भांगरभूंय | प्रतिनिधी
पणजी : विवीध सरकारी खातीं, जिल्होधिकारी कार्यालयां, न्यायालयां, न्यायाधिकरणांत 7591 पदां रितीं आसात. सगल्यांत चड 1260 सुवातो पुलीस खात्यांत आनी आयआरबींतल्यो आसात. तातूंत पुलीस कॉन्स्टेबलाच्यो 361, पुलीस उपनिरिक्षकांच्यो 216, पुलीस कॉन्स्टेबल (एबी-आयआरबी) 108 सुवातांचो आस्पाव आसा. मुख्यमंत्री डॉ. प्रमोद सावंत हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे संबंदांत आमदार विजय सरदेसाय हांणी अतारांकीत प्रस्न उपस्थीत केल्लो.
जापेंत दिल्ले म्हायती प्रमाण, आयआरबींत पुलीस कॉन्स्टेबल (वायरलेस) 66 सुवातो, पुलीस खात्यांत हेड कॉन्स्टेबल ड्रायव्हराच्यो ग्रेड 2 च्यो 58 आनी कॉन्स्टेबल ड्रायव्हर ग्रेड 3 च्यो 34 सुवातो रित्यो आसात. विवीध तरांच्या सहाय्यक उपनिरिक्षकांच्यो 4 सुवातो रित्यो आसात. ते भायर मॅकानीक, क्लार्क, रांदपी, ड्रायव्हर, नर्स, वेल्डर अशीं विवीध पदां रितीं आसात.
अधिकारी पदां मदीं पुलीस अधिक्षक (जीपीएस) 2, पुलीस उपअधिक्षक 38, जाल्यार पुलीस निरिक्षकाचीं 3 पदां रितीं आसात. जापे प्रमाण शिक्षण खात्यांत सगल्यांत चड सुवातो रित्यो आसात. शिक्षण खात्यांत वट्ट 679 सुवातो रित्यो आसात. तातूंत सरकारी मुळाव्या शाळेंतल्या 347 शिक्षकांच्या सुवातांचो आस्पाव आसा. सहाय्यक जिल्हो शिक्षणीक निरिक्षकांचीं (एडीईआय) 214 पदां रितीं आसात. सहाय्यक शिक्षकांची 177, उपप्राचार्य, मुख्यध्यापकांचीं 27, चित्रकला शिक्षकांचीं 29, एलडीसी आनी यूडीसीचीं 44, इंग्लीश शिक्षकांचीं 14, कंप्युटर शिक्षकांचीं 3 सुवाती रित्यो आसात.
वीज खात्यांत 1014 रितीं पदां
भलायकी खात्यांत 375, जीएमसींत 50, रान खात्यांत 322, वेवसायीक कर विभागांत 147, खेळां खात्यांत 85, भौशीक बांदकाम खात्यांत 242, वीज खात्यांत 1014, उदकास्रोत खात्यांत 1323 जाल्यार कला आनी संस्कृती खात्यांत 131 पदां रितीं आसात.
4 वर्सांत 3987 आरक्षीत पदांची भरती
गोंय सरकारान फाटल्या चार वर्सांत एसटी आनी ओबीसी समाजा खातीर राखीव आशिल्ल्या 3987 पदांचेर भरती केल्या. हीं सगलीं पदां कायम स्वरुपी पद्दतीन भरल्यांत. तातूंतलीं सगल्यांत चड 714 पदां वीज खात्यांतलीं आशिल्ली, अशी म्हायती जापेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
