भांगरभूंय | प्रतिनिधी
भोवतेक गोंयकारांक वा हेर कोणाकूय सरकारी नोकरी जाय आसता. ते खातीर ते दुडू दिवपाकूय तयार आसतात. हे मनीस नोकरी मेळटकच कितें क्रांती करतात? आमी सद्या ताचेर उलोवया नाका. पूण, हाचे उरफाटे बरें काम करपीय खूब सरकारी कर्मचारी आसात. नरेंद्र नायक हे सध्या दोन वजीं पेलतात. हणखणें आनी तोर्सें माध्यमीक शाळेचे ते मुख्याध्यापक आसात. सरकारी कर्मचाऱ्यांची दुख्खां खूब आसतात. मात खंयच्याच कर्मचाऱ्याक तीं जाहीर सांगपाक मेळनात, तीं समजून घेवपाक जाय. नोकरी करता आसूनय नरेंद्र हांणी साबार नाटकां बरयलीं. विद्यार्थ्यांक भितर संद दिली. तांच्या नाटकांक इनामां लेगीत मेळ्ळीं. तांकां चित्रकला, वाचन, लेखनाची ल्हानपणा सावन आवड. चित्रकलेक लागून काॅलेजींत आसतना तांची आर्थीक गरज भागली. मुखार काॅलेजींत वतकच ते पत्रकार जाले. हें सगलें करतना तांणी मुखार शिक्षण घेवन केन्नाच सोडूंक ना. गोंय विद्यापीठांत पदव्युत्तर शिक्षण घेतलें. ताचो तांकां फायदो जालो. ही पदवी तांणी मराठी विशयांत घेतली. तांणी इतिहासांत पसून पदव्युत्तर पदवी मेळयल्या.
हायर सेकंडरी, काॅलेजींत तांकां समाधान मेळनाशिल्लें. सरकारी नोकरी मेळ्ळी जाल्यार बरें जातलें अशें चिंतून तांणी खर परिश्रम करून जीपीएससीची परीक्षा दिली. तातूंत तांकां यश मेळ्ळें. तांकां एडीईआय हें म्हत्वाचें पद मेळ्ळें. तें काम करतना तांकां कार्यावळ आंखपाचो अणभव तर मेळ्ळोच. खेरीच सगल्या शाळां मुखेल्यां कडेन तांची भासाभास जावपाक लागली. पूण तांकां विद्यार्थ्यांक शिकोवपाची उमळशीक लागिल्ली. ही संद तांकां कांय तेंपान मेळ्ळी ती हणखणें शाळेंत. ती गोंयचे शिमेर आसा. खेरीज चडशे गांवगिरे विद्यार्थी. हांगा नरेंद्र नायक समाधानी जाले. तांणी विद्यार्थ्यां खातीर वेगवेगळ्यो कार्यावळी चालीक लायल्यो. तांच्या वांगडा ते नाटकांय करताले. तीं लोकांक आवडलीं. तांणी तोखणायूय केली.
तांका मेळ्ळो, ते दिसूय ते विद्यार्थ्यां खातीर कितें काम करूं येता, ताचोच विचार करताले. ते सांगतात, आमी जर लक्ष घालें जाल्यार विद्यार्थी लेगीत ह्या कार्यावळीं कडेन लक्ष दितात. तातूंत तुमी वांटो घेतलो जाल्यार तुमचें व्यक्तीमत्व फुलपाक उपेगी थारता. हेर कडेन तुमकां पयशे खर्च करचे पडत, पूण हांगां तुमकां सगलें फुकट. तुमी फक्त ताचो लाव घेवपाचो इतलेंच. हालींच तांणी बालमेळावो घेतलो, तोय हणखणें सारके गांवगिरे शाळेंत. विशेश म्हणल्यार तांचो वावर पळोवन तांकां पयलीं रेवोडें- नानोडें शाळा आनी उपरांत तोर्सेंची शाळा दिली.
नरेंद्र नायक हांणी शाळा समुहाचे सचिव म्हूण काम केलां. गोंय मराठी अकादमीचे मांद्रे विभागाचे ते अध्यक्ष आशिल्ले. सहकारी मळा कडेनुय तांचो संबंद आयला. तांणी गजचर्मधारी , तुका झालासे कळस, क्षात्रतेज, कोंडाण्याचा सिंह, स्वामी सामर्थ्यांचा, स्वामी समर्थ, अवघी विठाई माझी, नामा म्हणे, देवा तुझा मी सोनार ह्या नाटकांनी काम केलां. आवो साई, संगीत महामृत्यूंजय, टिकले ते पाॅलिटीक, इत्सा परा ताच येता घरा (पेडणेचेय कोंकणींत), अपराजीत योद्धा हाचे भायर आनीकूय कांय नाटकां तांच्या हातांतल्यान जाल्यांत. तातूंत राजा शिवछत्रपती, रौद्र शंभो, समर्थ रामदास स्वामी, हर्षली अयोध्या नगरी, संत महिमा हीं नाटकां आसात. तांणी कथा, कविताय बरयल्यात.
जेन्ना खंयचोय शिक्षक शिकोवपाचें काम प्रामाणीकपणान करून हेर कलांनी बुडून आसता, तेन्ना ताच्या विद्यार्थ्यांक ताचो फायदोच जाता. नरेंद्र नायक सांगतात, जर एखादो विद्यार्थी व्यक्तीमत्व विकासाक म्हत्व दिता जाल्यार ताणें शाळेंतल्या सांस्कृतीक कार्यावळींनी वांटो घेवपाक जाय. नाटक, सिनेमांनी जे व्हड जाले, तातूंतले भोवतेक नट अशेच वयर सरल्यात. अभ्यासा वांगडा कला, खेळाकूय म्हत्व आयलां. करियराचो विचार केल्यार तुमकां अभ्यासा वांगडाच हेर गजालीय पळोवच्यो पडटात. देखीक एकवटान वावरप. टीमवर्क हे सगल्यांक वांगडा घेवन करचें पडटा. असल्या सांस्कृतीक कार्यावळींनी वा खेळांनी हें सोंपेपणी जावंक शकता. नरेंद्र सराक तांचे फुडले कारकिर्दी खातीर परबीं.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
