भांगरभूंय | प्रतिनिधी
पणजीः सरकारी नोकरे खातीर कोंकणीचें गिन्यान सक्तीचें आसा. देखून ते विशींचें अधिकृत प्रमाणपत्र गोंय कोंकणी अकादेमी १ जानेवारी सावन दिवपाक सुरवात करतली. हे खातीर इत्सुकांची कोंकणी भास तपासपा खातीर चाचणी घेतले. गोंय सरकार हे विशींची अधिसुचोवणी बेगेनूच उजवाडाक हाडटलें, अशी म्हायती गोंय कोंकणी अकादमीचे अध्यक्ष वसंत सावंत हांणी दिली.
हे विशीं म्हायती दिवपाक अकादेमीन शणै गोंयबाब सभाघरांत पत्रकार परिशद घेतली. ह्या वेळार अध्यक्ष सावंत आनी दत्तू नायक हांणी म्हायती दिली.
राज्य आनी केंद्र सरकारांतल्या नोकरे खातीर कोंकणी भास सक्तीची केल्ल्यान बरेचशे लोक कोंकणी अकादेमी कडेन कोंकणी गिन्यानाच्या प्रमाणपत्राची मागणी करपाक लागल्यात. तांचे कडेन कोंकणीचें शिक्षण ना. पूण कोंकणी उलोवपाक वा बरोवंक कळटा अशें प्रमाणपत्र अकादेमी दिता असो समज तांचे मदीं जाल्लो, अशें सावंत हांणी सांगलें.
काय वर्सां पयलीं अकादेमी कोंकणी गिन्यान प्रमाणपत्र दिताली. मात कांय कारणांक लागून तें बंद दवरिल्लें. मात आतां ही प्रक्रिया परत चालीक लावपाक आमी आमचे वरीश्ठ आनी सरकारा कडेन उलयल्यात. कांय मार्गदर्शक तत्वां घालून तीन पांवड्यांनी हें प्रमाणपत्र दिवपाचें आमी थारयलां. सगळी औपचारीकताय करून आमी वरीश्ठां कडेन तशेंच सरकारा कडेन धाडल्या. अधिसुचोवणी आयले उपरांत आमकां प्रमाणपत्र दिवपाक मेळटलें, अशी म्हायती सावंत हांणी दिली.
हें प्रमाणपत्र दिवपाक आमी यंत्रणां बसयल्या. जांकां ह्या प्रमाणपत्रांची गरज आसा तांणी लेखी आनी तोंडी चाचणी दिवची पडटली. तांचेकडे १५ वर्सांचो राबीतो दाखलो आसपाक जाय आनी शिक्षणीक पात्रताय जाय. उपरांत तांची कोंकणींत आमी सामान्य गिन्यानाची चाचणी घेतले. ह्या सगळ्यांची मोलावणी करून परिक्षक मंडळ धादोशी जाले उपरांतूच प्रमाणपत्र जारी करतले, अशें सावंत हांणी सांगलें.
जे गरजू आसात, जांणी आपले १० वी आनी १२ वी यत्तेंत कोंकणी विशय घेतिल्लो तांकां ही चाचणी दिवपाची गरज ना. तांणी आपलें मार्कशीट दिवन हें प्रमाणपत्र व्हरूं येता. अकादमीचो अध्यक्ष न्हय तर हें प्रमाणपत्र दिवपाचे अधिकार अकादमीच्या सचीवाक दिल्यात, अशेंय सावंत हांणी म्हणलें.
दत्तू नायक हांणी सांगलें, ‘फकत सरकारी नोकरीच न्हय तर हेर शिक्षणीक मळार ह्या प्रमाणपत्राचो उपेग करपाक मेळटा. जांकां कोंकणीचें गिन्यान ना तांचे खातीर अकादमी १०० वरांची कोंकणी शिक्षण कार्यशाळा घेवन तांकां प्रशिक्षण दितलें. कोंकणीचें प्रशिक्षण आनी गिन्यानाचें प्रमाणपत्र तज्ञ थारयतले. जांकां कोंकणी उलोवपाक आनी बरोवपाक कळटा, मात तांणी शिक्षण घेवंक ना. देखून कोंकणीचें गिन्यान सिद्ध करपा खातीर तांचे कडे शिक्षणीक पात्रताय नासता तांकां हें प्रमाणपत्र उपेगाक पडटलें.
हे विशीं राज्य सरकार बेगेनूच अधिसुचोवणी काडटलें आनी १ जानेवारी सावन हें प्रमाणपत्र दिवपाक सुरवात जातली. चाचणी दिले उपरांत एका दिसा भितर हें प्रमाणपत्र मेळटलें, अशी म्हायती दत्तू नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
