भांगरभूंय | प्रतिनिधी
पणजी : शेंकड्यांनी गोंयकार सरकारी नोकऱ्यां खातीर मेळटा त्या मार्गान यत्न करतात. हालीं गोंयांत सरकारी नोकर्यांचें हांयस दाखोवन फटोवपाचीं प्रकरणां उक्ताडार आयलीं. आतां असल्याच प्रकरणांनी फटवल्ले कागाळ करपाक मुखार येवपाक लागल्यात. अशेंच एक प्रकरण फोंड्यां नोंद जालां. सरकारी नोकरेचें हांयस दाखोवन जायत्या जाणांक सुमार ४० लाख रुपयांची तोपी घालपी प्रकाश मुकुंद राणे (सिंधूनगर- कुर्टी) आड फोंडें पुलिशेंत गुन्यांव नोंद जाला. हे विशीं रोखडीच कारवाय करून दुबाविताक पणजे पुलिसांचे सुवादीन केलो.
मेळिल्ले चड म्हायती प्रमाण, दुबावीत प्रकाश राणे हाची वळख सुषमा गांवस हांणी कागाळदार उषा उर्फ शीतल श्रीधर आश्वेंकार हांचे कडेन करून दिली. तेन्ना राणे हाणें आपूण जनावरांचो निवृत्त दोतोर अशें सांगलें. जायत्या मंत्र्यां कडेय आपली वळख आशिल्ल्याचेंय बंडल मारलें. तांणी आश्वेंकार हांच्या चल्याक अबकारी निरीक्षकाची (एक्सायज इन्स्पेक्टर) नोकरी दिवपाचें हांयस दाखोवन १३ लाख घेतले. सीताराम खोर्जुवेंकार हांच्याय चल्याक नोकरी दिवपाचें उतर दिवन ५ लाख आनी संतोष गोवेकार हांच्या चल्याक अबकारी खात्यांत निरीक्षकाची नोकरी दिवपाचें सांगून तांचे कडल्यान १० लाख रुपया घेतले. अमरेश धर्मा ताह्मणकार हांचे कडल्यानूय शिक्षण खात्यांत एलडीसीची नोकरी दिवपाचें हांयस दाखोवन २ लाख घेतले.
हो वेव्हार जानेवारी २०२१ ते डिसेंबर २०२२ मजगतीं पाटो- पणजे जालो. हे विशीं फोंडें पुलिसांनी दुबावीत राणे आड गुन्यांव नोंद करून ताका अटक केली आनी ताका पणजे पुलिसांचे सुवादीन केलो. हे विशीं पुलीस फुडें तपास करतात. फोंडें म्हालांत घडिल्लें हें दुसरें प्रकरण.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
