भांगरभूंय | प्रतिनिधी
मुख्यमंत्री : ‘म्हजें घर’ येवजण 100 टक्के येसस्वी करपाचो निश्चेव
भांगरभूंय । प्रतिनिधी
दिवचल : गोंय सरकारान ‘म्हजें घर’ ही कल्याणकारी येवजण सुरू करतना मालकी हक्कूच न्हय जाल्यार समजीक अंतर, कुटुंबीक अंतर ना करून मानसीक भलायकी दिवपी थारतली. 60 वर्सांत जांकां शक्य जावंक ना, तें काम आपल्या सरकारान दूरदिश्टी दवरून हातांत घेतिल्ल्याचें वेगळेंच समाधान मेळटा. सरकारी जमनीर कसलेच तरेचें अतिक्रमण सोंसचे नात. दरेकल्यान ‘म्हजें घर’ येवजणेचो लाव घेतना गरजेचे सोपस्कार पुराय करून आपलें घर, स्वताचें घर म्हूण वेगळें समाधान मेळोवचें, अशें मुख्यमंत्री डॉ. प्रमोद सावंत हांणी सांगलें.
‘म्हजें घर’ येवजणे खाला सांखळी मतदारसंघांतल्या लोकांक येवजणेच्या विवीध अर्जांचें तशेंच छाननी आनी सरकारी अधिकाऱ्यांचे हाजिरेंत गरजेचें मार्गदर्शन करपाचे कार्यावळीचें आयोजन सांखळेच्या रवींद्र भवनांत केल्लें. ह्या वेळार मुख्यमंत्री उलयताले. माचयेर मुख्यमंत्र्यां वांगडा जिल्होधिकारी अंकीत यादव, उपजिल्होधिकारी नेहाल तळवणेंकार, श्रीपाद माजिक, भाजप मंडळ अध्यक्ष रामा नायक, जिल्हो पंचायत वांगडी गोपाळ सुर्लीकार, सुलक्षणा सावंत, सरपंच रोहिदास कानसेकार, बाबला मळीक, सरपंच साईमा गावडे, सपना पार्सेकार, संतोष नायक, सरपंच मामलेदार आनी हेर मानेस्त हाजीर आशिल्ले.
सरकारी जमनीर, कोमुनिदादीचे जमनीर जांचीं घरां आसात तांकांय गरजेची फाटपुरवण केले उपरांत अर्ज भरून आनी गरेजेची रकम सरकार दरबारांत जमा करून कायदेशीर सनद मेळोवपाची वेवस्था आसा. मात सरकारी जमनीर अतिक्रमण करून बेकायदो तरेन अतिक्रमण केल्ल्याचें दिसल्यार कारवाय करतले. हाचे मुखार ते संबंदांत सगल्यांनी सादूर रावचें. सरकार कोणाकूच भोगसुचें ना, अशी शिटकावणी मुख्यमंत्र्यान दिली.
फुडल्या स म्हयन्यांत सगले तरेचीं कागदपत्रां सादर करपाची वेवस्था केल्या. जे लोक ह्या वेळांत कागदपत्रां सादर करतले, तांकां योग्य पद्दतीन सरकारी नियोजना प्रमाण सनद मेळटली. ते उपरांत आयिल्ल्या अर्जांचेर मात वेगळे तरेन विचार करतले, अशें मुख्यमंत्र्यान स्पश्ट केलें.
घरा संबंदांत आनी येवजणे संबंदांत अदीक तपशिलान म्हायती घेवप गरजेचें आसा. वेगवेगळ्या गटांत आपले अर्ज सादर करपाची सुविधा दिल्या. रस्त्या कुशीक जीं घरां आसात, तीं कायदेशीर करपाची तजवीज सरकारान केल्या. एकाच घरांच चार भाव वेगवेगळे रावतात जाल्यार तांकांय वीज, उदक, शौचालय हाची सुविधा मेळची हे खातीर वेगवेगळे नंबर दिवपाची येवजण ‘म्हजें घर’ येवजणेंत आसात. ताका लागून घरांतली किजिलां, झगडीं उणी जावन मानसीर समाधान मेळोवपाक ‘म्हजें घर’ येवजण फायद्याची थारतली, असो विस्वास मुख्यमंत्र्यान उक्तायलो.
अटल आसरा येवजणे खाला घरां कायदेशीर नाशिल्ल्यान येवपी अडचण पयस करपाची येवजण आसा. चार लोक आसात जाल्यार चारूय लोकांक वेगवेगळे पद्दतीन ताचो लाव दिवपाचो हेतू आसतलो. घर दुरुस्ती खातीर मुख्याधिकारी, सचीव हांणी फक्त तीन दिसांत नाहरकत दाखलो दिवप सक्तीचें आसा. ते खातीर नगरसेवक, पंचायत मंडळांक पांया पडपाची गरज पडची ना. सरकारी जमनी वयलीं घरां कायदेशीर करतना सगले तरेची खबरदारी घेतले, अशें मुख्यमंत्र्यान सांगलें.
ह्या वेळार मुख्यमंत्र्यांचे हस्तुकीं कांय लोकांक अर्जांचे वांटप केलें.
उपजिल्होधिकारी नेहाल तळवणेकार हांणी येवकार दितना येवजणे संबंदांत सविस्तर म्हायती दिली.
मालकी हक्क दिवपाचो सरकाराचो इतिहासीक निर्णय
कांय कडेन घरा वयल्यान न्यायालयांत खटले चालू आसात. तांचे निकाल जावन घर मोडपाचे आदेश येतात. ताचो दोश थेट सरकाराचेर म्हणल्यार मुख्यमंत्र्याचेर येता आनी मुख्यमंत्र्याक गाळी खावच्यो पडटात. हाचे मुखार अशे तरेन कसलीच कागाळ येवची ना आनी येवची न्हय हे खातीर फुडल्या स म्हयन्यांत सगली खबरदारी घेवन अर्ज भरून दरेकल्याक घराचो मालकी हक्क दिवपाचो सरकाराचो इतिहासीक निर्णय आसा, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
