भांगरभूंय | प्रतिनिधी
-कर्मचारी भरती आयोगा कडल्यान आतां मेरेन 102 पदांच्यो जायराती
पणजी : सरकारी खात्यांत सध्याचे स्थितींत 6,175 पदां रितीं आसात. तातूंतलीं विवीध खात्यांनी 102 पदांच्यो जायराती कर्मचारी भरती आयोगान आतां मेरेन परिक्षा घेतल्यात, अशी म्हायती मुख्यमंत्री डॉ. प्रमोद सावंत हांणी विधानसभेंतल्या लेखी जापेंत दिल्या.
सरकारी खात्यांनी रित्या आशिल्ल्या पदा विशींची म्हायती विरोधी पक्षफुडारी युरी आलेमांव आनी आमदार एल्टन डिकॉस्टा हांणी लेखी प्रस्नाच्या माध्यमांतल्यान मागयिल्ली. जाल्यार कर्मचारी भरती आयोगा कडेन कितल्या खात्यांनी रित्या पदां खातीरच्यो परिक्षा घेवपाची मागणी केली, असो प्रस्न विरोधी पक्षफुडारी युरी आलेमांव हांणी विचारिल्लो. ह्या प्रस्नांक मुख्यमंत्री डॉ. प्रमोद सावंत हांणी, सगल्याच सरकारी खात्यांनी 6,175 पदां रिती आसून कर्मचारी भरती आयोगा कडेन तातूंतल्या 102 पदांच्या भरतीची मागणी विवीध सरकारी खात्यांनी केल्ल्याचे नमूद केला.
राज्यांतले हजारांनी तरणाटे सरकारी नोकरेची वाट पळयतात. सरकारी नोकरेची प्रक्रिया पारदर्शक करपा खातीर मुख्यमंत्री डॉ. प्रमोद सावंत हांणी कर्मचारी भरती आयोगाची स्थापणूक केल्या. डिसेंबर 2023 पसून कमृचारी भरती आयोगा वरवीं सरकारी खात्यांतल्या पदांची भरती करतात.
…………………………..
म्हत्वाच्या खात्यांतली रितीं पदां
शिक्षण : 822
कदंबा महामंडळ : 293
कुशळटाय विकास : 148
मानसोपचार हॉस्पिटल : 119
उजो पालोवपी दळ : 115
बंदखण प्रशासन : 109
नगरनियोजन : 68
येरादारी : 59
गोरवा सांबाळ आनी पशुसंवर्धन : 62
खण : 45
वीज : 99
पर्यटन : 21
………………………..
1,901 पदां खातीर अजून जायरात ना
कर्मचारी भरती आयोगा कडेन 2023 त 30 सरकारी खात्यांनी रितीं पदां भरपाची मागणी केल्ली. तातूंतल्या 1,901 रित्या पदां खातीर मागणी करूनूय आयोगा कडल्यान अजून हे विशीं जायराती प्रसिद्ध जावंक नात. पुलीस खात्यांत 460 पदांचो आस्पाव आसा. शिक्षण खात्याच्या 251 पदांचो आस्पाव अाशिल्ल्याचे मुख्यमंत्री डॉ. प्रमोद सावंत हांणी दिल्ल्या जापेंतल्यान स्पश्ट जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
