सरकारी कामां सोंपेपणी जावचीं

भांगरभूंय | प्रतिनिधी

खंयचीं सरकारी कामां करतना नागरिकांक आडमेळीं येतात, ताचो अभ्यास गरजेचो. ग्रामसभांनी हाचेर भासाभास जावंक जाय.

कोणूय जावं तो मागीर, सरकारी खात्यांचीं सोंपणां केन्ना ना केन्ना चडचींच पडटात. पूण, तें सरकारी काम पुराय जावपाक खात्यांचे हुंबरे झरोवचेच पडटात. देखून लोक थंय वचपाक कांचवेतात. एके फावटीन काम जातलेंच, हाची खात्री नासता. एक दाखलो मेळ्ळो काय सुटकेचो निस्वास सोडटा थंय आसा, दुसरो दाखलो, हो दोकुमेंत, ती फोटोप्रत हाड अशें आयकतकच संबंदीत मनीस, ‘सरकारी काम नाका, पूण दाखले आडय’ अशें मनांत म्हणले बगर रावना. आतां सरकारान नागरी सेवा केंद्रांतल्यान 179 सेवा दिवपाचें थारायलां. तसो आदेशूय जारी जाला.
नागरी सेवा केंद्रां दरेका तालुक्यांत आसात. थंय थारावीक रक्कम फारीक करतकच कामां जातात. मात तीं बेगोबेग जावचीं. थंयूय उशीर जावपाक लागलो जाल्यार हे येवजणे फाटलो हेतूच ना जातलो. 28 खात्यांच्यो सेवा ह्या केंद्रांनी मेळटल्यो. म्हणटकच थंयच्या कर्मचाऱ्यांक चड जापसालदारकेन कामां करचीं पडटलीं. वास्तवीक दरेके पंचायतींत हीं सेवा केंद्रां सुरू जावंक जाय. कमी कामां आशिल्ल्या सरकारी कर्मचाऱ्यांच्या ताब्यांत तीं दिवंकजाय. पंचायतींत केंद्र, म्हणटकच लोकांक तालुक्याच्या मुखेल शारांत वचपाची गरज पडचीं ना. ह्या केंद्रांचेर उजो पालोवपी दळाची एनओसी, फॅक्टरीचो परवानो, राना खात्याची एनओसी, लायटीचें बील, उदकाचें आनी लायटीचें कनेक्शन, मरण- जल्म दाखलो, एक चौदाचो फाॅर्म, जातीचो, रहिवासी दाखलो, जमीन रुपांतर, सर्व्हे प्लान अश्यो विवीध सेवा दितले. ते खातीर कितले पयशे दिवप, कितल्या दिसांनी काम करपाचें, हाचोय निर्णय सरकारान घेतला. गजाल बरी. पूण ह्या केंद्रांनी प्रत्यक्षांत कामां फटाफट जातलीं, हेंय पळोवचें पडटलें. खास करून उद्देजक, वेवसायिकांक केंद्रांक लागून थाकाय मेळुंये. कारण तांकां सरकारी खात्यांच्या दारांनी भोवचें पडटा. धपक्याक काम जालें, अशें केन्ना जायना. कामां बेगीन जावपाक दरेका कार्यालयांत अर्ज भरून दिवपी, शांत सभावाचो, परोपकारी, प्रामाणीक कर्मचारी नेमूंक जाय. थंयचें झेरोक्स मशीन नागरिकां खातीर उपलब्ध जावंक जाय. तेंय गरजे पुरतेच शुल्क घेवन!
आरटीओ सारक्या खात्यांनी चडशी कामां आवटसोर्स केल्यांत? ते खातीर दरेका खात्यांत खास विभाग सुरू करप शक्य ना? कसलोय अर्ज जाय जाल्यार एजंटांचें वा लागसारच्या स्टेशनरी दुकानदाराचे पांय धरचे पडटात, हें चुकीचें. अशीं सरकारी कामां भायल्यान करचीं पडलीं जाल्यार इतले सरकारी कर्मचारी जाय तरी कित्याक? ही कामां जातना, अर्थीक गैरप्रकार जाता आसतले. येरादारी मळा वयली एजंट नांवाची संकल्पनाच रद्द करपाचें धाडस येरादारी मंत्र्यान दाखोवचें. स्टेशनरी दुकानदार, एजंट करतात तीं कामां आरटीओ कर्मचाऱ्यांक करप शक्य ना?
नेमकीं खंयचीं सरकारी कामां करतना नागरिकांक आडमेळीं येतात, ताचो अभ्यास गरजेचो. ग्रामसभांनी हाचेर भासाभास जावंक जाय. तो अहवाल सरकाराक सादर केल्यार खंयचें खातें लोकांच्या कामांक उशीर करता, फावटी मारुंक लायता, लांच घेता ताचेर उजवाड पडटलो. तशें सरकाराक हें खबर आसतलेंच. तांणी ते नदरेन उपाय येवजण करूंक फावो. कामा- धंद्याक वचपी मनशां कडेन वेळ नासता. तांची फावट फुकट गेल्यार अर्थीक लुकसाण जाता. वयर वेळ, रजा फुकट वता ती वेगळी. सादी एक सही करपाक पसून दुसरे दीस फावट मारपाक लावपी उर्मट अधिकारी आसात!! दुसरी म्हत्वाची गजाल, म्हणल्यार सगल्यांनी प्रसन्न चित्तान काम करूंक फावो. आपूण कामाक आयिल्ल्यांचेर उपकार करता, हीं भावनां नाका. काम घेवन येतात, ते मनीस आनी आमी तांचे सेवेकरी इतलें पसून सरकारी कर्मचाऱ्यांनी लक्षांत दवरल्यार बरींच कामां बेगोबेग जावन पडटलीं.
नागरी सेवा केंद्रां प्रमाण डिजीटल मळाचेरुय सरकारान नेटान मुखार सरचें. 179 मदल्यो चडांत चड सेवा आॅनलायन मेळप, ही काळाची गरज. राज्य आनी केंद्र सरकाराच्यो तश्यो बऱ्योच सेवा आॅनलायन आसात, पूण ऐनवेळार त्यो घात मारतात… इंटरनेट नेटवर्क आसूनय! हाचो अर्थ वेबसायटींतूच कितें तरी चूक आसतली. आॅनलायन सेवा मेळत जाल्यार नागरिकांचो त्रास, मनस्ताप, वेळ… सगलेंच वांचतलें!! यत्न जावचो.