतींत घेवंन विशेश तज्ज्ञां वतीन ह्या अभ्यासक्रमांत फावो ते बदल पुट्झमायस्टर कंपनी करतली. हे पुराय प्रक्रिये खातीर 30 लाख रुपयाची तजवीज कंपनीन केल्या. नव्या प्रशिक्षणा खातीर सुधारीत साधनसुविधा बेगीत तयार करपाची अपेक्षा आसा. पयल्या 20 प्रशिक्षणार्थींच्या गटाक प्रशिक्षण दिवपाक सुरवात करतले. 31 जानेवारीक ह्या अभ्यासक्रमाक सुरवात करतले. पयलो गट जून म्हयन्यांत प्रशिक्षण घेवंन भायर पडटलो. तांका पुट्झमायस्टर कंपनी आपल्या प्लांटांत कामाक घेतली अशी म्हायती ह्या वेळार दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
