भांगरभूंय | प्रतिनिधी
पणजी, प्रतिनिधी ः उर्जा संवर्धन कायदो 2001 खाला वीज वाटोवपाक वीज खात्यान उपाय येवजण करपाक सुरवात केल्या. राज्यांतल्या सरकारी तशेंच केंद्र सरकाराच्या कार्यालयांनी हाचें फुडें एलईडी बल्ब लावप सक्तीचें जालां. हे विशींचो आदेश मुखेल वीज अभियंत्यांनी जारी केला. आदेशांक पाळो दिलो ना जाल्यार वीज खात्याक वीज काडपाचो अधिकार आसतलो असो उल्लेख आदेशांत केला.
एलईडी बल्ब सयत ब्रशलेस डीसी पंखे तशेंच पांच स्टार रेटेड एसी लावपा लावप सक्तीचें आसा.
परंपरीक बल्बापरस एलईडी बल्बांक उणी वीज लागता. राज्य आनी केंद्र सरकाराच्या कार्यालयांनी, शिक्षणीक संस्थांनी, सरकारी हॉस्पिटलांनी एलईडी बल्ब लावचे पडटलें. तशेंच उद्देगीक आनी वेवसायीक वीज गिरायकां खातीर एलईडी बल्ब लावप सक्तीचें आसा अशें आदेशांत म्हणलां. तशेंच वीज वाटोवपा खातीर ब्रशलेस डायरेक्ट करंट (डीसी) पंखे लावप गरजेचें आसा. सरकारी कार्यालयांचे नुतनीकरण करतना वा दुरुस्ती करतना एलईडी बल्ब लावचे. तशेंच उद्देगीक आनी वेवसायीक गिरायकांनी एका वर्सा भितर परंपरीक आनी सीएफएल बल्ब बदलून स्वताच्या खर्चाचेर एलईडी बल्ब घालप सक्तीचें आसा.
तशेंच सरकारी कार्यालयांनी परंपरीक एसी (वातानुकूलन यंत्रणा) बदला फायव्ह स्टार रेटिंग एसी लावप सक्तीचें आसा. उद्देगीक आनी वेवसायीक गिरायकांनी दोन वर्सां भितर फायव्ह स्टार रेटिंग एसी लावप सक्तीचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
