भांगरभूंय | प्रतिनिधी
बदली कायद्या प्रमाण, सरकारी अधिकारी, कर्मचाऱ्याचो एका पदा वयलो कामाचो तीन वर्सांचो काळ पुराय जालो काय ताची बदली जाता. पूण, कांय कडेन ताचे परस चड काळ एकाच जाग्यार उरपी लाखांनी अधिकारी, कर्मचारी आमच्या देशांत आसात. खंयचेंच राज्य ताका आडवाद ना. थोडे सरकारी वशिलो लावन वर्साचीं वर्सां एकेच कडेन रावतात. तांकां सरकारी जांवय वा सून अशें म्हणपाची पद्दत आसा. तर कांय जाण वरिश्ठांचे नजरचुकीन एकेच कडेन उरतात. थोड्यांक वर्स जावचे पयलींच दुसरे कडेन वच्चें पडटा. म्हणटकच नेमा प्रमाणूच सगलें जाता, अशें म्हणप धाडसाचें थारतलें. बदली ही जावपाकूच जाय, निदान कांय खात्यांतल्या कर्मचारी, अधिकाऱ्यांची, अशें सगलेच म्हणटात. अर्थांत ताचे फाटल्यान जायतीं कारणां आसतलीं.
तीन वर्सां वा ताचे परस चड काळ एकाच जाग्यार आशिल्ल्या पुलीस निरीक्षकांच्यो ह्या सप्तका भितर बदल्यो जातल्यो, अशें मुख्यमंत्री डॉ. प्रमोद सावंत हांणी काल सांगलें. फाटल्या कांय वर्सां सावन थोड्या पुलीस स्टेशनांनी एकूच निरीक्षक आसा. तांची सगल्यांत पयलीं बदली जातली. तांकां बदली जाल्ल्या वाठारांतूच रावचें पडटलें. चडश्या पुलीस स्टेशनांनी रावपाची सुविधा आसता. मात, लागसार स्वताचें घर आशिल्ले निरीक्षक थंय रावतातूच अशें ना. आयज सगल्यां कडेन स्वताच्यो गाडयो आसात, सरकारी गाडीय मेळटा. म्हणटकच वरभर प्रवास केल्यार पेडणेंच्यान पणजे आनी वाळपयच्यान आडपय सहज पावूं येता. आतां पुलीस निरीक्षकांक बिराड करचें पडटलें वा स्टेशनांतूच रावचें पडटलें. ताचे पयलीं, कितल्या स्टेशनांतल्यो रावपाच्यो कुडी सुसज्ज आसात, ताचो सरकाराक नियाळ घेवचो पडटलो. तांचीं भुरगीं शाळा, काॅलेजीक वचपी आसल्यार, घरकान्न नोकरी करपी आसल्यार तांचोय विचार जावंक जाय. पुलिसांक रावपाक क्वाॅटर्स आसतात. मात थंय काॅन्स्टेबल रावतात. ह्या क्वाॅटर्सांची दुरुस्ती जायना, थंय उदक सारकें येना, नळे फुटिल्ले आसात…. अश्यो कागाळी कांय वर्सां पयलीं येताल्यो. घडये आयज तातूंत सुदारणा जाल्या आसतली. सरकारी अधिकाऱ्यां खातीर सरकारी घरां बांदिल्लीं आसात. खास करून दोतोरां खातीर, पूण तातूंत कोण रावतातूच अशें ना. कांय वर्सां पयलीं हाचे फोटो भूतबंगलो ह्या माथाळ्या खाला दिसाळ्यांनी छापून येताले. सरकाराचो घर बांदपा फाटलो उद्देश बरो आशिल्लो, पूण गोंय ल्हान आशिल्ल्यान स्वताचें घर, फ्लॅट सोडून अधिकारी सरकारी घरांत कित्याक रावतलो? घरां बांदून सरकाराचे करोडांनी रुपया मात फुकट गेले.
उपनिरीक्षक, कॉन्स्टेबल पदांवेल्या पुलिसांच्योय बदल्यो करपाचें सरकारान थारायलां. तांच्योच न्हय, तर सगल्याच पुलीस कर्मचाऱ्यांच्यो बदल्यो जावंक जाय. कारण तसें सरकाराचें धोरणूच आसा. कांय जाण लोकप्रतिनिधीच्या आशिर्वादान एकाच जाग्यार रावतात तांचें कितें? थोडे तर बडटेचेर पयस वचपाचें आसल्यार बडटी पसून न्हयकारतात. चडशे गोंयकार तशें होमसीक. तांकां सकाळीं नोकरेक गेले काय सांजवेळा घरा परतुपाक जाय. हेर राज्यांनी भोवसंख्य सरकारी कर्मचारी पयसुल्ल्या गांवांनी नोकरे निमतान वचून रावतात, तशें गोंयांत सहसा जायना. आतां पुण्यां, बंगळुरूंत रावन नोकरी करपी नवे गोंयकार आसात, ती गजाल वेगळी.
चडशीं पापां काळखांत जातात, अशें म्हणटात. हें आदल्या काळांत जातालें, हालींच्या वर्सांनी दिसाचीं पसून पापां जातात. सांपडटा तो चोर, उरिल्ले साव. गुन्यांव उणें करपाक 20 टक्के पुलिसांक रातपाळी दिवपाचेंय सरकारान थारायलां. सध्या म्हूण घडये तितलेच रातपाळी करतात आसतले. रातपाळयेक खास करून दर्यादेग वाठारांनी पुलीस जाय. कारण चडशे गुन्यांवकार थंयच सांपडटात. खास करून घुंवळे वखदां विकपी, सोरो पियेवन गाडी चलोवपी….. गोंयांत घुंवळे वखदां खपतात, देखून संवसारांतल्या तस्करांची गोंयाचेर नदर आसा, अशें सरकाराचें म्हणणें. गजाल खरी. ते खातीर कडक पावलां उखलचीं पडटलीं. तांकां गोंयांतल्या कोणा तस्करांचो भितरल्यान तेंको आसा जाल्यार तोय तपासचो पडटलो. जायत्या जाणांचीं नांवां अदींमदीं भायर सरतात, मात उपरांत ते मनीस ते तस्कर न्हयच, अशें सिद्ध जाता. तश्यो घोशणाय जातात. रातपाळयेचे पुलीस चड सक्रीय जायत जाल्यार गोंयांतले गुन्यांव थोडे तरी उणे जातले. फक्त पुलिसूच न्हय, तर एकाच जाग्यार आशिल्ल्या हेर कर्मचाऱ्यांचेय बदलेचो विचार जावचो. मात हें करतना सुडबुद्धीन कोणाची 50- 60 किलोमिटर पयस वा येरादारीची सुरळीत सुविधा नाशिल्ल्या जाग्यार बदली करची न्हय!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
