भांगरभूंय | प्रतिनिधी
विद्यालयीन वा कॉलेज शिक्षण पुराय जाले उपरांत सर्वसादारण तरणाटो नोकरी सोदूंक लागता. दर एकल्याक दिसता की ताका सरकारी नोकरी मेळची. सरकारी नोकरी मेळोवप हें दर एकल्याचें सपन आसता. कारण सरकारी नोकरेंत खूब लाव आसतात. पयली गजाल म्हळ्यार जॉब सेक्युरिटी. कोणूय तुका तडकाफडकी नोकरे वेल्यान कांडूक शकना. दुसरो फायदो म्हळ्यार पगार बरो आसता आनी तिसरी गजाल म्हळ्यार फक्त पांच दीस काम आनी भरपूर सुटयो. असली नोकरी कोणाक नाका जाल्या.
पूण आयजकाल सरकारी नोकरी मेळप म्हळ्यार कुस्तार जालां. राज्य सरकारान कर्मचाऱ्यांच्या भरती खातीर गोंय राज्य कर्मचारी भरती आयोगाची स्थापणूक केल्या. ह्या आयोगान हालींच 232 कर्मचाऱ्यांच्यो सुवाती भरपा खातीर एक जायरात प्रसिध्द केली. ह्या 232 सुवातीं खातीर वट्ट सुमार 20 हजार तरणाट्यांनी अर्ज केले. हाचे वेल्यान बेकार तरणाट्यांचो आंकडो लक्षांत येता. पारदर्शकतायेन 232 सुवाती भरल्यो जाल्यार उरिल्ल्या तरणाट्यांनी किदें करपाचें? दर वर्सा हजारांनी विद्यार्थी धावेच्या आनी बारावेच्या परिक्षांक बसतात. ह्या विद्यार्थांचें मुखार किदें? हाचो सरकारान विचार केला. नाजाल्यार बेकार तरणाट्यांचो आंकडो दरवर्सा वाडत वतलो.
तरणाटो कितलोय हुशार आसलो म्हूण नोकरी मेळटलीच अशें ना. गोंय राज्या कर्मचारी भरती आयोगाची स्थापणूक जावचे पयलीं सरकारी नोकरी ही एक तर मंत्र्याच्या शिफारसीन मेळटाली वा ती लांच दिवन विकती घेवची पडटाली. तरणाटो जर मंत्र्याच्या मतदारसंघांतलो वा सोयरो आसत जाल्यार नोकरी घडये फुकट मेळूंक शकताली. नासत जाल्यार पयशे दिले बगर नोकरी मेळप शक्यच ना. प्रत्येक नोकरेचें मोल थारिल्लें आसा. प्युनाचे नोकरेक उणी लांच दिवची पडटा जाल्यार आरटीओ निरिक्षकाचे नोकरे खातीर लाखांनी रुपया भायर काडचे पडटात. विचार करपा सारखी गजाल म्हळ्यार लोक नोकरे खातीर लांच दिताय बी. त्याच कारणा खातीर ही ‘कॅश फॉर जोब’ स्कॅमां अस्तित्वांत येतात.
एकदां म्हाका एका खाजगी आस्थापनांत प्युनाची नोकरी करपी तरणाट्याचो फोन आयलो- सर म्हाका सरकारी खात्यांत नोकरी मेळटा पूण पांच लाख रुपया लांच मागतात, कितें करूं?
हांवें ताका जाप दिली- ही संद सोडनाका. खंयच्यान तरी पयशांची तजवीज कर आनी ती नोकरी पदरांत घे. सरकारी खात्यांत प्युनाक खाजगी कंपनी परस बरो पगार मेळटा हें मतींत दवर. ताणें म्हजो सल्लो आयकलो. सरकारी नोकरी मेळ्ळे उपरांत ताका सोयरीगती येवंक लागल्यो. आतां लग्न जावन बापूय जालो.
चलयांचे आवूय-बापूय तर आपले चलयेक सरकारी नोकरी मेळची म्हूण धडपडत आसतात. ते कितलीय लांच दिवंक तयार आसतात. कारण सरकारी नोकरी मेळ्ळी जाल्यार चलयेचें लग्न बेगीन जावंक शकता. एका सरकारी खात्यांत काम करपी म्हजे वळखीचे एके बायलमनशेन सांगलें की तांच्या खात्यांत आंकवार चलयोच ना. कोणूय आंकवार चली भरती जालें जाल्यार वर्सा भितर ताचें लग्न जालेंच म्हूण समज. सरकारी खात्यांत नोकरी करपी चलयांक डिमांड खूब आसा अशें तिणें म्हाका सांगलें.
पूण सगल्यांच्याच नशिबांत सरकारी नोकरी नासता. सरकारी नोकरी मेळूंक नाशिल्ल्या तरणाट्यां मुखार दोन पर्याय आसतात. एक तर खाजगी कंपनींनी काम करप वा ल्हानसान धंदो करप. नामनेच्या खाजगी कंपनींत नोकरी मेळ्ळी तर नशीब म्हणपाचें. नाजाल्यार मेळत त्या खाजगी कंपनींत दिता त्या पगाराचेर काम केले बगर गत्यंतर नासता. खूब शिकिल्ले तरणाटे गोंयांत तांकां जाय तसली नोकरी मेळनाशिल्ल्या कारणान शेजारच्या राज्यांनी वा विदेशांत वचपाक लागल्यात.
हालीं तेंपार सगले मंत्री आनी आमदार तरणाट्यांनी सरकारी येवजण्यांचो लाव घेवप स्वताच्या पांयार उबे रावचें असो उलो मारतात. हे माचयेर उबो रावन उलोवप सोंपें. धंदो करतलो जाल्यार पयलीं सुवात आनी भांडवल लागता. बरें धंदो सुरू केलो जाल्यार तो चलतलो म्हूण शास्वती ना. कर्जबाजारी जाल्यार जीव दिवपाची पाळी येवं येता. ते खातीर खूबशे तरणाटे धंदो करूंक सोदिनात. सगलेच नोकरेक प्राधान्य दितात.
नोकरी हें उपजिविकेचें साधन. तरणाट्यांक नोकऱ्यो सरकारी जावं वा खाजगी वाठारांत उपलब्ध करून दिवप ही सरकाराची जबाबदारी आसा. सरकारान जर ही जापसालदारकी वेवस्थीत हाताळ्ळी ना जाल्यार फुडाराक बेकार तरणाट्यांचें प्रमाण हिसपा भायर वाडटलें आनी तरणाट्यां मदीं असंतोषाचें वातावरण पातळटलें. थोडे तरणाटे नोकरे खातीर शेजारच्या राज्यांनी वा विदशांत वतले आनी पर्यायान गोंयांत गोंयकारांचो आंकडो उणो जातलो हें विसरूंक फावना.
अनील कामत शंखवाळकार
9763718518
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
